ភ្នំពេញ៖ ក្នុងកិច្ចប្រជុំពេញអង្គគណៈរដ្ឋមន្រ្ដី កាលពីថ្ងៃទី២៥ ខែតុលា ប្រមុខរដ្ឋាភិបាល លោក ហ៊ុន សែន បាន ធ្វើការណែនាំ ដល់កងកម្លាំង ប្រដាប់អាវុធនៅតាមបណ្ដោយព្រំដែនកម្ពុជា-ថៃ ឲ្យរក្សាស្ថិរភាពនិងសន្តិសុខទោះ បីជា តុលាការឡាអេចេញសេចក្តីសម្រេចលើសំនុំរឿង បកស្រាយសាលក្រមឆ្នាំ១៩៦២ស្តីពីប្រាសាទព្រះវិហារយ៉ាងណាក៏ដោយ។ ជាមួយគ្នានេះ សម្ដេច ហ៊ុន សែន បញ្ជាក់ ថា ទោះជាលទ្ធផលយ៉ាងណា ក៏ទំនាក់ទំនង កម្ពុជា-ថៃនៅតែប្រកាន់ខ្ជាប់នូវជំហរមិត្តភាពនិងសហប្រតិបត្តិការល្អជាមួយគ្នាដដែល ។
នាយករដ្ឋមន្រ្ដីលោក ហ៊ុន សែន បានមានប្រសាសន៍ ថា សេចក្តីសម្រេចរបស់តុលាការអន្តរជាតិក្រុងឡាអេ ដែលនឹងប្រកាសនៅថ្ងៃទី១១ ខែវិច្ឆិកា ឆ្នាំ២០១៣ មានន័យយ៉ាងណាក៏ដោយ ហើយអំណោយផលដល់ព្រះរាជាណាចក្រកម្ពុជា ឬក៏ដល់ព្រះរាជាណាចក្រថៃឡង់ដ៍ ក៏រាជរដ្ឋាភិបាលទាំងពីរ នៅតែប្រកាន់ខ្ជាប់នូវជំហរមិត្តភាព និងសហប្រតិបត្តិការល្អ រវាងរដ្ឋាភិបាលទាំងពីរ កងទ័ពទាំងពីរ និងប្រជាជនទាំងពីរ ហើយដាច់ខាតរក្សាឱ្យបាននូវសុវត្ថិភាព សន្តិសុខ និងសន្តិភាព នៅតាមបណ្តោយព្រំដែនកម្ពុជា-ថៃ ។
គួរបញ្ជាក់ ថា តុលាការអន្ដរជាតិ ទីក្រុងឡាអេ នឹងប្រកាសសាលដីកា លើសំណុំរឿងប្រាសាទ ព្រះវិហារ នៅថ្ងៃទី១១ ខែវិច្ឆិកា ឆ្នាំខាងមុខនេះ ហើយលោកឧបនាយករដ្ឋមន្រ្ដី ហោ ណាំហុង រដ្ឋមន្រ្ដីក្រសួងការបរទេសកម្ពុជា នឹងដឹកនាំគណៈប្រតិភូ ទៅចូលរួមស្ដាប់ការប្រកាសសាលក្រមនេះ។នាយករដ្ឋមន្ត្រីថៃ កាលពីថ្ងៃទី១៧ ខែតុលាបានប្រកាស ថា នឹងធ្វើការជាមួយភាគីកម្ពុជាដើម្បីរក្សាសន្តិភាពនៅតាមព្រំដែនបើទោះជាសេចក្តីសម្រេចតុលាការអន្តរជាតិទីក្រុងឡាអេ មានលទ្ធផលយ៉ាងណាក៏ដោយ ហើយថា លោកស្រីយីងឡាក់នាយករដ្ឋមន្ត្រីថៃកំពុងរៀបចំការចរចាជាផ្លូវការមួយជាមួយភាគីកម្ពុជាមុនពេលតុលាការអន្តរជាតិមួយនេះប្រកាសសេចក្តីសម្រេចលើជម្លោះប្រាសាទព្រះវិហារ ៕ ដោយ ៖ រតនា