ភ្នំពេញ៖ មជ្ឈមណ្ឌលជាតិកំចាត់រោគរបេងនិងជំងឺហង់សិនឬឃ្លង់គ្រោងនឹងលប់បំបាត់ឲ្យបានទាំងស្រុងនាពេលអនាគតនៅទូទាំងប្រទេស ព្រោះថាគោលដៅមួយចំនួន លែងជាបញ្ហាចោទលើសុខភាពសារធាណៈទៀតហើយ ព្រោះនៅឆ្នាំ២០១២ អត្រាប្រេវ៉ាឡង់មានកំរិតត្រឹមតែ០.២៥ករណីលើប្រជាជន១០.០០០នាក់តែប៉ុណ្ណោះ។នេះជាការលើកឡើងរបស់លោកវេជ្ជ.ម៉ៅ តាន់អ៊ាង នាយកមជ្ឈមណ្ឌលជាតិកំចាត់ រោគ របេង និងហង់សិនកាលពីថ្ងៃទី៦ខែធ្នូឆ្នំា២០១៣នៅក្នុងសិក្ខាសាលាក្តីពី ការលើកកម្ពស់ ផែនការកម្មវិធីលុបបំបាត់ជំងឺហង់សិនឬឃ្លង់ របស់មជ្ឈមណ្ឌលជាតិកំចាត់រោងរបេង និងហង់សិន។
លោកសាស្ត្រចារ្យ អេង ហួត រដ្ឋលេខាធិការក្រសួងសុខាភិបាលបានលើកឡើងថា បច្ចុប្បន្នអ្នកផ្ទុកមេរោគហង់សិន ឬឃ្លង់មានភាគរយតិចតួចក្តីក៏ក្រសួងសុខាភិបាលកំពុងយកចិត្តទុកដាក់ក្នុងការព្យាបាល និងឈានដល់លុបបំបាត់ទំាងស្រុងនៅថ្ងៃអនាគត់ ។លោកសាស្ត្រាចារ្យ អេង ហូត លើកឡើងបន្តថា បច្ចុប្បន្ននេះរាជរដ្ឋាភិបាល ក៏ដូចជាក្រសួងសុខាភិបាលកំពុងរកយុទ្ធសាស្ត្រជាក់លាក់មួយក្នុងការលុបបំបាត់ជំងឺហង់សិនឲ្យមានប្រសិទ្ធិភាពពិសេសលុបបំបាត់ទំាងស្រុងនៃកាកើតជំងឺហង់សិន និងព្យាបាលឲ្យអ្នកជំងឺដែលកំពុងផ្ទុកឲ្យជាដាច់និងលែងមានតទៅទៀត។លោក បន្តទៀតថា ពីមុនមកជំងឺឃ្លង់ឬហង់សិន គឺជាជំងឺមួយដែលព្យាបាលមិនជា ហើយអ្នកជំងឺរស់នៅដោយមានការឈឺចាប់ព្រមទាំងក្រុមគ្រូសាររងទុក្ខលំបាកដោយគ្មានក្តីសង្ឃឹមថានឹងព្យាបាលជាហើយអាចរស់រៀនមានជីវិតបានតទៅទៀតនោះ។ ប៉ុន្តែសព្វថ្ងៃនេះការធ្វើរោគវិនិច្ឆ័យនិងការព្យាបាលជំងឺហង់សិននេះ ពិតជាអាចព្យាបាលជាសះស្បើយនិងមិនគិតថ្លៃ ព្រមទាំងមានសេវានៅតាមមណ្ឌសុខភាពគ្រប់ខេត្តទូទាំងប្រទេសទៀតផង។
ជាមួយគ្នានេះកម្មវិធីជាតិកំចាត់រោគហង់សិន នៃក្រសួងសុខាភិបាល បានសម្រេចគោលដៅ នៃការកាត់បន្ថយជំងឺហង់សិនលែងជាបញ្ហាសុខភាពសារធាណៈនៅចុងឆ្នាំ១៩៩៨(អត្រាប្រេវ៉ាឡងតិចជាងមួយករណី ក្នុងចំណោមប្រជាជន១០.០០០នាក់) ។ ចាប់ពីពេលនោះមកអត្រាប្រេវ៉ាឡង់បានធ្លាក់ចុះជាបន្តបន្ទាប់ ដែលអត្រានោះមានកំរិត០.២៥ករណីលើប្រជាជន១០.០០០នាក់ ក្នុងឆ្នាំ២០១២កន្លងមក។
