ភ្នំពេញៈ អូស្ត្រាលីបានផ្ដល់ជំនួយជិត ៦០០ លានដុល្លារអាមេរិកមកឲ្យប្រទេសកម្ពុជា សម្រាប់ការកាត់បន្ថយភាពក្រីក្រ តាម រយៈការអភិវឌ្ឍសេដ្ឋកិច្ច ប្រកបដោយចីរភាព ហើយជំនួយអូស្ត្រាលីគឺផ្ដោតទៅលើវិស័យសុខាភិបាល និង អប់រំ និងទៅលើការលើកកម្ពស់ផ្នែកហេដ្ឋារចនាសម្ព័ន្ធតភ្ជាប់ ការដឹកជញ្ជូនផលិតផលកសិកម្មមកកាន់ទីផ្សារផងដែរ។
.jpg)
ថ្លែងក្នុងជំនួបជាមួយលោក ហោ ណាំហុង រដ្ឋមន្ត្រីក្រសួងការបរទេសកម្ពុជា លោកស្រី Julie Bishop រដ្ឋមន្ត្រីការបរទេសអូស្ត្រាលី កាលពីថ្ងៃទី២២ ខែកុម្ភៈ លោកស្រីបាននិយាយថា ប្រទេសអូស្ត្រាលី គឺជាអ្នកគាំទ្រដល់ការអភិវឌ្ឍសេដ្ឋកិច្ចសង្គមនៅកម្ពុជា ហើយចាប់តាំងពីឆ្នាំ ១៩៩៤ មក អូស្ត្រាលីបានផ្ដល់ជំនួយជាង ៩០ លានដុល្លារអាមេរិក សម្រាប់កម្មវិធីបោស សម្អាតមីនក្នុងប្រទេសកម្ពុជានៅ ក្នុងគោលដៅ រក្សាសុវត្ថិភាពរបស់ប្រជាជន និងប្រែក្លាយផ្ទៃដីនោះទៅជាដីបង្កបង្កើនផល និងរកប្រភពចំណូលផ្សេងទៀត ។
លោកស្រីបានបន្តថាលោកស្រីបានកត់សម្គាល់នូវកំណើនសេដ្ឋកិច្ចរបស់ប្រទេសកម្ពុជាដែលបានព្យាករណ៍ថា នឹងមានកំណើន ៧,២ ភាគរយនៅក្នុង ឆ្នាំ ២០១៤នេះ ហើយក្នុងដំណើរទស្សនកិច្ចនេះ លោកស្រីនឹងជួបជាមួយធុរជនអូស្ត្រាលីនៅកម្ពុជា ដើម្បីពិភាក្សានូវឱកាសពង្រីក ទំនាក់ទំនងពាណិជ្ជកម្ម និងធុរកិច្ចនេះ។លោកស្រីក៏បានឲ្យដឹងផងដែរថា ប្រជាជនដែល មានដើមកំណើតកម្ពុជា និងគ្រួសាររបស់គេនៅអូស្ត្រាលីគឺមានចំនួន ២៨ ០០០នាក់ ដោយបានចូលរួមចំណែកនៅក្នុងកំណើន សេដ្ឋកិច្ចរបស់អូស្ត្រាលី ។ ហើយប្រជាជនអូស្ត្រាលី មានចំណាប់អារម្មណ៍ជាខ្លាំងទៅនឹងប្រវត្តិសាស្ត្រ ក៏ដូចជាវប្បធម៌ និងសោភ័ណ្ឌភាពរបស់ប្រទេសកម្ពុជា ដែលកាលពីក្នុងឆ្នាំ២០១៣កន្លងទៅ មានភ្ញៀវទេសចរអូស្ត្រាលីចំនួន ១២ ម៉ឺននាក់បានមកទស្សនានៅប្រទេសកម្ពុជា។
លោក ហោ ណាំហុង ក៏បានបញ្ជាក់ពីស្ថានភាពនយោបាយនៅក្នុងប្រទេស ប្រាប់ទៅលោកស្រីរដ្ឋមន្ត្រីការបរទេសអូស្ត្រាលីផងដែរថា អ្វីៗដែលរាជរដ្ឋាភិបាលកម្ពុជាបានធ្វើកន្លងមក និងកំពុងធ្វើនាពេលបច្ចុប្បន្ន ហើយនឹងធ្វើទៅថ្ងៃខាងមុខ គឺសមស្របទៅតាមច្បាប់រដ្ឋធម្មនុញ្ញកម្ពុជាទាំងអស់អត់មានការជាប់គាំងនយោបាយអ្វីទេនៅកម្ពុជានោះ គ្រប់ស្ថាប័នទាំងអស់ដំណើរការជាធម្មតា ។
សូមបញ្ជាក់ផងដែរថា ដំណើទស្សនកិច្ចរបស់លោកស្រី Julie Bishop នាពេលនេះគឺជាផ្នែកមួយ នៃ ដំណើរទស្សនកិច្ចមកកាន់ប្រទេស ៤ នៅអាស៊ី ក្នុងឆ្នាំនៃការប្រារព្ធទំនាក់ទំនងខួបលើកទី៤០ រវាងអូស្ត្រាលីនិងអាស៊ាន ហើយដែលការប្រារព្ធខួប នេះនឹងធ្វើនៅប្រទេសមីយ៉ាន់ម៉ា ក្នុងខែវិច្ឆិកាឆ្នាំ ២០១៤ខាងមុខនេះ៕ ដោយ៖ ភីន រ៉ា