ភ្នំពេញ:ដើម្បីបង្កើតច្បាប់ស្តីពីការត្រួតពិនិត្យគ្រឿងស្រវឹងអោយមានប្រសិទ្ធិភាពក្នុងការកាត់បន្ថយបន្ទុកលើបញ្ហាសង្គម ដែលបង្កឡើងដោយគ្រឿងស្រវឹង ដូចជា គ្រោះថ្នាក់ចរាចរ អំពើហិង្សា ច្បាប់នោះនឹងដាក់បញ្ចូលនូវវិធានការ៤ចំណុច។ថ្លែងកិច្ចប្រជុំពិគ្រោះយោបាល់ជាមួយអង្គការក្រៅរដ្ឋាភិបាលនៅល្ងាចថ្ងៃទី១៤តុលា លោកស្រី មាន សំអាន ប្រធានគណៈកម្មការទី៨នៃព្រឹទ្ធសភាបានមានប្រសាសន៍ថា វិធានការ៤ចំណុច ដែលអាចកាត់បន្ថយបន្ទុកលើបញ្ហាសង្គម ដែលបង្កឡើងដោយគ្រឿងស្រវឹង រួមមាន តម្លើងពន្ធផលិតផលគ្រឿងស្រវឹង ហាមឃាត់ការផ្សាយគ្រឿងស្រវឹងដែលមានលក្ខណៈអូសទាញ និងភូតភរកុហក កំហិតកន្លែងលក់គ្រឿងស្រវឹង កំណត់អាយុចំពោះអ្នកទិញ និងប្រើប្រាស់គ្រឿងស្រវឹង។
លោកស្រីបន្តថា បញ្ហាប្រឈមដ៏ធ្ងន់ធ្ងរ ដែលបណ្តាលមកពីគ្រឿងស្រវឹង នៅលើពិភពលោក ក្នុងតំបន់ និងនៅប្រទេសកម្ពុជាគឺមានលក្ខណៈប្រហាក់ប្រហែលគ្នា ដែលទាមទារអោយមានការយកចិត្តទុកដាក់ខ្ពស់ និងឆន្ទៈនយោបាយមុតមាំ ប្រកបដោយការប្តេជ្ញាចិត្ត ពីថ្នាក់ដឹកនាំប្រទេស អង្គការជាតិ-អន្តរជាតិ និងសង្គមស៊ីវិលពាក់ព័ន្ធធ្វើការពិគ្រោះយោបល់ និងសម្រេចចិត្ត ពិនិត្យលទ្ធភាព ដើម្បីរៀបចំគោលនយោបាយជាតិ និងច្បាប់ស្តីពី«ការត្រួតពិនិត្យគ្រឿងគ្រឿងស្រវឹង»សំដៅបង្ការ និងកាត់បន្ថយបន្ទុកលើបញ្ហាសង្គម ដែលបង្កឡើងដោយគ្រឿងស្រវឹង ចំពោះសុវត្ថិភាព និងសុខមាលភាពរបស់ប្រជាពលរដ្ឋ។លោកជំទាវបានសង្កត់ធ្ងន់ថា នៅប្រទេសកម្ពុជា ការបង្ការ និងកាត់បន្ថយការប្រើប្រាស់គ្រឿងស្រវឹង ត្រូវបានធ្វើឡើងតាមរយៈ ពុទ្ធឱវាទ និងក្បួនតម្រា បណ្តាំក្រំង៉ុយ ចំពោះការវៀរចាកអបាយមុខទាំងបី គឺស្រី ស្រា ល្បែង។
របាយការណ៍របស់វិទ្យាស្ថានវាយតម្លៃនិងមជ្ឈមណ្ឌលសុខភាពឆ្នាំ២០១២បង្ហាញថា ការប្រើប្រាស់គ្រឿងស្រវឹងលើសកម្រិត គឺជាមូលហេតុទី៣ ដែលបណ្ដាអោយមានអ្នកស្លាប់នៅលើពិភពលោកចំនួន៤លាន៥សែននាក់ក្នុងមួយឆ្នាំ។ដោយឡែក សម្រាប់ប្រទេសកម្ពុជារបស់យើង យោងតាមការវិភាគស្រាវជ្រាវរបស់អង្គការអន្តរជាតិ ហេនឌីខេប បានអោយដឹងថា នៅក្នុងអំឡុងឆ្នាំ២០១១កន្លងទៅនេះ គ្រឿងស្រវឹងបានសម្លាប់ពលរដ្ឋខ្មែរអស់ចំនួនជាង២០០០ពាន់នាក់ និងខូចខាតទ្រព្យសម្បត្តិអស់ជាង៤៤លានដុល្លារ តាមរយៈការបង្កគ្រោះថ្នាក់ចរាចរ៕ ដោយ៖ រតនា