លោកវេជ្ជបណ្ឌិត ម៉ៅ តាន់អ៊ាង នាយកមជ្ឈមណ្ឌលជាតិកំចាត់រោគរបេង និង ហង់សិន មានប្រសាសន៍ថា បន្ទាប់ក្រសូងសុខាភិបាលដាក់វិធានមក អាត្រាប្រេវ៉ាឡង់នៃជំងឺឃ្លង់បានចុះថយច្រើន ព្រោះនៅប្រទេសកម្ពុជាបានដាក់គោលដៅច្បាស់លាស់ចាប់ពីឆ្នាំ១៩៩៨មកក្នុងការលុបបំបាត់ជំងឺហង់សិនឬឃ្លង់នេះ ធ្វើឲ្យអាត្រាអ្នកកើតជំងឺបានចុះថយ ជាបន្តបន្ទាប់ ជាក់ស្តែង តាមការរកឃើញអាត្រាអ្នកផ្ទុកជំងឺនេះនៅសល់០.២៥ករណី ក្នុងចំណោម១០.០០០នាក់ (១៩៩៨) ស្របតាមគោលដៅ របស់អង្គការសុខភាពពិភពលោកគឺធ្វើយ៉ាងណាឲ្យអ្នកផ្ទុកមេរោគហង់សិនតិចជាង១នាក់ក្នុងចំណោមមនុស្ស១០.០០០នាក់។
បើទោះជាយ៉ាងនេះក្តី លោក វេជ្ជបណ្ឌិត សម្តែងនូវក្តីព្រួយបារម្មណ៍ចំពោះការលុបបំបាត់ទំាងស្រុងនេះ ព្រោះថាជំងឺហង់សិនជាជំងឺមួយប្រភេទដែលមានលក្ខណៈរ៉ាំរ៉ៃ ប៉ុន្តែយ៉ាងណាមជ្ឈមណ្ឌលមានជំនឿថានឹងអាចលុបបំបាត់យ៉ាងមានប្រសិទ្ធភាព។ ក្នុងរយៈពេល៤, ៥ ឆ្នាំមកនេះអ្នកកើតជំងឺហង់សិនថ្មី យើងបានរកឃើញមានចន្លោះ៣៥០ទៅ៤០០ករណីតែប៉ុណ្ណោះ ។នៅក្នុងឆ្នាំ២០១២កន្លងមកយើងបានរកឃើញអ្នកកើតជំងឺហង់សិនថ្មីបានជាង៤០០ករណី ដែលជាទូទៅការស្រាវជ្រាវបង្ហាញថាជំងឺនេះមានការថយចុះគួរឲ្យកត់សំគាល់។ ថ្មីៗនេះមជ្ឈមណ្ឌលបានប្រើប្រាស់យុទ្ធសាស្ត្រសកម្ម តាមដានអ្នកដែលរស់នៅជាមួយអ្នកជំងឺ (ហង់សិន ឬឃ្លង់) ២,៣ ឆ្នាំ ទៅមុខទៀតយើងនឹងបង្កើន សកម្មភាពស្រាវជ្រាវស្វែងរកទៅតាម សហគមតាមមជ្ឈមណ្ឌលសុខភាព តាមបណ្តាខេត្តនានា បន្ត។
លោក វេជ្ជបណ្ឌិតបញ្ជាក់ថា ជំងឺហង់សិន ឬឃ្លង់ភាគច្រើនកើតនៅតាមបណ្តាខេត្តមួយចំនួនដូចជា ខេត្តបាត់ដំបង រតនៈគិរី កំពង់ចាម ដែលជាចំណុចក្តៅ ។ ប្រសិនបើកើតជំងឺឃ្លង់មិនបានព្យាបាលនោះទេ ធ្វើឲ្យអ្នកផ្ទុកពិការ ប៉ុន្តែបច្ចុប្បន្ននេះកម្ពុជាមានសមត្ថភាពគ្រប់គ្រាន់ក្នុងការព្យាបាលបានទាន់ពេលវេលាសម្រាប់ជំងឺហង់សិនឬឃ្លង់ ជាដាច់មួយរយភាពរយ។ ចំពោះអ្នកពិការដោយសារមេរោគនេះយើង មានកម្មវិធីស្តារលទ្ធភាពពលកម្មគាត់ឡើងវិញទៀតផង។
សូមបញ្ជាក់ថា ពិការភាពដោយសារជំងឺហង់សិន ឬ ឃ្លង់បានថយចុះច្រើនដោយសារការពង្រីកនិងបង្កើនសេវាកម្មថ្មីច្រើនជាងមុន ដូចជាការវះកាត់ ការបន្ថែមលទ្ធភាពពលកម្ម ដាក់ជើងសិប្បនិមត្តជូនពួគាត់ជាដើម៕
ដោយ៖ ស.ស្អាត