ភ្នំពេញ៖ ក្រុមហ៊ុនធានារ៉ាប់រងរដ្ឋកាមិនកូ បានកើនទុនហៅថា បុព្វលាភរ៉ាប់រងដល់ទៅ៤២លានដុល្លារក្នុងឆ្នាំ២០១៣ បើគិត ជាភាគរយស្មើនឹង១៥ភាគរយ។បុព្វលាភនេះ គិតចាប់ពីឆ្នាំ២០០២ដែលមានទុនតែ៤លានដុល្លារអាមេរិកតែប៉ុណ្ណោះរបាយការណ៍របស់ក្រុមហ៊ុនធានារ៉ាប់រងកម្ពុជា កាមិនកូ បង្ហាញថា ការធានារ៉ាប់រងលើយានយន្តមានចំនួន ជាង៧លានដុល្លារអាមេរិក ធានារ៉ាប់រងលើអគ្គិភ័យចំនួន ១៣លានដុល្លារអាមេរិក ធានារ៉ាប់រងលើវិស្វកម្មចំនួន៤លានដុល្លារអាមេរិក ធានារ៉ាប់រងលើសុខភាពចំនួន៥លានដុល្លារអាមេរិក និងធានរ៉ាប់រងលើគ្រោះថ្នាក់ផ្សេងៗបាន៧លានដុល្លារអាមេរិក។
ក្នុងពិធីចុះហត្ថលេខាជាមួយវិទ្យាស្ថានបណ្តុះបណ្តាលធានារ៉ាប់រងម៉ាឡេស៊ី នៅព្រឹកថ្ងៃពុធនេះ លោក ឆាយ រតនៈ ប្រធានសមាគមធានារ៉ាប់រងកម្ពុជាថ្លែងថា វិស័យធានារ៉ាប់រង បានដើរតួយ៉ាងសំខាន់ក្នុងប្រព័ន្ធហិរញ្ញវត្ថុ និងរួមចំណែកយ៉ាងធំធេងក្នុងដំណើរការអភិវឌ្ឍន៍សេដ្ឋកិច្ច និងជួយដល់សុវត្ថិភាពសង្គម ជាពិសេសសុវត្ថិភាពផ្នែកអគ្គិសនីឆាបឆេះរោងចក្រ អគារធ្វើការ ផ្ទះសម្បែង សុខភាព និងចរាចរផ្លូវគោក ព្រមទាំងធានារ៉ាប់រងអាយុជីវិតផងដែរ។ជាមួយគ្នានេះ លោក បានលើកឡើងថា ការទាមទារសំណងក៏មានការកើនឡើងផងដែរ គឺរហូតដល់ទៅជាង១៤លានដុល្លារអាមេរិកក្នុងឆ្នាំ២០១៣ គឺកើនជាង៦៧ភាគរយ ប្រៀបធៀបឆ្នាំ២០១២។
លោកបន្ថែមថា ដោយមើលឃើញ កត្តាធនធានមនុស្សជារឿងចាំបាច់ លើវិស័យធានារ៉ាប់រងនៅកម្ពុជា ទើបសមាជិកនៃសមាគមធានារ៉ាប់រងកម្ពុជា បានប្រជុំពិភាក្សា និងឯកភាពគ្នាក្នុងការបង្កើតវគ្គបណ្តុះបណ្តាល វិស័យធានារ៉ាប់រងនៅកម្ពុជាដោយសហការជាមួយវិទ្យាស្ថានធានារ៉ាប់រងម៉ាឡេស៊ី។
លោក បានធ្វើការកត់សម្គាល់ថា ប្រទេសកម្ពុជាពុំទាន់មានសាកលវិទ្យាល័យ ឬវិទ្យាស្ថានណាមួយបានបណ្តុះបណ្តាលវិស័យធានារ៉ាប់រងនេះនៅឡើយទេ កន្លងមកកម្ពុជាធ្លាប់ទទួលបានការបណ្តុះបណ្តាលធនធានមនុស្សលើវិស័យធានារ៉ាប់រង ពីសាលាបង្រៀនធានារ៉ាប់រងរបស់ប្រទេសជប៉ុន (Insurance School of Japan” SIS” ) , សាលា Asean Insurance Training and Research Institute និងសាកលវិទ្យាល័ យនីតិសាស្ត្រ និង សេដ្ឋកិច្ច៕ ដោយ៖ រតនា