ភ្នំពេញ៖ រដ្ឋាភិបាលបារំាងបង្ហាញជំហរឹងមំាគាំទ្រដល់ការពង្រឹងគុណភាពរាល់ការធ្វើស្ថិតិនៅកម្ពុជាឲ្យ មានលក្ខណៈទទួលស្គាល់ស្របតាម​ ​​ស្តង់ដារអន្តរជាតិដើម្បីធានាដល់ការអភិវឌ្ឍលើគ្រប់វិស័យប្រកបដោយប្រសិទ្ធភាព។ នៅព្រឹកថ្ងៃទី២៤តុលានេះអង្គការសហប្រត្តិបត្តការសេដ្ឋ ​​​កិច្ចនិងអភិវឌ្ឍ OECD នៃរដ្ឋាភិបាលបារាំង បានប្រកាស បន្តផ្តល់បច្ចេកទេស និងហិរញ្ញវត្ថុដល់ក្រសួងផែនការកម្ពុជាដើម្បីជំរុញឲ្យការផលិត​ ​​ស្ថិតិនានា លើគ្រប់វិស័យនៅកម្ពុជាអាចទទួលយកបានពីគ្រប់ភាគីពាក់ពន្ធ័ ពិសេសអ្នកតាក់តែង គោលនយោបាយ ។​​​​​

លោកស្រីមីលីសេន ហ្គេ តាជេដា តំណាងលេខាធិការដ្ឋានបារីស២១នៃអង្គការ OECDមានប្រសាសន៍ថា ការពង្រឹងសមត្ថភាពស្ថិតិគឺមាន​សារៈ​​​​សំខាន់ណាស់សម្រាប់ធ្វើការគាំទ្រការរៀបចំការតាមដាន និងការវាយតម្លៃរាល់ការអនុវត្តនានាដើម្បីផ្តល់ទៅឲ្យអ្នកធ្វើគោលនយោបាយសំ​​ដៅ​​​​​​ដ​ល់ការរៀបចំផែនការអភិវឌ្ឍជាតិឲ្យបានល្អ និងឆ្លើយតបចំទិសដៅ។លោកស្រីបន្តថា ខណៈដែលកម្ពុជា ជាប្រទេសកំពុង​អភិវឌ្ឍ​ចំាបាច់​​ត្រូវ​តែ​​ជំរុញការលើកកម្ពស់វិស័យនេះឲ្យបានល្អមុន ឆ្នាំ2015 ដើម្បីធានាឲ្យមានសុដមរម្យនីយកម្ម​នៅពេលធ្វើ​សមាហរណកម្ម​ទៅក្នុង​សហគមន៍​អា​​ស៊ាន​​។​

លោកទេសរដ្ឋមន្រ្តីឆាយ ថន រដ្ឋមន្រ្តីក្រសួងផែនការមានប្រសាសន៍ថា ការគំាទ្រពីអន្តរជាតិនាពេលនេះ នឹងបានរួមចំណែកដល់ការ​ធ្វើឲ្យកាន់​​តែ​ប្រសើរឡើងនូវប្រពន្ធ័សិ្ថតិជាតិក្នុងប្រើប្រាស់ជាឧបករណ៍វាស់វែងវឌ្ឍនភាពនៃដំណើរការអភិវឌ្ឍជាតិ​កាន់តែមាន​ភាព​ទូលំទូលាយ​ជាង​មុន​។

​លោកទេសរដ្ឋមន្រ្តីបន្តថា បច្ចុប្បន្ននេះក្រសួងកំពុងយកចិត្តទុក​ដាក់​ជា​សំខាន់​ក្នុងការកែលម្អប្រពន្ធ័​ស្ថិតិជាតិដោយពង្រឹង​សមត្ថភា​ពវិ​ទ្យា​ស្ថាន​​ជាតិស្ថិតិបន្ថែមទៀតដើម្បីធ្វើយ៉ាង​ណាឲ្យលទ្ធផលនៃការផលិតបានរាល់ស្ថិតិ នានាមានគុណភាព និងតម្លាភាពសម្រាប់អ្នកប្រើប្រាស់ទូ​​ទៅ​​​​​ជា​ប្រយោជន៍ចំពោះសង្គមជាតិ។

