ភ្នំពេញ៖ មជ្ឈមណ្ឌលតស៊ូមតិ និងប្រឹក្សាយោបល់ផ្នែកច្បាប់ (ALAC) បានផ្តល់សិទ្ធិអំណាចដល់ប្រជាពលរដ្ឋ តាមរយៈការពង្រីកវិសាលភាពរបស់ខ្លួនក្នុងការរៀបចំនិងដាក់ពាក្យបណ្តឹងពាក់ព័ន្ធនឹងអំពើពុករលួយ និងការសម្តែងមតិដើម្បីប្រយុទ្ធប្រឆាំងនឹងអំពើពុករលួយ។ ដោយ ALAC នឹងផ្តល់ប្រឹក្សាយោបល់ផ្នែកច្បាប់ និងផ្តល់ជំនួយដល់ជនរងគ្រោះ ឬសាក្សីនៃអំពើពុករលួយ ដើម្បីជួយប្រជាជនធ្វើការតស៊ូមតិផ្លាស់ប្តូរឲ្យមកជាភាពវិជ្ជមាន ប្រឆាំងអំពើពុករលួយនេះឲ្យកាន់តែមានប្រសិទ្ធភាព។
លោក ព្រាប កុល នាយកប្រតិបត្តិអង្គការតម្លាភាពកម្ពុជា (TIC) បានលើកឡើងថា ការដាក់សម្ពោធមជ្ឈមណ្ឌលតស៊ូមតិ និងប្រឹក្សាយោបល់ផ្នែកច្បាប់ (ALAC) នឹងអាចពង្រឹងសិទ្ធិអំណាចប្រជាជនក្នុងការចូលរួមប្រយុទ្ធប្រឆាំង នឹងអំពើពុករលួយឲ្យបានប្រសើរជាងមុន។ ការលើកឡើងបែបនេះក្នុងពិធីសម្ពោធមជ្ឈមណ្ឌលតស៊ូមតិ និងប្រឹក្សាយោបល់ផ្នែកច្បាប់ (ALAC) ដែលបានធ្វើឡើងនៅសណ្ឋាគារ កាំបូឌីយ៉ាណា នាព្រឹកថ្ងៃសុក្រ ទី២០ កញ្ញា នេះ ដោយមានវត្តមានចូលរួមពីមន្ត្រីក្រសួងយុត្តិធម៌ និងមន្ត្រីអង្គការសង្គមស៊ីវិលពាក់ព័ន្ធ រួមទាំងយុជនច្រើនរូបទៀត។
លោកព្រាប កុលបន្តថាការបង្កើតមជ្ឈមណ្ឌលតស៊ូមតិ និងប្រឹក្សាផ្នែកច្បាប់នៅក្នុងព្រះរាជាណាចក្រកម្ពុជា មានគោលបំណងបង្កើន លទ្ធភាពទទួលបាននូវយុត្តិធម៌ សម្រាប់ជនរងគ្រោះដោយសារអំពើពុករលួយ និងពង្រឹងសិទ្ធិអំណាចប្រជាពលរដ្ឋ ដើម្បីឲ្យពួកគេចូលរួមក្នុងការអនុវត្តយន្តការប្រឆាំងអំពើពុករលួយ និងតស៊ូមតិឲ្យកាន់តែមានប្រសិទ្ធិភាព។
លោកបន្តទៀតថា ការបង្កើតមជ្ឈមណ្ឌលនេះគឺសម្រួលដល់ប្រជាពលរដ្ឋកម្ពុជាឲ្យងាយស្រួលក្នុងការដាក់ពាក្យបណ្តឹង ពាក់ព័ន្ធអំពើពុករលួយ ហើយសព្វថ្ងៃនេះ ប្រជាជនកម្ពុជាប្រមាណ ៨០ភាគរយ មិនសប្បាយចិត្តនឹងអំពើពុករលួយ ហើយពួកគេរីករាយ ក្នុងការចូលរួមប្រឆាំងនឹងអំពើពុករលួយ។ប៉ុន្តែប្រជាជនប្រមាណ២០ភាគរយទៀត ប្រហែលជាមិនហ៊ាននិយាយ ឬក៏ពួកគេអាចប្រព្រឹត្តអំពើពុករលួយ។ លោកថាសព្វថ្ងៃនេះអំពើពុករលួយលែងជាអ្វីដែលពួកគេខ្លាច និងមិនហ៊ាននិយាយទៀតនោះទេ គឺគេមិនចង់បានឬក៏មិនចង់ឃើញអំពើពុករលួយរីកធំធាត់តទៅទៀត។
