ភ្នំពេញ៖ មហាសន្និបាតលើកទី១៣០សហភាពអន្តរសភា (IPU) នៅក្នុងកិច្ច​ប្រជុំ​​ សភាអាស៊ានបូកបី និងសភាអាស៊ី​ប៉ាស៊ីហ្វិក សមាជិកសភាកម្ពុជា ត្រូវ​បានការជ្រើស​តាំង​ចូលជាគណៈកម្មការ​ព្រៀង​ធ្វើសេចក្តី​​​​​​សម្រេចចិត្ត និងជា​សមា​ជិកពេញសិទ្ធិ គណៈកម្មការ​អចិន្ត្រៃយ៍​សម្រាប់លទ្ធិប្រជាធិបតេយ្យ និងសិទ្ធមនុស្ស។ បន្ទាប់ពី​​​​​​​​​​បានអញ្ជើញ​ធ្វើ​មាតុ​ភូមិនិវត្តមកដល់មាតុប្រទេសវិញ នៅព្រលានយន្តហោះ អន្តរជាតិភ្នំពេញ ប្រធានប្រតិភូសភាកម្ពុជា លោក យ៉ង់ សែម ប្រធានគណៈកម្មការ ទី១ នៃ​ព្រឹទ្ធសភា បានមានប្រសាសន៍ថា កម្ពុជាបានចូលរួម​មហាសន្និបាតលើកទី១៣០ សហភាព​អន្តរសភា(IPU) រយៈពេល៥ថ្ងៃ នៅទីក្រុង​ហ្សឺណែវ ប្រ​ទេសស្វីស។ មហាសន្និបាត​នេះបាន​ពិភាក្សាលើ​ប្រធាន​បទសំខាន់ៗមួយចំនួនគឺ៖ ទី១- ការប្តេជ្ញាចិត្ត​សារ​ជាថ្មី ដើម្បីធ្វើឲ្យ​សម្រេច​បាននូវសន្តិភាព និង​​លទ្ធិប្រជាធិប​​​តេយ្យ ដើម្បីអបអរ​សាទរខួប​លើកទី១២៥ឆ្នាំ នៃការបង្កើត​សហភាព​អន្តរសភា ទី២-ការចូលរួមចំណែក​ពីសភាដើម្បី​ឆ្ពោះ​ទៅរកពិភពលោកមួយ ដែលពុំ​មាន​អាវុធនុយក្លេអ៊ែរ ទី៣-ឆ្ពោះទៅរកការអភិវឌ្ឍន៍ ដែលមាន​ហានិភ័យតិចតួច ដោយពិនិត្យ​ពិចារណាទៅលើនិន្នាការប្រជាសាស្ត្រ និងឧបសគ្គនៅក្នុង​ប្រទេសនីមួយៗ និងទី៤-តួនាទី​សភាក្នុងការ​​ការពាសិទ្ធិកុមារ ជាពិសេសកុមារចំណាកស្រុក​ដោយពុំមានអ្នករួមដំណើរជាមួយ និងទប់ស្កាត់មិនឲ្យមានការ​កេង​ប្រវ័ញ្ច​កុមារនៅក្នុង​ស្ថាន​ភាពមានសង្គ្រាមនិងជម្លោះ។

ក្នុងមហាសន្និបាតនេះមានកិច្ចប្រជុំជាច្រើនទៀត ដូចជាកិច្ចប្រជុំអាស៊ានបូកបី កិច្ចប្រជុំ​ក្រុម​​អាស៊ី-ប៉ាស៊ីហ្វិក កិច្ចប្រជុំ​​​គណៈកម្មាធិការសមាជិកសភាជាស្ត្រី វេទិកាសមាជិក​សភា​វ័យក្មេង ជាដើម។ លោកស្រី ឡោក ខេង សមាជិក​គណៈ​កម្មការទី២រដ្ឋសភា និងជាសមាជិការ​គណៈប្រតិភូនោះបានមានប្រសាសន៍ថា កម្ពុជាមានមោទ​​​​​នភាពណាស់ ដោយសារតែក្នុងកិច្ច​ប្រជុំ​​សភាអាស៊ានបូកបី និងសភាអាស៊ីប៉ាស៊ីហ្វិកផ្តល់កិត្តិយសឲ្យសមាជិកសភាកម្ពុជា ទទួល​បានការជ្រើសតាំងចូលជាគណៈកម្មការព្រៀង​ធ្វើសេចក្តីសម្រេចចិត្ត ទៅលើរបៀបវារៈបន្ទាន់ និងបាន​ជ្រើស​តាំង​ជា​សមាជិកពេញសិទ្ធិនៃគណៈកម្មការអចិន្ត្រៃយ៍ទី៣ហៅថា គណៈកម្មការ​​អចិន្ត្រៃយ៍​សម្រាប់​លទ្ធិប្រជាធិបតេយ្យ​និង​សិទ្ធ​មនុស្ស។ លោកស្រីបន្តថា សម្រាប់កិច្ចប្រជុំគណៈកម្មការអចិន្ត្រៃយ៍សម្រាប់លទ្ធិប្រជាធិបតេយ្យ និងសិទ្ធ​មនុស្ស​​​​​​​​​​​នេះ អង្គប្រជុំបានលើកអំពីតួនាទីសភា ក្នុងការការពារសិទ្ធិរបស់កុមារ ជា​ពិសេស​​កុមារ ចំណាកស្រុកដោយ​ពុំមានអ្នករួមដំណើរជាមួយ និងទប់ស្កាត់មិនឲ្យមានការ​កេងប្រវ័ញ្ចកុមារនៅក្នុងស្ថានភាពមានសង្គ្រាម និងជម្លោះ ដោយត្រូវឲ្យសភាកម្ពុជាឡើងធ្វើ​បទ​បង្ហាញជូនអង្គប្រជុំ ហើយការលើកឡើងនេះត្រូវបានគណៈកម្មការ​អចិន្ត្រៃយ៍​នៃកិច្ច​ប្រជុំ​សរសើរនិងបានសុំបទអន្តរាគមន៍របស់កម្ពុជាដើម្បីចែកជូនផ្សព្វផ្សាយ​ដល់ប្រទេសជា​សមាជិក​ទាំងអស់​ដែលបានចូលរួម អំពីបទពិសោធន៍របស់កម្ពុជាថាមានយន្តការគ្រប់គ្រាន់ដើ​ម្បី​ការពារសិទ្ធិកុមារ។  កិច្ចប្រជុំ​​​​​​​របស់​គណៈកម្មការអចិន្ត្រៃយ៍ក៏បានឲ្យដឹងដែរថា នៅក្នុងពិភព​លោកនេះមានជនចំណាកស្រុកចំនួន ២១០លាននាក់ ក្នុង​នោះមាន ៣៣លាននាក់ ដែល​ជាកុមារឥញ្ចឹងកិច្ចប្រជុំចង់ឲ្យសភា និងសភានៃបណ្តាប្រទេស​ទាំងអស់​សហការ​គ្នាប្តូរ​ទិន្នន័យ​គ្នាទៅវិញទៅមក ហើយឲ្យមានការយកចិត្តទុកដាក់ពីបញ្ហាប្រឈមនានារបស់កុមារ ដោយ​ជំរុញ​ឲ្យ​សភា​ជាម្ចាស់ប្រទេស ដែលធ្វើសន្តិប្រវេសន៍សហការគ្នាឲ្យជិតស្និត ដើម្បីត្រួតពិនិត្យ​តាម​ដានលើសន្តិ​ប្រវេសន៍​កុមារ និងបានជំរុញឲ្យកម្ពុជាធ្វើជាគំរូឈានមុខគេក្នុងតួនាទីជា​សភា។ ​ទាក់ទងនិងប្រធានបទពិភពលោកមួយគ្មាន​អាវុធនុយក្លេអ៊ែរ អង្គប្រជុំសុំឲ្យប្រទេស​មួយចំនួនលប់បំបាត់អាវុធនុយក្លេអ៊ែរ​ទាំងអស់ និងម៉្យាងទៀតសុំឲ្យរក្សាទុក​ដដែល តែត្រូវ​ពង្រឹងច្បាប់​គ្រប់​គ្រងឲ្យបានតឹងរឹង។ ចំ​ពោះ​ប្រទេសជាម្ចាស់នុយក្លេអ៊ែរ ដែលតាមអង្គប្រជុំ​លើក​ឡើង​ថានៅលើពិភពលោកនេះមានអាវុធនុយក្លេអ៊ែរចំនួន ១៧.០០០ ដែលធ្វើឲ្យពិភព​លោករងគ្រោះ ។ ដូច្នេះ ផលិត​នុយ​ក្លេអ៊ែរ សុំឲ្យការពារ និងគ្រប់គ្រងឲ្យបានល្អកុំ​ឲ្យបង្កគ្រោះ​ភ័យ និងមានគ្រោះមហន្តរាយដល់ប្រទេសដ៏ទៃ ឬ ពិភព​លោក៕

ដោយ៖ សស្អាត