ភ្នំពេញៈ នាយកខុទ្ទកាល័យក្រសួងធនធានទឹក និងឧតុនិយម លោក ចាន់ យុត្ថា បានប្រាប់អ្នកយកព័ត៌មានតាមរយៈទូរស័ព្ទនៅព្រឹកថ្ងៃទី៤ កុម្ភៈនេះថា ស្ថានភាពអ័ព្ទយ៉ាងក្រាស់នាពេលព្រឹកព្រលឹម និងពេលល្ងាច ដែលបានកើតមានប៉ុន្មានថ្ងៃជាប់គ្នាមកនេះ គឺដោយសារនៅក្នុងបរិយាកាសមានសំណើមខ្ពស់ និងស្ងប់ខ្យល់ ។
លោកបន្តទៀតថា នៅពេលព្រឹក និងពេលល្ងាចមានអាកាសធាតុត្រជាក់អ័ព្ទបាន កើតឡើងយ៉ាងក្រាស់ តែវារលាយទៅវិញនៅពេលមានកម្តៅថ្ងៃខ្លាំង ។ អ័ព្ទដ៏ក្រាស់បានកើតមាននៅទូទាំងប្រទេស ជាពិសេសនៅតំបន់មានប្រភពទឹកនិងព្រៃឈើច្រើន ប៉ុន្តែអ័ព្ទដ៏ក្រាស់នេះវាមិនអាចក្លាយទៅជាពពក ភ្លៀងទេ ហើយវានឹងថយចុះឥទ្ធិពលទៅវិញក្នុងរយៈពេលមួយសប្តាហ៍ទៀត ដែលបាតុភូតនេះវាបានកើតមានបន្ទាប់ពីអាកាសធាតុដ៏ត្រជាក់ទើបបានកន្លងផុតទៅ។
ជាមួយនេះដែរ លោក ចាន់ យុត្ថា បានបញ្ជាក់ថា អាកាសធាតុក្នុងរដូវប្រាំងនេះមិនក្តៅខ្លាំងទេ ដោយសីតុណ្ហភាពអាចស្ថិតនៅក្នុងរង្វង់៣៧ អង្សាសេ លើកលែងតែនៅតំបន់ទំនាបកណ្តាលភាគពាយព្យ និងខ្ពង់រាបភាគឦសាន ដែលសីតុណ្ហភាពអាចឡើងដល់កម្រិត ៣៩ អង្សាសេ រយៈ ពេលពីពីរទៅបីថ្ងៃនៅក្នុងខែមេសា ហើយក្រសួងកំពុងតែបន្តធ្វើការតាមដានយ៉ាងយកចិត្តទុកដាក់ចំពោះស្ថានភាពអាកាសធាតុក្នុងរដូវប្រាំងនេះ៕
ដោយៈ ភីនរ៉ា