លោកស្រី Christina Kuhnel ប្រធាននាយកដ្ឋានកិច្ចសហប្រតិបត្តិការអភិវឌ្ឍន៍ បានលើកឡើងថា អំពើពុករលួយជាការរាំងស្ទះដល់ការអភិវឌ្ឍន៍សេដ្ឋកិច្ចជាតិ និងកិច្ចខិតខំប្រឹងប្រែងក្នុងការកាត់បន្ថយភាពក្រីក្រ ហើយអ្វីដែលសំខាន់ក្នុងពេលនេះ គឺការបង្កើនការជំរុញសន្ទុះមួយក្នុងការប្រយុទ្ធប្រឆាំងនឹង អំពើពុករលួយដល់ប្រជាពលរដ្ឋ។ទាក់ទិននឹងបញ្ហាខាងលើ លោក ហុង សម្បត្តិ មេធារី នៃមជ្ឈមណ្ឌលតស៊ូមតិនិងប្រឹក្សាយោបល់ផ្នែកច្បាប់ បានឲ្យដឹងថា ALAC នឹងពង្រឹងសិទ្ធអំណាចដល់ប្រជាពលរដ្ឋ ព្រមទាំងជំរុញពួកគាត់ឱ្យចូលរួមក្នុងដំណើរការដាក់ពាក្យបណ្តឹង ដោយប្រើប្រាស់នីតិវិធីរបស់ជាតិ ដើម្បីស្វែងរកយុត្តិធម៌ចំពោះការខូចខាតដែលបង្កឡើងដោយអំពើពុករលួយនៅកម្ពុជា។
លោក អ៊ិត ម៉ារ៉ាឌី អនុរដ្ឋលេខធិការក្រសួងយុត្តិធម៌ បានសម្តែងការគាំទ្រចំពោះអង្គការតម្លាភា សង្គមស៊ីវិលនិងដៃគូរពាក់ព័ន្ធដែលបានជម្រុញឲ្យមានការប្រយុទ្ធប្រឆាំងនិងអំពើពុករលួយ បើទោះជាស្ថិតក្នុងរូបភាពណាក៏ដោយ ។ លោកបន្តថា រាជរដ្ឋាភិបាលបានយកចិត្តទុកដាក់ខ្លាំងណាស់ក្នុងបញ្ហានេះ ដោយបង្កើតឲ្យមានអង្គភាពប្រឆាំងអំពើពុករលួយដែលបានការងាររបស់ខ្លួនសស្រាក់សស្រាំបំផុត។
លោកបានបញ្ជាក់ថា មិនថាតែនៅកម្ពុជាយើងនោះទេ ប្រទេសនៅលើពិភពលោក ប្រទេសណាក៏មានអំពើពុករលួយដែរ គ្រាន់តែវាសណ្ឋានខុសគ្នា តិច និងច្រើនតែប៉ុណ្ណោះមិនអាចបដិសេធន័បានទេជាមួយគ្នាយើងក៏មិនបណ្តែតបណ្តោយឲ្យវារីធំធាត់ស្រេចតែចិត្តបាននោះដែរ គឺត្រូវតែជម្រុញឲ្យមានការទុបស្កាត់ និងបំផុសឲ្យមហាជនចូលរួមប្រយុទ្ធប្រឆាំងនិងអំពើ ពុករលួយនេះ។
សូមបញ្ជាក់ថាALACបានពង្រីកវិសាលភាពរបស់ខ្លួនតាមរូបភាពជាច្រើន ដើម្បីឲ្យប្រជាពល រដ្ឋលោកបានដឹងនិងស្គាល់កាន់តែច្បាស់ ព្រមទាំងរាយការអំពីអំពើពុករលួយ។ ដូចនៅពេលបានពង្រាយពីលេខទូរស័ព្ទទំនាក់ទំនងរបស់ខ្លួន តាមរយៈរឺម៉កកង់បីជាច្រើនគ្រឿងក្នុងរាជធានីភ្នំពេញ នឹងគ្រោងពង្រីកនៅតាមបណ្តានានាទូទាំងប្រទេស៕
ដោយ៖ សស្អាត