ខេត្តបន្ទាយមានជ័យ៖ អាជ្ញាធរកម្ពុជា កំពុងចុះស្រាវជ្រាវនូវព័ត៌មានដែលបានលិចលឺថា មានពលករចំណាកស្រុក៦នាក់ត្រូវស្លាប់ និង៤នាក់ ទៀតកំពុងរងរបួសធ្ងន់ស្រាល នៅក្នុងហេតុការណ៍គ្រោះថ្នាក់ចរាចរណ៍មួយដែលបានកើតឡើង កាលពីវេលាទៀបភ្លឺចុងសប្តាហ៍មុន នៅខេត្តឈុនបុរី ប្រទេសថៃ។បើយោងតាមប្រភពព័ត៌មានពីកាសែតក្នុងស្រុកមួយបានឲ្យដឹងថា នៅវេលាទៀបភ្លឺ ថ្ងៃទី៩ ខែមីនា ឆ្នាំ២០១៤ មានករណីគ្រោះថ្នាក់ចរាចរណ៍មួយ ត្រូវបានកើតឡើងនៅក្នុងខេត្តឈុនបុរី ប្រទេសថៃ ដែលបណ្តាលឲ្យពលករខ្មែរចំនួន៦នាក់ត្រូវបានស្លាប់ និង៤នាក់ទៀតបានរងរបួសធ្ងន់ស្រាលនៅក្នុងហេតុការណ៍នោះ។
លោកនេត្រ សារី អគ្គកុងស៊ុលកម្ពុជាប្រចាំខេត្តស្រះកែវប្រទេសថៃ បានទទួលស្គាល់ថា ពិតជាមានមនុស្សស្លាប់ និងរងរបួសដោយសារករណីគ្រោះថ្នាក់ចរាចរណ៍នេះមែន ប៉ុន្តែព័ត៌មានជាក់លាក់លោកនៅមិនទាន់ទទួលបានទេ។
លោកបន្តថា នៅព្រឹកថ្ងៃអាទិត្យនេះ កម្លាំងអាជ្ញាធរកម្ពុជានៅក្នុងខេត្តឈុនបុរី កំពុងធ្វើដំណើរឆ្ពោះទៅកាន់កន្លែងកើតហេតុ ដើម្បីចេញប្រតិបត្តិការណ៍ជួយសង្គ្រោះដល់ពលរដ្ឋកម្ពុជា ដែលបានរងគ្រោះនៅក្នុងហេតុការណ៍គ្រោះថ្នាក់ចរាចរណ៍ខាងលើនេះ ប៉ុន្តែរហូតមកដល់ពេលនេះ ទូរសព្ទ័របស់ក្រុមមន្ត្រីការងារដែលបានចុះទៅនោះនៅមិនទាន់អាចទំនាក់ទំនងបាននៅឡើយទេ។
លោកបញ្ជាក់ថា៖«យើងមិនទាន់ដឹងលំអិតអំពីមូលហេតុ នៃគ្រោះថ្នាក់ចរាចរណ៍នៅក្នុងប្រទេសថៃទេ ព្រោះថា ករណីនេះវាបានកើតឡើងនៅក្នុងខេត្តឈុនបុរី ប្រទេសថៃឯណោះ ដូច្នេះកម្លាំងអាជ្ញាធរនៅទីនោះកំពុងធ្វើការចុះស្រាវជ្រាវ»។
លោកគឹម សារ៉េត អនុប្រធានទំនាក់ទំនងការងារព្រំដែនកម្ពុជាថៃបានឲ្យដឹងថា បើទោះបីលោកទទួលខុសត្រូវផ្នែកដឹកជញ្ជូនសពពលរដ្ឋខ្មែរពីប្រទេសថៃមកកម្ពុជាក៏ដោយ ប៉ុន្តែឆ្លើយតបករណីនេះលោកមិនមានសិទ្ធនៅក្នុងការចេញប្រតិបត្តការណ៍តែឯងទេ ព្រោះថា លោកមិនទាន់បានទទួលលិខិតបញ្ជាក់ពីថ្នាក់លើនៅឡើយទេ ជុំវិញរឿងនេះ។ លោកបញ្ជាក់ថា៖«យើងបានត្រៀមកម្លាំងក្នុងការដឹកជញ្ជូនសាកសពពលរដ្ឋខ្មែរមកកាន់កម្ពុជាវិញ ប៉ុន្តែពាក់ពន្ធ័និងរឿងនេះយើងត្រូវធ្វើការស៊ើបអង្កេតជាមុនសិន»៕ ដោយ៖ អភិរក្ស