ភ្នំពេញ៖ តាមទិន្នន័យបឋមពីថ្ងៃទី១ខែ មេសា ដល់ថ្ងៃទី៥ខែមេសា គណៈកម្មការជាតិគ្រប់គ្រងគ្រោះ មហន្តរាយបានបង្ហាញថា ស្ថានភាពភ្លៀងកក់ខែ ខ្យល់បក់បោកខ្លាំង ផ្គររន្ទះ ដែលកើតមានបានបង្កផលប៉ះពាល់ដល់ចំនួន៩ខេត្ត អ្នករងរបួសចំនួន១២នាក់។ លោក កែវ វី អនុនាយកដ្ឋានព័ត៌មាននៃគណៈកម្មការជាតិគ្រប់គ្រងគ្រោះមហន្តរាយ បានមាន ប្រសាសន៍នៅថ្ងៃទី៧ ខែ មេសានេះថា ស្ថានភាពខ្យល់បក់បោកខ្លាំង បានធ្វើឲ្យប៉ះពាល់ ដល់ខេត្តចំនួន៩ខេត្ត មានខេត្តកំពង់ចាម ឧត្តរមានជ័យ ប៉ៃលិន បាត់ដំបង បន្ទាយមានជ័យ រតនៈគិរី ព្រៃវែង សៀមរាប និងខេត្តកំពត ។ ក្នុងនោះមាន ៤៦ឃុំសង្កាត់ និងស្រុកក្រុងចំនួន២៤។លោកបន្តថា ផ្ទះដែលរលំខូចខាតទាំងស្រុងមាន ១៧៨ខ្នង។ផ្ទះរបើក ដំបូលជញ្ចាំង ខូចខាតមធ្យមមាន៦៤២ខ្នង រលំរោងម៉ាស៊ីនកិនស្រូវមួយ បាក់បង្គោលអង់តែន ១ របើកដំបូលអគាររដ្ឋបាល៣អគារ ដំបូលសាលារៀន៣អគារ កុដិ លោក៤ខ្នង។ ក្នុងនោះ ស្រុកថ្មភក់ ខេត្តបន្ទាយមានជ័យ រលំបាក់ផ្ទាំងប្រាសាទបន្ទាយឆ្មារប្រវែង១៥ម៉ែត្រ កំពស់៣ ម៉ែត្រ២ ប៉ុន្តែមិនទាន់បញ្ហាអ្វីធំដុំឡើយ ដោយសារស្ថានភាព ប្រាសាទបន្ទាយឆ្មារ មានសភាព ទ្រុឌទ្រោមផងនោះ ។ ដោយឡែកលោកយាយចាស់ជរា អាយុជាង៦០ម្នាក់បាន ស្លាប់នៅ ពេលមានខ្យល់បោកបក់ខ្លាំង និងអ្នករងរបួសចំនួន ១២នាក់។ករណីអ្នកស្លាប់ ដោយសាររន្ទះ បាញ់ស្លាប់ មានក្មេងម្នាក់ផងដែរ។
.jpg)
លោក ចាន់ យុត្ថា នាយកខុទ្ទការល័យនិងជាអ្នកនាំពាក្យក្រសួងធនធានទឹកនិងឧត្តុនិយម បានមានប្រសាសន៍ថា ក្នុងរយៈពេលប៉ុន្មានថ្ងៃចុងក្រោយនេះ ជាពិសេសចាប់ពីថ្ងៃទី៣មក ស្ថានភាពទឹកភ្លៀងបានធ្លាក់មកក្នុងក្របខណ្ឌទូទៅប្រទេស ប៉ុន្តែរបាយទឹកភ្លៀងនោះ មិនបានស្មើគ្នាទេ កន្លែងខ្លះមានភ្លៀងតិច កន្លែងខ្លះមធ្យម និងកន្លែងខ្លះច្រើនរហូតដល់ជាង ១០០មីលីម៉ែត្រ នៅក្នុងស្រុកនិងខេត្តរាជធានីខ្លះ។លោកបន្តថា ចាប់ពីពេលនេះតទៅ ស្ថាន ភាពភ្លៀងកក់ខែ គឺមានធ្លាក់ជាបន្តបន្ទាប់ ប៉ុន្តែគ្រាន់តែពុំបានគ្របដណ្តប់ទៅលើផ្ទៃដីច្រើន ដូចនៅក្នុងរង្វង់ចាបពីថ្ងៃទី៣ ដល់ថ្ងៃទី៦ កន្លងមកនោះទេ។ប៉ុន្តែមិនមានន័យថាអស់ភ្លៀង ទាំងស្រុងនោះឡើយគឺនៅបន្តធ្លាក់ភ្លៀងរហូតដល់ចូលឆ្នាំខ្មែរ។លោកបញ្ជាក់ថា ភ្លៀងកក់ខែ ទាំងនេះ បានបង្កផលប៉ះពាល់ដល់ផលដំណាំ អាយុជីវិត ក៍ដូចជា ខូចខាតផ្ទះសំបែងផងដែរ ដូច្នេះសូមបងប្អូនប្រជាពលរដ្ឋទាំងអស់ ត្រូវមានការប្រុងប្រយ័ត្នខ្ពស់។ក្រសួងធនធានទឹក និងឧត្តុនិយម និងបន្តតាមដានជាប់ជាប្រចាំក្នុងករណីមានបាតុភូទាំងនេះ ដែលអាចនឹងកើតមានឡើង ក្រសួងនឹងធ្វើការជំរាបជូនដំណឹងជាបន្តបន្ទាប់៕
ដោយ៖ រតនា