ភ្នំពេញ៖ នៅក្នុងសមាជវិសាមញ្ញរបស់គណបក្សហ្វ៊ុនស៊ិនប៉ិចកាលពីព្រឹកថ្ងៃទី២៣ខែមីនាឆ្នាំ២០១៣ សម្តេច
រាជបុត្រី ព្រះអនុជ នរោត្តម អរុណរស្មី បានថ្លែងទៅកាន់សមាជិករបស់ខ្លួនថាសមាជថ្ងៃនេះបានដាក់ចេញនូវ
គោលនយោបាយសំខាន់ៗរបស់គណបក្សដែលតម្រង់ទិសតាមមាគ៌ានយោបាយសីហនុនិយម មាន័យថាធ្វើ
ការអភិវឌ្ឍន៍មួយដើម្បីប្រយោជន៍ប្រជារាស្ដ្រជាចំបងពោលគឺ អនុវត្ដតាមគោលការណ៍មូលដ្ឋានគ្រប់គ្រងនៃ
គន្លងព្រហ្មវិហារធម៌ មាន មេត្ដា ករុណា មុទិតានិងឧបេក្ខា ជាផ្លូវសម្រាប់ការដឹកនាំ។
សម្តេចរាជបុត្រី នរោត្តម អរុណរស្មី ថ្លែងបន្តថាជាមួយគ្នានេះដែរ ចំពោះគោលការណ៍សីហនុនិយមនៃអង្គ
សម្ដេចឪ សម្ដេចតា នៃយើងយកសន្ដិភាព និងការផ្សះផ្សាជាមូលដ្ឋាន, ដែលបញ្ជាក់ពីអត្ថន័យនៃពាក្យ
ប្រជាធិបតេយ្យ ដែលរិះរកការដោះស្រាយទំនាស់តាមសន្ដិវិធី យកសន្ដិភាពជាគោលដៅចុងក្រោយ និង
ត្រូវការចាំបាច់នូវការផ្សះផ្សាជាតិ បង្រួបបង្រួមជាតិ ដើម្បីធានាឱ្យប្រជាធិបតេយ្យរស់រានបានជានិរន្ដ។
សម្តេចប្រធានបន្ថែមថា មកដល់ត្រឹមនេះយើងឃើញថា សីហនុនិយម គឺជារបៀបដឹកនាំដែលតម្រង់ទិស
តាមមាគ៌ាព្រះពុទ្ធសាសនាផង និងតាមលទ្ធិប្រជាធិបតេយ្យផង ហើយយើងក៏មិនមានការសង្ស័យឡើយថា
ហេតុអ្វីបានជាកម្ពុជាក្នុងរបបសង្គមរាស្ដ្រនិយមនៃទសវត្សរ៍ទី៦០របស់សម្ដេចឪ សម្ដេចតានៃយើងមានភាព
លូតលាស់រុងរឿងគួរឱ្យកត់សម្គាល់ថែមទាំងប្រកបដោយ សន្ដិភាព ឯករាជ្យពេញលេញ និងបូរណភាព
បរិបូរណ៍ផងនោះ។ នេះកាន់តែធ្វើឱ្យយើងមានជំនឿយ៉ាងមុតមាំថាការដឹកនាំតាមមាគ៌ាសីហនុនិយមនៅតែ
មានប្រយោជន៍ជានិច្ច សម្រាប់ដោះស្រាយដោយសន្ដិវិធីនូវបញ្ហាធំៗ និងដ៏ស្មុគស្មាញច្រើនទៀតដែល
ប្រទេសយើងកំពុងប្រឈមដូចសព្វថ្ងៃនេះ ហើយទាមទារនូវការអភិវឌ្ឍន៍មួយដែលត្រូវបែងចែកផលនៃ
ការអភិវឌ្ឍន៍នោះដោយសមធម៌ ជូនដល់ប្រជាពលរដ្ឋ ជាពិសេសប្រជាពលរដ្ឋក្រីក្រ ទន់ខ្សោយ និងងាយ
រងគ្រោះ។
គោលនយោបាយជាគ្រឹះរបស់គណបក្សហ្វ៊ុនស៊ិនប៉ិចកន្លងមក នឹងពីពេលនេះតទៅ គឺការលើកស្ទួយឱ្យ
មាន សន្ដិភាព និងការផ្សះផ្សាជាតិ, ឱ្យមានលទ្ធិប្រជាធិតេយ្យ នីតិរដ្ឋ សិទ្ធិមនុស្ស និងសិទ្ធិស៊ីវិល, សេដ្ឋកិច្ចទីផ្សារដែលនិយមសង្គម និងនិយមបរិដ្ឋានសាស្ដ្រ និងការបំបាត់ចោលមូលហេតុនៃភាពក្រីក្រឈរលើ
គោលការណ៍ជួយប្រជាពលរដ្ឋឱ្យចេះជួយខ្លួនឯង។ គណបក្សហ្វ៊ុនស៊ិនប៉ិចនឹងមិនមានចំណោទខ្លាំងទេក្នុង
ការអនុវត្ដគោលនយោបាយនេះព្រោះអ្វីៗដែលត្រូវលើកស្ទួយនោះ គឺជាផ្នែកមួយនៃប្រព័ន្ធគុណតម្លៃរបស់
ទស្សនៈសីហនុនិយមមានរួចទៅហើយ។
សម្តេចរាជបុត្រី នរោត្តម អរុណរស្មី បានបញ្ជាក់ថានៅឆ្នាំ១៩៩៣ គណបក្សហ្វ៊ុនស៊ិនប៉ិចឈ្នះឆ្នោតតែចែក
អំណាចជាមួយគណបក្សទាំងបីឯទៀត។ បន្ទាប់មកអ្វីដែលគណបក្សហ្វ៊ុនស៊ិនប៉ិចបានបំពេញតួនាទីជាដៃគូ
ក្នុងរាជរដ្ឋាភិបាល គឺមិនខុសពីគោលការណ៍ផ្សះផ្សាសីហនុនិយមដែលគណបក្សហ្វ៊ុនស៊ិនប៉ិចបានផ្ដើមនា
ឆ្នាំ១៩៩៣នោះឡើយ។
ក្នុងស្មារតីដដែលនេះគណបក្សនឹងអញ្ជើញសមាជិកមកពីគណបក្សទាំងអស់ដែលមានអាសនៈនៅក្នុងសភា
និងអ្នកស្នេហាជាតិផ្សេងៗទៀតឱ្យចូលរួមជាសមាជិករដ្ឋាភិបាលចំរុះប្រសិនបើគណបក្សហ៊្វុនស៊ិនប៉ិច ឈ្នះ
ឆ្នោតនៅថ្ងៃទី២៨ ខែកក្កដា ឆ្នាំ២០១៣ ខាងមុខនេះដោយមិនប្រកាន់និន្នាការនយោបាយ ពិសេសថែមទៀត
គឺនៅតែរក្សាកិច្ចសហប្រតិបត្តិការជាដៃគូរ ជាមួយគណបក្សប្រជាជនកម្ពុជា ដឹកនាំក្នុងជួររាជរដ្ឋាភិបាលបន្ត
ដូចសព្វថ្ងៃនេះ ៕
ដោយ៖ ស.ស្អាត