ក្រចេះ៖ ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល លោក ណៅ ធួក បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមមន្រ្តីជលផលខេត្តក្រចេះដែលបានធ្វើការបង្រ្កាបបទល្មើសនេសាទនៅក្នុងខេត្តនេះបានជាបន្តបន្ទាប់កាត់បន្ថយបទល្មើសនេសាទឲ្យនៅកម្រិតទាបបំផុតតាមតែអាចធ្វើទៅបាន ។ លោក ណៅ ធួក បានមានប្រសាសន៍ កាលពីចុងសប្តាហ៍ទី៤ខែមិថុនានេះថា បទល្មើសនេសាទ ដែលកើតមាននៅក្នុងខេត្តក្រចេះគឺមានចំនួនមិនច្រើនទេ ដោយសារកម្លាំងសមត្ថកិច្ចចម្រុះបង្រ្កាបជាប្រចាំធ្វើឲ្យបទ ល្មើសយកចុះជាលំដាប់ ។
សូមបញ្ជាក់ថា នៅចុងខែមិថុនា ក្នុងសប្តាហ៍នេះខណ្ឌរដ្ឋបាលជលផលខេត្តក្រចេះបានបង្ក្រាបការនេសាទខុសច្បាប់នៅក្នុងតំបន់អភិរក្សជលផល ដោយសហការជាមួយនគរបាលប្រឆាំងបទល្មើសសេដ្ឋកិច្ចខេត្តកម្លាំងកងរាជអាវុធហត្ថខេត្ត និងសហគមន៍នេសាទហើយធ្វើការបង្ក្រាបបានទូកនេសាទចំនួន៥គ្រឿងដែលបានលួចធ្វើសកម្មភាពបណ្តែតមងចាប់ត្រីនៅក្នុងតំបន់អភិរក្សសត្វផ្សោតទន្លេមេគង្គ ខេត្តក្រចេះ ។សូមរំលឹកថា តាមអនុសាសន៍សម្តេចតេជោ សែន នាយករដ្ឋមន្រ្តី នៃព្រះរាជាណាចក្រកម្ពុជាធ្លាប់បានប្រកាសអំពីវិធានការដ៏តឹងរ៉ឹងដើម្បីប្រឆាំងនឹងបទល្មើសនេសាទខុសច្បាប់ នៅទូទាំងប្រទេសដោយមិនរាថយ និងជំរុញដល់មន្រ្តីជំនាញបន្តចុះអនុវត្តភារកិច្ចរបស់ខ្លួនឲ្យបានខ្ជាប់ខ្ជួននៅគ្រប់គោលដៅ ។
មន្រ្តីរាជរដ្ឋាភិបាល នាពេលកន្លងមកបានថ្លែងឲ្យដឹងថា ចាប់តាំងពីរាជរដ្ឋាភិបាលកម្ពុជាបានចេញបទបញ្ជាបង្ក្រាបបទល្មើសនេសាទ និងបានលុបចោលទាំងស្រុងនូវឡូត៍នេសាទទូទាំងប្រទេសការប្រមូលទិន្នផលត្រីមានការកើនឡើង ៕
ដោយ៖ ស.ស្អាត