ភ្នំពេញ៖ ទីភ្នាក់ងារបារាំងដើម្បីអភិវឌ្ឍន៍ (AFD) គ្រោងផ្តល់ថវិការប្រមាណ២០លានដុល្លារអាមេរិកដល់សមាជិក អាជីវកម្ម នៃសមាគមន៍អ្នកផ្គត់ផ្គង់ទឹកស្អាតកម្ពុជាទូទាំងប្រទេស ដោយកម្ចីដែលមានការប្រាកទាប ដើម្បីបង្កើនល្បឿននៃការផលិតទឹកស្អាតជូនប្រជាពលរដ្ឋបានប្រើប្រាស់កាន់តែច្រើននៅទូទាំងប្រទេស។ នេះបើតាមប្រសាសន៍លើកឡើងរបស់លោកឧកញ៉ា អ៊ុន យុទ្ធី ប្រធានក្រុមប្រឹក្សាភិបាលនៃសមាគមន៍អ្នកផ្គត់ផ្គង់ទឹកស្អាតកម្ពុជានៅក្រៅ មហាសន្និបាតសមាគមន៍អ្នកផ្គត់ផ្គង់ទឹកស្អាតកម្ពុជានាព្រឹកថ្ងៃទី២៣ ខែមករា ឆ្នាំ២០១៤ នៅសណ្ឋាគារភ្នំពេញ។
ប្រធានសមាគមន៍អ្នកផ្គត់ផ្គង់ទឹកស្អាតកម្ពុជា លោក ឧកញ៉ា អ៊ុន យុទ្ធី បានមានប្រសាសន៍ថា ដោយមានកិច្ចសហប្រតិបត្តការយ៉ាងល្អជាមួយ អង្គការជាតិ និងអង្គការអន្តរជាតិជាដៃគូរ សមាជិក របស់សមាគមន៍អ្នកផ្គត់ផ្គង់ទឹកស្អាតកម្ពុជា បានពង្រីកអាជីវកម្មរបស់ខ្លួនកាន់តែធំឡើងៗពីមួយឆ្នាំទៅមួយឆ្នាំលើផ្នែកទឹកស្អាត ដើម្បីលើកកម្ពស់ជីវភាពរស់នៅរបស់ប្រជាពលរដ្ឋតាមទីប្រជុំជន និងតាមជនបទមួយចំនួន។លោកឧកញ៉ាបានបន្តថា សព្វថ្ងៃនេះការផ្តល់សេវាទឹកស្អាតជូនប្រជាពលរដ្ឋនៅតាមទីជនបទជាតម្រូវការចាំបាច់បំផុត និងជាបញ្ហានយោបាយរបស់រាជរដ្ឋាភិបាលដំណាក់កាលទី២ ។ ប៉ុន្តែបញ្ហានេះបានជួបនូវការប្រឈមជាច្រើន ដូចជានៅតាមជនបទខ្វះប្រភពទឹក ការផ្តល់សេវាមានបញ្ហាស្មុគ្រស្មាញ បណ្តាញនៃការចែកចាយវែង និងបណ្តុំប្រជាពលរដ្ឋរស់នៅមានលក្ខណៈតិច្ចតួច ជាហេតុធ្វើឲ្យអ្នកវិនិយោគមានការរារែកក្នុងការបណ្តាក់ទុនរកស៊ីនៅតាមជនបទនេះ ។
លោកឧកញ៉ាបន្តទៀតថា កន្លងមកនៅតាមបណ្តុំរស់នៅមួយចំនួនរបស់ប្រជាពលរដ្ឋ មានអង្គការ USID បានជួយជ្រោមជ្រែងសព្វបែបយ៉ាងលើផ្នែកបណ្តុះបណ្តាល បច្ចេកទេស ហើយក៏មានក្រុមហ៊ុនតូចៗដែលគាត់រស់នៅក្បែរនោះបានដាក់ទុនធ្វើអាជវកម្ម រួមគ្នារវាងក្រុមហ៊ុន និងអង្គការដៃគូរ ដើម្បីផ្តល់សេវាជូនប្រជាពលរដ្ឋក្រីក្របំផុតបានទឹកស្អាតប្រើប្រាស់តាមរយៈ ការចំណាយហាសិប