រាជធានីភ្នំពេញ៖ ករណីអគ្គីភ័យមួយ បានកើតទ្បើងកាលពីវេលាម៉ោង ១០ និង៤៥ នាទីព្រឹក ថ្ងៃទី១៩ ខែកញ្ញា ឆ្នាំ២០១៣ ដែលស្ថិតនៅផ្ទះលេខ៤៥ ក្រុមទី២ ផ្លូវសំណង់សូនី ភូមិឬស្សី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ជាឃ្លាំងក្រណាត់ ត្រូវបានអគ្គីភ័យឆាបឆេះអស់កំទេចក្រណាត់ និងពិដានមួយចំនួន មូលហេតុបណ្តាលមកពីឆ្លងចរន្តអគ្គីសនី ម្ចាស់ឈ្មោះ ហ៊ុន ភារុណ ភេទ ស្រី មុខរបរមន្ត្រីយោធា។
ក្រោយទទួលបានព័ត៌មានភ្លាមតាមប្រព័ន្ធទូរស័ព្ទ ៦៦៦ ការិយាល័យបង្ការពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញ បានប្រើប្រាស់រថយន្តចំនួន ០២គ្រឿង និងរថយន្តអគ្គីភ័យជំនួយរបស់កងរាជអាវុធហត្ថលើផ្ទៃប្រទេសចំនួន ០៣គ្រឿងទៀត ដើម្បីធ្វើអន្តរាគមពន្លត់បានទាន់ពេលដែលពុំបណ្តាលឲ្យរាលដាលដល់ផ្ទះជិតខាង ដោយប្រើប្រាស់អស់ទឹកចំនួន ០៥ឡាន ស្មើនឹង ២០ ម៉ែត្រគូប ទើបពន្លត់ឲ្យរលត់ទៅវិញទាំងស្រុង នៅវេលាម៉ោង១១ និង ០០នាទីព្រឹក ហើយអគ្គីភ័យខាងលើពុំបណ្តាលឲ្យមនុស្សបាត់បង់ជីវិតទេ ៕
ដោយ៖ អភិរក្ស