ទោះជាយ៉ាងនេះក្តីលោកទេសរដ្ឋមន្រ្តីបានបង្ហាញថា ការសំរេចបានជោគជ័យទាំងនេះ គឺអាស្រ័យ ទាំងស្រុងលើការគាំទ្រថវិកា ទាំងរាជរដ្ឋាភិ​​បាល ​និងដៃគូអភិវឌ្ឍ។ការលើកឡើងដូច្នេះដោយ កន្លង មកនេះរាល់ការកផលិតស្ថិតិនីមួយគឺបានជួបបញ្ហាប្រឈម ជាច្រើនដោយកញ្ចប់នៅ​​មានកម្រិតទាប ដោយពឹងផ្អែកស្ទើទាំងស្រុងពីដៃគូអភិវឌ្ឍន៍។ ជាក់ស្តែង មានការអនុវត្តអង្កេតសេដ្ឋកិច្ច សង្គមកិច្ច កម្ពុជា អង្កេតវិទ្យាសាស្រ្ត ​និងសុខភាព អង្កេតកម្លាំងពលកម្មកម្ពុជា។

ក្រៅពីនេះមានជំរឿនប្រជា រាស្រ្តឆ្នាំ២០០៨ ជំរឿនសហគ្រាសឆ្នាំ២០១១ និងជំរឿនកសិកម្មបាន​ទ​ទួល​​ថវិកាប​ដិភាគ​ពីរាជរដ្ឋាភិ បាល។ យ៉ាង​​នេះក៏ដោយលោករដ្ឋមន្រ្តីអះអាងថា ការផលិតស្ថិតិផ្លូវការក៏មិនអាចពឹងផ្អែកទៅលើមូលនិធិពី​​ដៃ​​គូអភិវឌ្ឍក្នុងរយៈពេលយូអង្វែងបាននោះទេ ​ប៉ុន្តែការផ្តល់ថវិកាគ្រប់គ្រាន់ពីរាជរដ្ឋាភិបាល គឺ បានធានាដល់ការគាំ​ទ្រអំពីសារៈសំខាន់​របស់​ស្ថិ​​​តិ​​​ក្នុង​ការចូល​រួមតាម​ដានវឌ្ឍនភាព​នៃ​ការ​​​អនុវត្ត​​ផែនការយុទ្ធសាស្រ្តអភិវឌ្ឍជាតិប្រកបដោយដោយប្រសិទ្ធិភាព។​

សូមបញ្ជាក់ថា អង្គការបារីស២១បានអនុវត្តបេសកកម្មរបស់ខ្លួននៅក្នុងប្រទេសកម្ពុជាចាប់តាំងពីឆ្នាំ ២០១១មក ហើយ​បាន​ជួយ​ដល់កម្ពុជា​ជា​​​ច្រើន​លើការកែលម្អស្ថិតក្នុងនោះបានត្រួតពិនិត្យឡើងវិញនូវផែនការមេសម្រាប់ការអភិវឌ្ឍពីឆ្នាំ២០០៨ ដល់ឆ្នាំ២០១៥ការធ្វើបច្ចុប្បន្នភាព​ស្តីពី​​​​ច្បាប់​​ស្ថិតិ ការជំរុញធ្វើវិសោធនកម្មទៅលើច្បាប់ស្ថិតិ និងការផ្តល់កញ្ចប់ថវិកាមួយចំនួនដើម្បីធ្វើយ៉ាងណាឲ្យការផលិតស្ថិតិមានគុណ​ភាព​​​​​សម្រាប់​​ផ្តល់ទៅអ្នកធ្វើគោលនយោបាយនៅថ្នាក់ជាតិ៕ ដោយ៖ ស.ស្អាត​​