ភ្នំពេញ៖ រដ្ឋាភិបាលអូស្ត្រាលី គ្រោងផ្តល់ហិរញ្ញប្បទានសរុបប្រមាណ៨៥.៣លានដុល្លារអាមេរិក សម្រា ប់កិច្ចប្រតិបត្តិការ ឆ្នាំ២០១៣-២០១៤ ។ដោយឡែក ឆ្នាំ២០១៤ អូស្ត្រាលី គ្រោងនឹងផ្តល់ហិរញ្ញប្បឥតសំណង ជាង១៣លានដុល្លារអាមេរិកសម្រាប់ កែលំអហេដ្ឋារចនាសម្ព័ន្ធដែលខូចខាតដោយទឹកជំនន់។ ការផ្តល់ហិរញ្ញប្បទាននេះត្រូវ បានបង្ហើបឱ្យដឹងក្នុងជំនួបពិភាក្សាមួយរវាង លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង លោកស្រី Alison BURROWS ឯកអគ្គរាជទូតអូស្រ្តាលីប្រចាំប្រទេសកម្ពុជា កាលពីថ្ងៃម្សិលមិញ។ លោក អូន ព័ន្ធមុនីរ័ត្ន បានមានប្រសាសន៍ថា រាជរដ្ឋាភិបាលអូស្ត្រាលី នៅតែបន្តតួនាទីយ៉ាងសំខាន់ក្នុងការចូលរួមអភិវឌ្ឍន៍ប្រទេសកម្ពុជា ក្នុងភាពជាដៃគូដ៏ល្អប្រសើរ និងស្មើភាព។ជាក់ស្តែង សម្រាប់ឆ្នាំ២០១៣-២០១៤ នេះ រដ្ឋាភិបាលអូស្ត្រាលី គ្រោងនឹងផ្តល់ហិរញ្ញប្បទាន ៨៥.៣លានដុល្លារអាមេរិក ដោយផ្តោតសំខាន់លើគម្រោងមួយចំនួន ដូចជា វិស័យសុខាភិបាល អប់រំនិងការបណ្តុះបណ្តាល កសិកម្ម អភិបាលកិច្ច ហេដ្ឋារចនាសម្ព័ន្ធ និងការបោសសម្អាតមីន។
លោក បន្តថា តាមរយៈដៃគូដ៏សំខាន់នេះ អូស្ត្រាលីបានជួយអភិវឌ្ឍន៍សេដ្ឋកិច្ចកម្ពុជា លើការលើកម្ពស់ហេដ្ឋារចនាសម្ព័ន្ធសម្រាប់តភ្ជាប់ផ្លូវដឹកជញ្ជូន ព្រមទាំងចូលរួមអភិវឌ្ឍន៍ធនធានមនុស្ស ដោយទទួលយកនិស្សិតកម្ពុជាទៅបន្តការសិក្សានៅប្រទេសអូស្ត្រាលីផងដែរ។ លោកស្រី Alison BURROWS ក៏បានវាយតម្លៃខ្ពស់ចំពោះទំនាក់ទំនងដ៏ល្អប្រសើរ រវាងរាជរដ្ឋាភិបាលកម្ពុជា ជាមួយនឹងអូស្រ្តាលីផងដែរ។ ដោយឡែកឆ្នាំ២០១៤ នេះ អូស្រ្តាលី គ្រោងផ្តល់ហិរញ្ញប្បទានឥតសំណងចំនួន៦.៦៨លានដុល្លារអាមេរិក សម្រាប់គម្រោងស្តារឡើងវិញហេដ្ឋារចនាសម្ព័ន្ធដែលខូចខាតដោយទឹកជំនន់ និង៦.៦៧លានដុល្លារអាមេរិកទៀត សម្រាប់គម្រោងកែលំអផ្លូវតាមជនបទជំហានទី២ ដែលគម្រោងទាំងពីរនេះ ចាប់ផ្តើមអនុវត្តក្នុងឆ្នាំ២០១៤នេះ។ គួរបញ្ជាក់ថា ចាប់តាំងពីឆ្នាំ១៩៩២ដល់ឆ្នាំ២០១១ រាជរដ្ឋាភិបាលអូស្រ្តាលីបានផ្តល់ហិរញ្ញប្បទានឥតសំណងដល់កម្ពុជា ចំនួន៥៧៣លានដុល្លារអាមេរិក ដែលជាហិរញ្ញប្បទានសហប្រតិបត្តិការផ្លូវការ អភិវឌ្ឍន៍ទាំងនោះ ត្រូវបានវិភាជន៍លើកម្មវិធីអភិវឌ្ឍន៍ទ្វេភាគី និងកម្មវិធីអភិវឌ្ឍន៍អនុតំបន់អាស៊ីបូព៌ា៕
ដោយ៖ ស.ស្អាត