បូក ហាសិប(50+50%)ម្នាក់ ក្នុងការជួយសម្រួលជីវភាពរបស់ពួកគាត់ (USID ជាអ្នកផ្តល់តម្លៃគ្រាដំបូងរវាងអង្គការ និងក្រុមហ៊ុន)។ចំពោះតម្លៃទឹកវិញលោកឧកញ៉ាបានបញ្ជាក់ថា មានការខុសគ្នាច្រើនរវាងអ្នកទីក្រុង និងអ្នកជនបទ អ្នកទីក្រុងតម្លៃទឹកគឺកំណត់ដោយរដ្ឋ តែសម្រាប់អ្នកជនបទវិញគឺកំណត់ដោយក្រុមហ៊ុន ព្រោះថាការចំណាយដើមទុនច្រើន ហើយបណ្តាញនៃការចែកចាយវែងគឺក្រុមហ៊ុនត្រូវការចេញដើមទុនច្រើនណាស់។ លោកឧកញ៉ារំពឹងថា ទៅថ្ងៃខាងមុខសមាគមន៍លោកនឹងទាក់ទាញអ្នកវិនិយោគ ឬ ដៃគូរដែលគេបានជួយជ្រោមជ្រែង ឲ្យគេផ្តល់ប្រាក់កម្ចីដែលមានការប្រាក់ទាប មកដល់សមាគមន៍ដើម្បីពង្រីកសេវាផ្គត់ផ្គង់ទឹកស្អាតឲ្យបានកាន់តែទូលំទូលាយថែមទៀត ។ ព្រោះថាសព្វថ្ងៃនេះលោកមើលឃើញថា មានអង្គការដៃគូរជាច្រើនកំពុងតែមានសកម្មភាពផុលផុសលើបញ្ហានេះ ពិសេសលើសមាគមន៍ផលិតទឹកស្អាតខ្នាតតូចៗនៅតាមទីជនបទដាច់ស្រយ៉ាល។
ដោយឡែកចំពោះមហាសន្និបាតសមាគមន៍អ្នកផ្គត់ផ្គង់ទឹកស្អាតកម្ពុជានៅថ្ងៃនេះវិញ លោកឧកញ៉ាបង្ហាញពី មានគោលបំណងសំខាន់២យ៉ាង ទី១ បូកសរុបការងារដែលបានអនុវត្តក្នុងឆ្នាំ២០១៣កន្លងទៅ រួមទាំងផែនការយុទ្ឌសាស្រ្តនិងសកម្មភាពសម្រាប់ឆ្នាំ២០១៤ និងមួយវិញទៀត ពិភាក្សានិងស្វែងរកមតិយោបល់ អនុសាសន៍ដើម្បីជម្រុញឲ្យដំណើរការប្រព្រឹត្តទៅរបស់សមាគមន៍បោះជមហានទៅមុខកាន់តែប្រសើរ។ ពិសេសផ្តល់ឱកាសឲ្យសមាជិក និងអ្នកចូលរួមបានស្គាល់និងធ្វើការប្រាសញរ័តទាក់ទងគ្នា ចែករំឡេកបទពិសោធន៍ដែលខ្លួនមាន ក៏ដូចជាទស្សនាការទាងបង្ហាញនូវផលិតផលរបស់ក្រុមហ៊ុនផ្គត់ផ្គង់វត្ថុធាតុដើម និងការណែនាំបច្ចេកទេសថ្មីដែលទាក់ទងនិងអាជីវកម្មផលិតទឹកស្អាតនេះ។សូមបញ្ជាក់ថា សមាគមន៍អ្នកផ្គត់ផ្គង់ទឹកស្អាតកម្ពុជាត្រូវបានបង្កើតឡើងនៅឆ្នាំ២០១១ រហូតមកដល់ពេលនេះសមាគមន៍មានសមាជិកចំនួន៥៤ (លើសការរំពឹងទុក ) និងមានស្ថានីយ៍ចំនួន៧១កន្លែង មានសមាជិកសមគមន៍ពីខេត្តចំនួន១៣ផងដែរ។ សម្រាប់ឆ្នាំ២០១៤ នេះ រំពឹងថានឹងមានសមាជិករហូតដល់ទៅ៨០នាក់៕
ដោយ៖ ស.ស្អាត