ភ្នំពេញ៖ អ្នកស្រី ដួង ច័ន្ទធីតា ប្រធានផ្នែកយុទ្ធនាការនិងការតស៊ូមតិថ្នាក់មូលដ្ឋាន នៃយុទ្ធនាការលើកកម្ពស់សុខភាពកុមារឥឡូវនេះរបស់អង្គការទស្សនៈពិភពលោកបានអះអាងកាលពីថ្ងៃចន្ទ័ថា យ៉ាងហោចកុមារប្រមាណ៣៥ភាគរយ បានស្លាប់ក្នុងឆ្នាំ២០១០ ដោយមូលហេតុចម្បងបំផុត គឺបណ្តាលមកពីកង្វះអាហារូបត្ថម្ភ ប៉ុន្តែក្នុងឆ្នាំ២០១៣នេះ ក្រុមអ្នកជំនាញផ្នែកសុខភាពបានធ្វើការប៉ាន់ប្រមាណថា ចំនួនកុមារដែលបានស្លាប់បណ្តាលពីកង្វះអាហារូបត្ថម្ភមានប្រមាណ៤៥ភាគរយ ក្នុងចំណោម៤០ភាគរយនៃកុមារកំពុងជួបប្រទះនឹងកង្វះអាហារូបត្ថម្ភ។ អ្នកស្រីបន្តថា បញ្ហាកង្វះអាហារូបត្ថម្ភកុមារនៅប្រទេសកម្ពុជា គឺត្រូវទាមទារឲ្យមានការចូលរួមដោះស្រាយទាំងអស់គ្នា ព្រោះវាមិនមែនជារឿងបុគ្គលតែម្នាក់ឡើយ។
.jpg)
អ្នកស្រី ដួង ច័ន្ទធីតា បានបន្ថែមថា អ្នកស្រីបញ្ជាក់ដែរា បញ្ហាកង្វះអាហារូបត្ថម្ភគឺបណ្តាលមកពីការទទួលទានអាហារមិនគ្រប់គ្រាន់ឬខ្វះជីវជាតិ ហើយដើម្បីចៀសវាងការប្រឈមបញ្ហានេះ កុមារត្រូវទទួលបាននូវសេវាថែទាំសុខភាពចម្បង ដូចជា ការចាក់វ៉ាក់សាំង និងសេវាពិនិត្យជំងឺងាយស្រួល ជាពិសេស ត្រូវមានការប្រើប្រាស់ទឹកស្អាតនិងអនាម័យ ដើម្បីការពារជំងឺឆ្លងផ្សេងៗ។ អ្នកស្រីបញ្ជាក់ថា ផលប៉ះពាល់នៃការខ្វះអាហារូបត្ថម្ភអាចបណ្តាលឲ្យកុមារស្លាប់នៅក្នុងមូលហេតុដែលអាចបង្កាបានធ្វើឲ្យកុមារពិការខួរក្បាលអចិន្ត្រៃយ៍ ពិការរាងកាយជាអចិន្ត្រៃយ៍ ឆាប់មានជំងឺ អាចប៉ះពាល់ដល់សតិបញ្ញាក្មេងចុះខ្សោយ និងងាយទទួលរងជំងឺឆ្លងពេញមួយជីវិតផងដែរ។
បើតាមរបាយការណ៍របស់អង្គការទស្សនៈពិភពលោក (World Vision) ប្រចាំនៅកម្ពុជាឲ្យដឹងថា បញ្ហាកង្វះអាហារូបត្ថម្ភគឺជាមូលហេតុនាំឲ្យកុមារ១ភាគ៣នៃកុមារក្នុងពិភពលោកត្រូវស្លាប់ ព្រោះតែរងគ្រោះដែលបណ្តាលពីការងាយឆ្លងជំងឺនានា។ ក្នុងនេះដែរ សម្រាប់ប្រទេសកម្ពុជា កុមារ៤០ភាគរយនៃកុមារក្រោមវ័យ៥ឆ្នាំ មានភាពក្រេះក្រិន ដែលអត្រាកុមារក្រេះក្រិនមិនមានការថយចុះឡើយ ចាប់តាំងពីឆ្នាំ២០០៥មក។ ជំងឺក្រេះក្រិន ក្នុងរបាយការណ៍នេះរកឃើញដែរថា មានកើតឡើងនៅជនបទ ៤២,២ភាគរយ ច្រើនជាងនៅទីក្រុង ដែលមានត្រឹមតែ ២៧,៥ភាគរយ។
កញ្ញា តិត ចាន់ មន្ត្រីសម្របសម្រួលផ្នែកផ្សព្វផ្សាយនិងចលនាយុវជនកម្មវិធីតស៊ូមតិនៃអង្គការ World Vision បានឲ្យដឹងថា ការផ្តល់អាហារូបត្ថម្ភដែលល្អបំផុត គឺត្រូវចាប់ផ្តើមក្នុងរយៈពេល១ពាន់ថ្ងៃដំបូង សម្រាប់ស្រ្តីមានផ្ទៃពោះ។ កញ្ញាបន្តថា ស្រ្តីមានផ្ទៃពោះអាចនឹងទទួលបានអាហារូបត្ថម្ភ ដែលសមស្របសម្រាប់កូនៗ ទៅតាមការណែនាំរបស់គ្រូពេទ្យមិនត្រឹមតែប៉ុណ្ណោះ ស្រ្តីមានផ្ទៃពោះអាចនឹងទទួលនូវការចាក់ថ្នាំបង្ការផ្សេងៗទៀត ដើម្បីជួយឲ្យទារកនៅក្នុងផ្ទៃមានសុខភាពល្អជៀសវាងនូវជំងឺឆ្លងផ្សេងដែរ។ កញ្ញាថា៖«យើងកំពុងតែមមាញឹកនៅក្នុងកម្មវិធីយុទ្ធនាការលើកកម្ពស់សុខភាពកុមារ ឥឡូវនេះ ដើម្បីធ្វើយ៉ាងណាចូលរួមចំណែកជួយស្តារនិងយកចិត្តទុកដាក់ទៅលើបញ្ហារូបត្ថម្ភរបស់កុមារផងដែរ»។
.jpg)
ដោយ៖ អភិរក្ស