ភ្នំពេញ៖ យ៉ាងហោចណាស់មានអ្នកស្លាប់១៥នាក់់ និង៤៩ទៀតរងរបួសក្នុង ករណីគ្រោះថ្នាក់ចរាចរណ៍ចំនួនបីថ្ងៃនៃព្រះរាជពិធីបុណ្យអុំទូក អកអំបុក។ នេះបើយោងតាមការអះអាងរបស់លោក ហ៊ឹម យាន ប្រធាននាយកដ្ឋានសណ្ដាប់នៃអគ្គស្នងការនគរបាលជាតិ។
លោកបានបន្ថែមថា គ្រោះថ្នាក់ចរាចរណ៍នៅថ្ងៃអុំទូកទី១ ធម្មតា តែថ្ងៃទី២ និងទី៣បានកើនឡើងខ្ពស់ដែលសរុបទៅមានអ្នកស្លាប់ចំនួន១៥ នាក់ និងរងរបួសធ្ងន់ស្រាល ៤៩ នាក់។ ករណីគ្រោះថ្នាក់ភាគច្រើន គឺបានកើតឡើងនៅតាមខេត្ត ពិសេសខេត្តមានភ្ញៀវទេសចរណ៍ទៅដើរកម្សាន្តច្រើន។ ហើយករណីគ្រោះថ្នាក់ចរាចរណ៍ក្នុងឱកាសបុណ្យអុំទូកឆ្នាំ២០១៣នេះ មានការថយចុះជាងឆ្នាំមុនៗ។
បើតាមទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេសចេញប្រចាំថ្ងៃ បានឲ្យដឹងថា កាលពីថ្ងៃទី១៦ដែលជាថ្ងៃឈប់សម្រាករបស់បុគ្គលិក មន្ត្រីរាជការ និងជាថ្ងៃឈប់សម្រាកចុងសប្តាហ៍ផងនោះ មានគ្រោះថ្នាក់ចរាចរណ៍កើតឡើង៩លើកបានបណ្តាលឲ្យមនុស្ស៥នាក់ស្លាប់ និង១៤ នាក់រងរបួស ចំណែកគ្រោះថ្នាក់បានកើតឡើង១៨ លើកបានបណ្តាលឲ្យមនុស្ស ១០នាក់ស្លាប់ និង ៣៥ នាក់រងរបួសធ្ងន់ និងស្រាល។
ប្រធាននាយកដ្ឋានសណ្តាប់ធ្នាប់ និងចរាចរណ៍នៃក្រសួងសារធារណការ និងដឹកជញ្ជូន លោកព្រាប ចាន់វិបុល មានប្រសាសន៍ប្រាប់ឱ្យដឹងថា តួលេខនៃគ្រោះថ្នាក់ចរាចរណ៍ ក្នុងរយៈពេល១០ខែ ឆ្នាំ២០១៣នេះ បានកើតឡើង ៣.៦០៩ករណី កើនជាងឆ្នាំមុន ៥៦ ករណី ក្នុងនោះ អ្នកស្លាប់មាន១.៦០៤ នាក់កើនឡើងជាងឆ្នាំមុន ១៥ នាក់ អ្នករងរបួសធ្ងន់ ៣.៤៧៨ នាក់ថយ ចុះជាងឆ្នាំមុន៥៣ នាក់ អ្នករងរបួសស្រាល ៧២ នាក់ថយចុះជាងឆ្នាំមុន ១៦៨ នាក់។
ពាក់ព័ន្ធនឹងការកាត់បន្ថយគ្រោះថ្នាក់ចរាចរណ៍នេះដែរ ចាប់ពីថ្ងៃទី១ វិច្ឆិកានេះ សាលារាជធានីភ្នំពេញ បានចេញបម្រាមហាមឃាត់ធ្វើចរាចរណ៍រថយន្តដឹកជញ្ជូនទំនិញធុនធ្ងន់ចេញចូលក្នុងភូមិសាស្ត្រ រាជធានីភ្នំពេញ ដើម្បីពង្រឹង និងរក្សាសណ្តាប់ធ្នាប់ សុវត្ថិភាពចរាចរណ៍ ក្នុងរាជធានីភ្នំពេញឲ្យកាន់តែប្រសើរ និងមានរបៀបរៀបរយថែមទៀត។ជាមួយគ្នានោះ សាលារាជធានីភ្នំពេញ ក៏បានធ្វើការណែនាំទៅរថយន្តដឹកជញ្ជូន ទំនិញធុនធ្ងន់គ្រប់ប្រភេទពិសេសរថយន្តកុងតឺន័រនិងមិនអនុញ្ញាតឲ្យធ្វើចរាចរណ៍ក្នុងភូមិសាស្ត្ររាជធានីភ្នំពេញ ចាប់ពីម៉ោង ៥ ព្រឹក ដល់ម៉ោង ២១ យប់។
សូមរម្លឹកផងដែរថា កាលពីឆ្នាំ២០១២ គ្រោះថ្នាក់ចរាចរណ៍ បានកើតឡើង ៤.២៥០ ករណី មានមនុស្សស្លាប់១៩៦៦នាក់ រងរបួសធ្ងន់ ៥.៣៤៩នាក់ រងរបួសស្រាល៨.៣០០ នាក់ខាតបង់ថវិកាជាតិអស់ ៣២៩ លានដុល្លារសហរដ្ឋអាមេរិក ដែលកាលពីឆ្នាំ២០១១ ដោយសារតែគ្រោះថ្នាក់ចរាចរណ៍បានខាតថវិកាជាតិអស់ ៣១០ លានដុល្លារសហរដ្ឋអាមេរិក៕ ដោយ ៖ មករា