ភ្នំពេញ: មន្ត្រីក្រសួងការបរទេសកម្ពុជាអះអាងថា រដ្ឋាភិបាលកម្ពុជាមិនទាន់បានទទួលព័ត៌មានផ្លូវការ ស្តីពីការពន្យាពេលប្រកាសសេចក្តីសម្រេចស្ថាពរលើរឿងក្តីប្រាសាទព្រះវិហារ ពីតុលាការយុត្តិធម៌
អន្តរជាតិ ICJនៅឡើយទេ ។
លោក កុយ កួង អ្នកនាំពាក្យក្រសួងការបរទេស បានអោយដឹង តាមទូរស័ព្ទនៅ ថ្ងៃទី១២ខែតុលានេះថា សារព័ត៌មានថៃបានចុះផ្សាយស្តីពីការពន្យាពេលប្រកាសសេចក្តីសម្រេចជាស្ថាពរលើករណីប្រាសាទព្រះ វិហារ ។
ប៉ុន្តែភាគីកម្ពុជាមិនទាន់បានទទួលព័ត៌មាននេះជាផ្លូវការទេ។សារព័ត៌មានថៃ The Nation បានរាយការណ៍កាលពីថ្ងៃទី១១ខែតុលាដោយដកស្រង់សម្តី លោក Surapong Tovichakchaikulរដ្ឋមន្ត្រីការបរទេសថៃថា ការប្រកាសសេចក្តីសម្រេចជាស្ថាពរលើករណីប្រាសាទព្រះវិហារ ដែលភាគីកម្ពុជានិងថៃ កំពុងមានជម្លោះនឹងត្រូវពន្យារដល់ទៅឆ្នាំ២០១៤។លោក បានបន្តថា ការប្រកាសសេចក្តីសម្រេច អាចនឹងត្រូវបានធ្វើឡើងនៅខែកុម្ភៈឆ្នាំក្រោយ ដោយហេតុផលថា ចៅក្រមតុលាការអន្តរជាតិទីក្រុងឡាអេ (ICJ) រវល់នឹងសំណុំរឿងផ្សេងៗទៀត ។
ដោយឡែកមន្ត្រីផ្នែកទំនាក់ទំនងរបស់ICJ លោក Boris Heim ប្រាប់សារព័ត៌មានក្នុងស្រុកតាមរយៈអ៊ីម៉េល កាលពីថ្ងៃទី០៩ខែតុលាថា តុលាការ មិនទាន់សម្រេចពេលវេលាជាក់លាក់នៃការប្រកាសសេចក្តីសម្រេចនៅខែណានៅឡើយទេ។លោកបញ្ជាក់ថា ការប្រកាសសេចក្តីសម្រេចជាស្ថាពរ អាចធ្វើឡើងក្នុងរយៈពេល៤ទៅ៦ខែ បន្ទាប់ពីបញ្ចប់ដំណើរការសាកសួរផ្ទាល់មាត់លើករណីនេះ ។ គួរបញ្ជាក់ថា ភាគីកម្ពុជា និងថៃ បានតទល់គ្នាក្នុងសវនាការរបស់តុលាការយុត្តិធម៌អន្តរជាតិកាលពីថ្ងៃទី១៥ ដល់ថ្ងៃទី១៩ខែមេសា ឆ្នាំ២០១៣លើសំណុំរឿងដីទំហំ៤.៦ គីឡូម៉ែត្រក្រឡាក្បែរប្រាសាទព្រះវិហារ ហើយគ្រោងនឹងប្រកាសសេចក្តី សម្រេចនៅចុងខែតុលា ឆ្នាំ២០១៣នេះ ៕ ដោយ៖ រតនា