ភ្នំពេញ៖ ប្រធានព្រឹទ្ធសភា និងជាប្រធានគណបក្សប្រជាជនកម្ពុជាសម្តេចអគ្គមហាធម្មពោធិសាល ជា ស៊ីម
នៅព្រឹកថ្ងៃទី៣ ខែសីហា ឆ្នាំ២០១៣ បានអនុញ្ញាតឲ្យលោកស្រី ពូ ជៀនគួ (Bo Jianguo) ឯកអគ្គរដ្ឋទូត នៃសាធា
រណរដ្ឋប្រជាមានិតចិន ចូលជួបសម្តែងការគួរសម ក៏ដូចជាចូលរួមអបអរសាទរនូវជ័យជម្នះដែលគណបក្ស
ប្រជាជនកម្ពុជា ទទួលបានពីការបោះឆ្នោតជ្រើសតាំងតំណាងរាស្ត្រ នីតិកាលទី៥ កាលពីថ្ងៃទី២៨ ខែកក្កដា
ឆ្នាំ២០១៣ និងការផ្តាំផ្ញើសួរសុខទុក្ខពីសំណាក់ថ្នាក់ដឹកនាំនៃប្រទេសចិនជាមិត្ត និងជាអ្នកជិតខាងដែលយល់
ចិត្តគ្នាចេះជួយគ្នាក្នុងគ្រាមានអាសន្ន ជូនសម្តេច ជា ស៊ីម ក៏ដូចជាថ្នាក់ដឹកនាំកម្ពុជា។
នៅក្នុងជំនួបនោះដែរក៏បានការចូលរួមពីលោក អ៊ុំ សារិទ្ធ អគ្គលេខាធិការព្រឹទ្ធសភា, លោក ម៉ម សារិន នាយក
ខុទ្ទការល័យសម្តេចអគ្គមហាធម្មពោធិសាល ជា ស៊ីម, លោកឧកញ៉ា ឆាវ អ៊ិនទ័រ ទីប្រឹក្សាផ្ទាល់សម្តេចអគ្គមហា
ធម្មពោធិសាល ជា ស៊ីម, រួមនឹងមន្ត្រីជាន់ខ្ពស់នៃព្រឹទ្ធសភា ជាច្រើនរូបទៀត។
នៅក្រោយជំនួបនោះលោក ម៉ម សារិន បានប្រាប់អ្នករាយការណ៍ព័ត៌មានថា ជំនួបទ្វេភាគីនោះក្រៅពីការ
សម្តែងការគួរសម ចំពោះសម្តេចអគ្គមហាធម្មពោធិសាល ជា ស៊ីម លោកស្រី ពូ ជៀនគួ បាននាំយកសារលិខិត
របស់លោក ស៊ី ជីពីង អគ្គលេខាបក្សគុម្មុយនីស្តចិន មកជូនសម្តេចប្រធានព្រឹទ្ធសភា និងក្នុងនាមជាប្រធាន
គណបក្សប្រជាជនកម្ពុជា។ ក្នុងសារលិខិតនោះ លោក ស៊ី ជីពីង បានចូលរួមអបអរសាទរជាមួយគណបក្ស
ប្រជាជនកម្ពុជា ក្នុងការទទួលបានលទ្ធផលជោគជ័យ នៃបោះឆ្នោតជ្រើសតាំងតំណាងរាស្ត្រ នីតិកាលទី៥
កាលពីថ្ងៃទី២៨ ខែកក្កដា ឆ្នាំ២០១៣។ ក្នុងឱកាសជំនួបនោះដែរ លោកស្រី ពូ ជៀនគួ ក៏បាននាំយកមកនូវ
ការផ្តាំផ្ញើសួរសុខទុក្ខពីសំណាក់ថ្នាក់ដឹកនាំរបស់ប្រទេសចិន ជូនសម្តេចអគ្គមហាធម្មពោធិសាល ជា ស៊ីម
ក៏ដូចជាថ្នាក់ដឹកនាំនៃប្រទេសកម្ពុជា ហើយជាកិច្ចថ្លែងនូវអំណរគុណសម្តេចអគ្គមហាធម្មពោធិសាល ជា ស៊ីម
ក៏បានផ្តាំផ្ញើនូវការសួរសុខទុក្ខពីសម្តេចជូនទៅថ្នាក់ដឹកនាំ និងប្រជាជនរបស់ប្រទេសចិនវិញផងដែរ។
បើតាមការបញ្ជាក់ពីលោក ម៉ម សារិន ដែលបាននាំយកនូវខ្លឹមសារ នៃកិច្ចជំនួបនោះ គឺភាគីទាំងពីរបានលើក
ឡើងនូវទំនាក់ទំនងរវាងកម្ពុជានិងចិន ដែលមានប្រវត្តិតាំងពីយូរលង់ណាស់មកហើយក្នុងនោះមានកិច្ចសហ
ប្រតិបការ និងការពង្រឹងទំនាក់ទំនងចំណងមិត្តភាព សាមគ្គីភាពល្អជាមួយគ្នាពីមួយជំនាន់ទៅមួយជំនាន់
ហើយមកទល់ពេលនេះ មានការរីកចម្រើនរហូតដល់ទៅការទាក់ទងជាយុទ្ធសាស្ត្រគ្រប់ជ្រុងជ្រោយ ឬ គ្រប់
វិស័យ ហើយសង្ឃឹមថា ចំណងទំនាក់ទំនងនេះ នឹងកាន់តែរកចម្រើនល្អប្រសើរឡើងថែមទៀត។ ភាគីទាំងពីរ
ក៏បានប្រសិទ្ធិពរជ័យដល់គ្នាទៅវិញទៅមក ដើម្បីឲ្យកិច្ចសហប្រតិបត្តិការទ្វេភាគីរវាងប្រជាជន និងប្រទេស
ទាំងពីរ(កម្ពុជា ចិន) ឲ្យកាន់តែល្អប្រសើរ និងរឹងមាំខ្លាំក្លាឡើងទ្វេឥតឈប់ឈរថែមមួយកម្រិតទៀត ក្នុងបំណង
ជាប្រយោជន៍ជារួមរបស់ប្រជាជន ហើយនិងការអភិវឌ្ឍរបស់ប្រទេសទាំងពីរកាន់តែរីកចម្រើនទៅមុខទៀត៕
ដោយ៖ ស.ស្អាត