ភ្នំពេញ៖តាមសេចក្តីថ្លែងការណ៍របស់អង្គការតម្លាភាពនៃកម្ពុជា បានបង្ហាញពីការស្ទង់មតិវាស់វែងពីអំពើពុករលួយជាមួយនឹងសាធារណជនប្រមាណ១០០០នាក់ ក្នុងបណ្តាប្រទេសនីមួយៗទាំង៦ប្រទេស ក្នុងតំបន់អាស៊ីអាគ្នេយ៍ដែលបានធ្វើការស្ទង់មតិចាប់តាំងពីខែកញ្ញា២០១២ដល់ខែមីនា២០១៣ឱ្យដឹងថា ការស្ទង់មតិក្នុងប្រទេសចំនួន១០៧ដែលមានប្រជាជនចំនួន១១៤,២៧០នាក់ ចូលរួមផ្តល់បទសម្ភាសន៍ទាក់ទងទៅនឹងទស្សនៈ និងបទពិសោធន៍នៃការយល់ឃើញអំពើពុករលួយក្នុងប្រទេសរបស់គេ។
ដោយឡែកនៅក្នុងប្រទេសកម្ពុជា អង្គការតម្លាភាពកម្ពុជាបាននិយាយថា ស្ថាប័នចំបងចំនួនបួនដែលពាក់ព័ន្ធនឹងការប្រព្រឹត្តអំពើពុករលួយខ្លាំងជាងគេរួមមាន៖ ស្ថាប័នតុលាការ ប៉ូលិស មន្ត្រីសាធារណៈ និងគណបក្សនយោបាយ។
របាយការណ៍របស់អង្គការមួយនេះ បានបង្ហាញលទ្ធផលរបស់ខ្លួនបន្តថា ៦៥% នៃអ្នកផ្តល់បទសម្ភាសន៍ទាំងអស់បានសូកប៉ាន់មន្ត្រីតុលាការនិង ប៉ូលិស ៦២% ដល់មន្ត្រីចុះបញ្ជីអត្រានុកូលដ្ឋាន និង៥៧%ដល់មន្ត្រីពាក់ព័ន្ធនឹងសេវាកម្មដីធ្លី។លើសពីនេះទៅទៀតអ្នកផ្តល់សម្ភាសន៍ចំនួន៣៨% បានសូកប៉ាន់ដល់មន្ត្រីសុខាភិបាលនិង៣០%ដល់មន្ត្រីអប់រំ។
លោក សឿង សារឿន ប្រធានក្រុមប្រឹក្សាអង្គការតម្លាភាពកម្ពុជាបានលើកឡើងនៅព្រឹកថ្ងៃទី ៩ កក្កដា យ៉ាងទទូចថា សូមឱ្យរដ្ឋាភិបាលផ្តោតការយកចិត្តទុកដាក់ និងបន្តកិច្ចខិតខំប្រឹងប្រែងរបស់ខ្លួនក្នុងការដោះស្រាយអំពើពុករលួយនៅ ក្នុងស្ថាប័នទាំងបួនដែលបានបង្ហាញខាងលើ ដើម្បីពង្រឹងការទទួលបានយុត្តិធម៌ និងសេវាសាធារណៈសមស្របរបស់ប្រជាពលរដ្ឋកម្ពុជា ដោយមិនចាំបាច់មានការសូកប៉ាន់ ។
នាយប្រតិបត្តិនៃអង្គការតម្លាភាពនៃកម្ពុជា លោក ព្រាប កុល បានលើកឡើងថា ផ្សារភ្ជាប់ទៅនឹងការបោះឆ្នោតសាកល នៅថ្ងៃទី២៨ខែកក្កដាឆ្នាំ២០១៣ខាងមុខនេះ យើងសូមលើកទឹកចិត្តឲ្យប្រជាពលរដ្ឋដែលជាអ្នកបោះឆ្នោតយកចិត្តទុកដាក់ទៅលើគោលនយោបាយ ព្រមទាំងការប្តេជ្ញាចិត្តរបស់បេក្ខជននិងគណបក្សនយោបាយនានា ក្នុងការប្រយុទ្ធប្រឆាំងអំពើពុករលួយ”។
លើសពីនេះទៀតនោះ៨១% នៃចំនួនអ្នកដែលបានសម្ភាសន៍ជឿថា សាធារណជនទូទៅអាចធ្វើឲ្យមានការផ្លាស់ប្តូរ ហើយជាង៨០%ក៏បានបង្ហាញនូវឆន្ទៈរបស់ខ្លួនក្នុងការចូលរួមប្រយុទ្ធប្រឆាំងអំពើពុករលួយ។ ឧទាហរណ៍៨៣%នៃអ្នកឆ្លើយតបមានឆន្ទៈក្នុងការចុះហត្ថលេខាលើញត្តិ ៨៨%នឹងចូលរួមក្នុងការតវ៉ាដោយសន្តិវិធីហើយ៨៦%ចូលរួមក្នុងសកម្មភាពរបស់ស្ថាប័នប្រឆាំងអំពើពុករលួយ និង៨៦%ពេញចិត្តក្នុងការចំណាយបន្ថែមទៀត ទៅលើទំនិញដែលជារបស់ក្រុមហ៊ុននានាដែលមិនប្រព្រឹត្តអំពើពុករលួយ។
គួរបញ្ជក់ថា តួលេខខាងលើរបស់អង្គការមួយនេះដែរ គឺចេញរបាយការណ៍ពីអំពើពុករលួយក្នុងបណ្តាប្រទេសនីមួយៗទាំង៦ប្រទេសក្នុងតំបន់អាស៊ីអាគ្នេយ៍រួមមានកម្ពុជាផងដែរនោះពុំមានវត្តមានមន្ត្រីរាជរដ្ឋាភិបាលណាមួយ ឬក៏ស្ថាប័នប្រឆាំងអំពើពុករលួយចេញមកអះអាង និងគាំទ្រពីតួលេខរបស់អង្គការតម្លាភាពនេះឡើយ៕
ដោយ៖ ស្រីផល