ភ្នំពេញ: ក្នុងខែកញ្ញាឆ្នាំ២០១៣ អគ្គនាយកដ្ឋានពន្ធដារប្រមូលពន្ធបង់ចូលថវិកាជាតិបានចំនួនជាង២៨៦ពាន់លានរៀល។ តួលេខនេះបង្ហាញពីការកើនឡើងដើម្បីសម្រេចគោលដៅកំណត់ក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១៣ ។ យោងតាមរបាយការណ៍សង្ខេបអំពីចំណូលក្នុងខែកញ្ញាក្នុងឆ្នាំ២០១៣នេះ អគ្គនាយកដ្ឋានពន្ធដារ បានប្រមូលនិងបង់ប្រាក់ពន្ធចូលជាតិបានចំនួន២៨៦,៩០០លានរៀល(គិតជាដុល្លារប្រមាណ៧១.៨លានដុល្លារ) ដោយមានការកើនឡើងជាងខែសីហាឆ្នាំ២០១៣ ចំនួន៩,៩២៩លានរៀល។បើប្រៀបធៀបទៅនឹងខែកញ្ញាដូចគ្នាក្នុងឆ្នាំ២០១២ មានការកើនឡើងស្មើនឹង២១.២ភាគរយ។ 
សរុបរយៈពេលប្រាំបួនខែក្នុងឆ្នាំ២០១៣ ចំណូលពន្ធអាករសរុបមានចំនួន២,៧១២,២៣៩លានរៀល (គិតជាដុល្លារប្រមាណ៦៧៨.១លានដុល្លារ)ស្មើនឹង៧៨.៣ភាគរយនៃគោលដៅកំណត់ក្នុងច្បាប់ហិរញ្ញ
វត្ថុសម្រាប់ឆ្នាំ២០១៣ ក្នុងនោះថវិការដ្ឋសម្រេចបានចំនួនស្មើនឹង៧៥.៩ភាគរយនិងថវិការាជធានីខេត្ត សម្រេចបានចំនួនស្មើនឹង៩៦.៤ភាគរយ ។បើប្រៀបធៀបនឹងការអនុវត្តន៍បានរយៈពេល ៩ខែដូចគ្នាក្នុង
ឆ្នាំ២០១២ ឃើញថា ក្នុងឆ្នាំ២០១៣នេះមានការកើនឡើង ចំនួនស្មើនឹងអត្រាកំណើន១៧,៣ភាគរយ ។
តាមការវិភាគប្រភេទពន្ធឃើញថា ចំណូលក្នុងឆ្នាំ២០១៣ មានការកើនឡើងគ្រប់ប្រភេទពន្ធក្នុងនោះប្រភេទពន្ធសំខាន់ៗមានការកើនឡើងដូចជាពន្ធលើប្រាក់បៀវត្សមានការកើនឡើងប្រមាណ២៤.៤ភាគរយ ពន្ធលើប្រាក់ចំណេញមានការកើនឡើងប្រមាណ១៩.៥ ភាគរយ អាករលើតម្លៃបន្ថែមមានការកើនឡើងប្រមាណ១៨.១ភាគរយ និងអាករពិសេសមានការកើនឡើងប្រមាណ១៦.១ភាគរយ ។
ការពិនិត្យតាមវិស័យឃើញថា ចំណូលក្នុងឆ្នាំ២០១៣មានការកើនឡើងស្ទើរគ្រប់សកម្មភាពក្នុងនោះផ្នែកសេវាហិរញ្ញវត្ថុកើនឡើងប្រមាណ២៧.៥ភាគរយ ផ្នែកផលិតភេសជ្ជៈកើនឡើងប្រមាណ២១.៩ភាគរយ ផ្នែកផលិតគ្រឿងប្រើប្រាស់កើនឡើងប្រមាណ ៣៤.៦ភាគរយ ផ្នែកទូរគមនាគមន៍កើនឡើងប្រមាណ១៨.៦ភាគរយ ផ្នែកនីហរ័ណអាហរ័ណកើនឡើងប្រមាណ២២.២ភាគរយ ផ្នែកស្ថាបត្យកម្មនិងសំណង់កើនឡើងប្រមាណ២២.១ភាគរយ ផ្នែកដឹកជញ្ជូននិងទេសចរណ៍កើនឡើងប្រមាណ៣៤.៨ភាគរយ ។
ក្រៅពីនោះពន្ធលើផ្នែកផ្សេងទៀតក៏មានការកើនឡើងផងដែរ ។ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានវាយតម្លៃខ្ពស់និងផ្តល់អនុសាសន៍ណែនាំបន្ថែមទៀតដល់អស់លោកជាប្រធានអង្គភាពពន្ធដារ និងបានជំរុញអោយប្រធានអង្គភាពគ្រប់លំដាប់ថ្នាក់ពង្រឹងការអនុវត្តច្បាប់ គោរពវិន័យការងារនិងក្រមសីលធម៌មន្រ្តីពន្ធដារអោយបានល្អប្រសើរថែមទៀត តាមរយៈការផ្តល់សេវាអ្នកជាប់ពន្ធប្រកបដោយប្រសិទ្ធិភាព និងមានភាពទន់ភ្លន់ ធ្វើយ៉ាងណាអោយអ្នកជាប់ពន្ធរីករាយក្នុងកិច្ចសហការបង់ពន្ធជូនរដ្ឋ ៕ ដោយ៖ រតនា