ភ្នំពេញ: ធនាគារនីហរ័ណ-អាហរ័ណចិន បានផ្តល់កម្ចីសម្បទានចំនួន១២១លានដុល្លារអាមេរិក សម្រាប់គម្រោងអភិវឌ្ឍន៍ប្រព័ន្ធធារាសាស្ត្រ អាចាង នៅខេត្តកំពង់ឆ្នាំង និងគម្រោងសាងសង់ខ្សែបញ្ជូនអគ្គិសនី១១៥គីឡូវ៉ុល ពីភ្នំពេញទៅបាវិត។ការទទួលឥណទានសម្បទាននេះធ្វើឡើងក្នុងពិធីចុះហត្ថលេខាលើកិច្ចព្រមព្រៀងឥណទានសម្បទានមួយ រវាងលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនិងលោក Li Ruogu ប្រធានធនាគារនីហរ័ណ-អាហរ័ណចិននៅព្រឹកថ្ងៃទី១៦ខែតុលានេះ។លោក គាត ឈន់ ឧបនាយករដ្ឋមន្ត្រីប្រចាំការដែលបានចូលរួមធ្វើជាអធិបតីក្នុងពិធីនោះបានថ្លែងថា ទាំងកិច្ចព្រមព្រៀងឥណទានសម្បទាន និងកិច្ចព្រមព្រៀងសហប្រតិបត្តិការហិរញ្ញវត្ថុ សុទ្ធសឹងតែឆ្លុះបញ្ចាំងនៅក្នុងផែនការសកម្មភាពស្តីពីការអនុវត្តកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ហើយក៏ជាការឆ្លើយតបយ៉ាងពេញទំហឹងទៅនឹងគោលនយោបាយអភិវឌ្ឍន៍របស់រាជរដ្ឋាភិបាលកម្ពុជា ដូចដែលបានរំលេចក្នុងយុទ្ធសាស្ត្រចតុកោណដំណាក់កាលទី៣ ជាពិសេស ការកសាងហេដ្ឋារចនាសម្ព័ន្ធរូបវន្ត និងការអភិវឌ្ឍន៍កសិកម្ម ស្របតាមគោលនយោបាយពិពិធកម្មសេដ្ឋកិច្ចរបស់រដ្ឋាភិបាលកម្ពុជា ក្នុងការនាំចេញអង្គរអោយបាន១លានតោននៅឆ្នាំ២០១៥ខាងមុខ។
លោកបន្តថា អ្វីដែលរិតតែសំខាន់និងពិសេសជាងនេះទៀតនោះ គឺថា ហិរញ្ញប្បទានសហប្រតិបត្តិការរបស់មិត្តចិនមានប្រសិទ្ធិភាពខ្ពស់ និងឆ្លើយតបទាន់ពេលវេលា ព្រមទាំងបានធ្វើអោយព្រះរាជាណាចក្រកម្ពុជា ពង្រឹងនូវអធិបតេយ្យភាព និងមានឯករាជ្យភាពរបស់ខ្លួន។លោក Li Ruogu ប្រធានធនាគារនីហរ័ណ-អាហរ័ណចិនបានមានប្រសាសន៍ថា ឥឡូវនេះចិននិងកម្ពុជាកំពុងដើរលើផ្លូវភាពជាដៃគូយុទ្ធសាស្ត្រគ្រប់ជ្រុងជ្រោយ ដូច្នេះរដ្ឋាភិបាលចិននិងប្រជាជនចិនភ្លេចមិនបានទេចំពោះការគាំទ្រពីរដ្ឋាភិបាលកម្ពុជា និងសូមថ្លែងអំណរគុណដល់គុណបំណាច់របស់សម្តេចឱ នរោត្តម សីហនុ ផងដែរក្នុងការរក្សាទំនាក់ទំនងល្អជាមួយប្រទេសចិន ។
គួរបញ្ជាក់ថា មកដល់ពេលនេះ សាធារណរដ្ឋប្រជាមានិតចិនបានសម្រេចផ្តល់ហិរញ្ញប្បទានសហប្រតិបត្តិការសរុបប្រមាណ២៨៥៦លានដុល្លារអាមេរិកហើយ សម្រាប់អនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធរូបវន្តនានានៅកម្ពុជា ដូចជា ផ្លូវ ស្ពាន ធារាសាស្ត្រ កំពង់ផែ និងអគ្គសនី៕ ដោយ៖ រតនា