ភ្នំពេញ៖ក្រុមអ្នកជំនាញស្រាវជ្រាវពីការប្រឈមនានាលើសន្តិសុខមនុស្ស បានបង្ហាញពីការព្រួយបារម្ភចំពោះស្ថានភាពបច្ចុប្បន្នក្នុងសង្គមកម្ពុជា ដែលនឹងអាចជះឥទ្ធិពលអាក្រក់ដល់សន្តិសុខសុវត្ថិភាពរបស់ប្រជាពលរដ្ឋបើទោះបីជាប្រទេសជាតិមានសន្តិភាពក៏ដោយ។ក្រុមអ្នកជំនាញស្រាវជ្រាវទាំងស្ថាបន័រដ្ឋ និងខាងអង្គការក្រៅរដ្ឋាភិបាលបានបើកការពិភាក្សាជាបន្ទាន់មួយ ដើម្បីធ្វើការស្រាវជ្រាវស្វែងរកបញ្ហាប្រឈមនានានៅក្នុងសង្គមកម្ពុជានឹងលើកជាអនុសាសន៍ដាក់ជូនរាជរដ្ឋាភិបាលធ្វើការដោះស្រាយសំដៅធានាពលរដ្ឋរស់នៅប្រកបដោយសុវត្ថិភាពនិងគ្មានការភ័យខ្លាច។ កិច្ចពិភាក្សានេះបានធ្វើឡើងចំពេលដែលប្រទេសកម្ពុជាកំពុងជួបបញ្ហាការតវ៉ាស្ទើរជារៀងរាល់ថ្ងៃពីក្រុមបាតុករពាក់ព័ន្ធនឹងរឿងជំលោះដីធ្លី និងស្ថានភាពនយោបាយក្រោយពេលបោះឆ្នោត ដែលនេះជាផ្នែកមួយធ្វើឲ្យពលរដ្ឋមានការភ័យខ្លាចផងដែរ។
ថ្លែងក្នុងសិក្ខាសាលាស្តីពីការប្រឈមនានាលើសន្តិសុខមនុស្សនៅកម្ពុជា កាលពីព្រឹកថ្ងៃទី២៦ ខែធ្នូ ២០១៣ នៅសណ្ឋាគារកាំបូឌីយ៉ាណា រាជធានីភ្នំពេញ លោក ពូ សុធីរៈ នាយកវិទ្យាស្ថានខ្មែរសម្រាប់សហប្រតិបត្តិការ និងសន្តិភាព មានប្រសាសន៍ថា នេះជាការចាំបាច់មួយដើម្បីឲ្យមានការដោះស្រាយជាបន្ទាន់ បើមិនដូច្នោះទេបញ្ហាប្រឈមដែលកំពុងតែកើតឡើងនេះ នឹងកាន់តែជះឥទ្ធិពលអាក្រក់ខ្លាំងឡើងដល់អសន្តិសុខមនុស្សជាតិដូចជា៖ បញ្ហាវិស័យសេដ្ឋកិច្ច, ការលុបបំបាត់ភាពក្រីក្រ,ការបាត់បងដីធ្លី, ការថែទាំសុខភាព, អំពើពុករលួយ, និងវិស័យតុលាការជាដើម។លោកបញ្ជាក់ថា គំនិតនៃការផ្តល់កិច្ចការពារដល់ប្រជាពលរដ្ឋនេះ គឺជាការទទួលខុសត្រូវជាចម្បងរបស់រដ្ឋដែលត្រូវមានដំណោះស្រាយនិងចាត់វិធានការណ៍សមស្រប។លោក ផៃ ស៊ីផាន រដ្ឋលេខាធិការ និងជាអ្នកនាំពាក្យរបស់ទីស្តីការគណៈរដ្ឋមន្រ្តីកម្ពុជា បានច្រានចោលនូវចំនុចមួយចំនួនដែលបានលើកឡើងខាងលើនេះ ហើយបញ្ជាក់ថា រាជរដ្ឋាភិបាលកំពុងខិតខំលើកស្ទួយធ្វើឲ្យស្ថានភាពទាំងនោះកាន់តែប្រសើរឡើង។
លោកបានពន្យល់ថា ចំពោះវិស័យសេដ្ឋកិច្ចនៅកម្ពុជាកំពុងតែមានកំណើនទៅមុខដូច្នេះសន្តិសុខមនុស្សទៅនឹងវិស័យសេដ្ឋកិច្ចគ្មានការបរម្ភទេ ចំណែកលើវិស័យតុលាការ និងវិស័យដីធ្លីរាជរដ្ឋាភិបាលកំពុងធ្វើការកែទម្រង់ហើយ ដើម្បីឲ្យពលរដ្ឋរស់នៅដោយគ្មានការភ័យខ្លាចនឹងទទួលយុត្តិធម៌តាមផ្លូវច្បាប់ពេញលេញ។ដោយឡែកទាក់ទងនឹងបញ្ហាសន្តិសុខមនុស្សទៅស្ថានភាពនយោបាយនាពេលបច្ចុប្បន្ននេះ រាជរដ្ឋាភិបាលក៏កំពុងព្រួយបារម្ភដែរដោយហេតុថាសេរីភាពនៃការបញ្ចេញយោបល់មានគ្រប់គ្រាន់ ប៉ុន្តែទិដ្ឋភាពនៃការបញ្ចេញមតិបានហួសពីដែនច្បាប់ដែលបានកំណត់ដោយមានគណបក្សនយោបាយនិងអង្គការមួយចំនួនបានអនុវត្តល្មើសហើយយកប្រជាពលរដ្ឋធ្វើជាខែលដើម្បីបំពេញមហិច្ឆតារបស់ខ្លួន។សូមបញ្ជាក់ថា កិច្ចពិភាក្សារយៈពេលពេញមួយថ្ងៃនេះ នឹងប្រមូលយកបញ្ហាប្រឈមធំៗដែលត្រូវបានរកឃើញយកទៅបោះពុម្ភផ្សាយចែកជូនដល់សាធារណៈជន និងថ្នាក់ដឹកនាំគ្រប់ក្រសួងស្ថាប័ន របស់រដ្ឋ ដើម្បីធ្វើការកែលម្អឱ្យល្អប្រសើរឡើងវិញ៕ ដោយ ៖ ភីនរ៉ា