ភ្នំពេញ៖ រដ្ឋាភិបាលកម្ពុជា តាមរយៈរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានស្នើឱ្យអាមេរិកក្រ​សួងរ​ត​នា​គារ​អាមេរិក​ដែលមានជំនាញក្នុងការប្រឆាំងការសម្អាតប្រាក់និងហិរញ្ញប្បទានភេរវកម្ម ផ្តល់ជំនួយ​បច្ចេកទេស ដើម្បី​ពង្រឹងសមត្ថភាពស្ថាប័ន និងមន្ត្រីកម្ពុជា។ សំ​ណើររបស់កម្ពុជាធ្វើឡើងក្នុងជំនួបមួយ រវាង ឯកឧត្តម អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និង​ហិ​​រញ្ញវត្ថុ ជាមួយ លោក Daniel Glaser  ជំនួយការលេខាធិការទទួលបន្ទុកហិរញ្ញប្បទាន​ភេរវកម្ម នៃក្រ​សួងរតនាគារអាមេរិកកាលពីថ្ងៃម្សិលមិញ។លោក Daniel Glaser បានទទួលយកសំណើរនេះ ហើ​យ​សន្យាថា ក្រសួងរតនាគារអាមរិកនឹងពិនិត្យមើលលទ្ធភាពផ្តល់ជំនួ​យបចេ្ចកទេស​ជួយដល់​កម្ពុ​ជា ក្នុ​ង​ការកសាង​សមត្ថ​​​​​ភាពដល់មន្ត្រីក្នុងការអភិវឌ្ឍន៍ និងពង្រឹងវិស័យហិរញ្ញវត្ថុកម្ពុជាឱ្យ​កាន់តែ​រឹង​មាំ​​​និ​ង​មាន​ប្រសិទ្ធភាព លើ​ការងារ​​ប្រឆាំងការសម្អាតប្រាក់និងហិរញ្ញប្បទានភេរវកម្ម។ ឯកឧត្តម អូន ព័ន្ធមុនី​រ័ត្ន បានលើកឡើងថា វិស័យ​ហិរញ្ញវត្ថុ រួមមាន ធនាគារ និងគ្រឹះស្ថានហិរញ្ញវត្ថុ មិនមែ​ន​​ធ​នា​គារ គឺជាវិស័យមួយមានប្រវត្តិ​ និងការប្រឈមជា​​ច្រើន ដែលទាមទារឱ្យមានការពង្រឹងការអភិវឌ្ឍន៍ទាំងស្ថាប័ន ធនធានមនុស្ស និងភាពជឿទុកចិត្តនៃទីផ្សារ។

គណៈរដ្ឋមន្ត្រីកម្ពុជាទើបនឹងពិនិត្យនិ​ង​ពិ​ភា​ក្សា អំពីសេចក្តីព្រាង អនុក្រឹត្យស្តីពី ការបង្កកទ្រព្យ របស់ភេរវករ និងអង្គ​ការនានានាពេលថ្មីៗនេះ។យ៉ាងណាក៏ដោយ ក្រសួងរតនាគារអាមេរិកបានធ្វើការវាយតម្លៃខ្ពស់រួចជាស្រេចទៅ​ហើយ អំពីកិច្ចខិតខំប្រឹងប្រែងរបស់កម្ពុជា ក្នុងការអនុវត្តការងារប្រឆាំងការសម្អាតប្រាក់ និងហិរញ្ញប្បទានភេរវកម្ម ស្រប​តាមបទដ្ឋានអន្តរជាតិ និងអនុសាសន៍របស់ក្រុមការងារហិរញ្ញវត្ថុ ក្នុងនាមកម្ពុជាជាសមាជិករបស់ក្រុម​ប្រទេស​អាស៊ី​ប៉ាស៊ីហ្វិក និងអង្គការសហប្រជាជាតិ។ ឯកឧត្តម អូន ព័ន្ធមុនីរ័ត្ន បានបន្ថែមថា ក្នុងតួនាទីជាសមាជិកក្រុម​ប្រទេស​​​អាស៊ីប៉ាស៊ីហ្វិក ស្តីពីការប្រឆាំងការសម្អាតប្រាក់ កម្ពុជាបានធ្វើកិច្ចការជាច្រើន ដូចជា បង្កើតឱ្យមានអង្គ​​​ភាព​ស៊ើ​បការណ៍ហិរញ្ញវត្ថុកម្ពុជា បង្កើតច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវក​ម្ម និងដាក់ឱ្យ​​​​​អនុវត្ត​​​​​ប្រកា​ស​នានាស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។ជាពិសេសនាពេលថ្មីៗ​​​​​កន្លង​​ទៅ​​នេះ ដើម្បីអនុវត្តន៍ការងារឱ្យបានពេញលេញ និងប្រកបដោយប្រសិទ្ធភាពខ្ពស់ ស្របតាមសេចក្តីសម្រេចរបស់ក្រុម​​ប្រឹក្សា​​សន្តិសុខអង្គការសហប្រជាជាតិ កម្ពុជាបានអនុម័តលើអនុក្រឹត្យស្តីពីការបង្កកទ្រព្យមូលនិធិរបស់ភេរវករ និង​​អង្គការភេរវកម្មនានាផងដែរ។

ដោយ៖ រតនា