ភ្នំពេញ៖ ករណីនៃកត្តាហានិភ័យគ្រោះថ្នាក់ចរាចរណ៍តែងតែកើតមានឡើងជាយថាហេតុ ដោយសារតែការធ្វេស ប្រហែលក្នុងពេលដែលកំពុងបើកបរយានយន្ត,ការមិនយោគយល់អធ្យាស្រ័យ និងការមិនគោរពច្បាប់ចរាចរណ៍
ផ្លូវគោកជាដើម។ នេះបើតាមប្រសាសន៍របស់លោក ខៀវ កញារីទ្ធ រដ្ឋមន្ត្រីក្រសួងព័ត៌មានថ្លែងនៅថ្ងៃទី ២១ វិច្ឆិកា ២០១៣ នេះ ក្នុងបើកវគ្គបណ្តុះបណ្តាលស្តីពី «កត្តាហានិភ័យលើការមិនពាក់មួកសុវត្ថិភាព និងការបើកបរក្រោម ឥទិ្ធពលនៃគ្រឿងស្រវឹង» ដែលប្រព្រឹត្តរយៈពេលពីរថ្ងៃ គឺចាប់ថ្ងៃទី ២១-២២ វិច្ឆិកា នៅទីស្តីការក្រសួង។
លោករដ្ឋមន្រ្តីបន្តថា យើងត្រូវគិតគូរយកចិត្តទុកដាក់ឱ្យខ្លាំងពីសុខភាពសុវត្ថិភាព និងអាយុជីវិត ដែលផ្តើមចេញពីស្ថានភាពនៃគ្រោះថ្នាក់ចរាចរណ៍ដែលគួរឱ្យតក់ស្លុតបំផុតនៅក្នុងប្រទេសកម្ពុជាយើង។ លោកបានបន្ថែមថា បញ្ហាគ្រោះថ្នាក់ចរាចរនេះ បើយើងពិនិត្យ និងតាមដានក្នុងរយៈពេលប៉ុន្មានឆ្នាំ ចុងក្រោយនេះ ទិន្នន័យអ្នកស្លាប់ និងអ្នករងរបួសធ្ងន់ស្រាល គឺបានកើនឡើងគួរឱ្យកត់សម្គាល់ ដែល អាចចាត់ទុកថាជាសោកដកម្មដ៏រន្ធត់បំផុតសម្រាប់ប្រជាពលរដ្ឋខ្មែរ។
ឆ្លៀតក្នុងឱកាសនោះ លោករដ្ឋមន្ត្រី ក៏បានបញ្ជាក់ថា «បន្តិចទៀតនេះ ច្បាប់ចរាចរណ៍ផ្លូវគោកថ្មីនេះ នឹងតម្រូវឲ្យម៉ូតូមួយគ្រឿងមនុស្សជិះបានតែបីនាក់ប៉ុណ្ណោះ ក្នុងនោះមាន ឪពុក-ម្ដាយ និងកូនតូចម្នាក់។ ហើយនៅក្នុងចំណោមអ្នកបើកបរ និងអ្នកជិះម៉ូតូចំនួន៣នាក់នោះ គឺត្រូវតែពាក់មួកសុវត្ថិភាព ដូចគ្នា»។
លោក ខៀវ កញារីទ្ធ រដ្ឋមន្ត្រីក្រសួងព័ត៌មាន បានមានគំនិតសុទិដ្ឋិនិយមមួយថា ការចូលរួម យ៉ាងសកម្មផុលផុសពីយុវជន ពិតជាកម្លាំងចលករដ៏មានប្រសិទ្ធភាពក្នុងការផ្សព្វផ្សាយបន្ត ក៏ដូចជា ធ្វើ់ការអប់រំដល់យុវជន និងប្រជាជន ជាពិសេសអ្នកប្រើបា្រស់ផ្លូវទាំងអស់ឱ្យផ្លាស់ប្តូរឥរិយាបថដែលធ្លាប់តែមិនគោរពច្បាប់ ងាកមកប្រកាន់យកនូវឥរិយាបថជាវិជ្ជាមានឡើងវិញ ដើម្បីធានាសណ្តាប់ធ្នាប់ ល្អលើការសម្រេចឱ្យខាតតែបាននូវផែនការសកម្មភាពជាតិទស្សវត្សរ៍សុវត្ថិភាពចរាចរណ៍ផ្លូវគោកឆ្នាំ ២០១២-២០២០ខាងមុខនេះ។
លោក ឈួន វ៉ន តំណាងគណៈកម្មាធិការ សុវត្ថិភាពចរាចរណ៍ផ្លូវគោកបានប្រាប់ឱ្យដឹងថា បច្ចុប្បន្ននេះ អត្រាគ្រោះថ្នាក់ចរាចរណ៍នៅក្នុងប្រទេសកម្ពុជា មានការកើនឡើងគួរ ឲ្យព្រួយបារម្ភដែលកើតចេញពីកត្តាចំបងធំៗចំនួន៣ គឺរួមមាន៖ ទី១ កត្តាមនុស្ស (ការមិនពាក់ពួកសុវត្ថិភាព និងការបើកក្នុងអាការៈស្រវឹង) ទី២ កត្តាយានយន្តមធ្យោបាយធ្វើដំណើរ និងទី៣ ផ្លូវថ្នល់ (មិនស្របតាម លក្ខណៈបច្ចេកទេសស្តង់ដារសាងសង់) ជាដើម។
លោកបន្តថា ផលប៉ះពាល់នៃការមិនពាក់មួកសុវត្ថិភាព គឺមានភាពធ្ងន់ធ្ងរនៃរបួសផ្នែកក្បាលដែលឈានដល់ពិការ និងស្លាប់បាន, ប្រឈមចំពោះច្បាប់ចរាចរ,ចំណោយថវិកាច្រើនក្នងការព្យាបាល, ខាតបង់ពេលវេលា និងទ្រព្យសម្បត្តិ និងគ្មានសុវត្ថិភាពផ្នែកក្បាល។
លោកបន្ថែមថា ប្រៀធៀបជាមួយប្រទេសនៅអាស៊ីច្បាប់ ចរាចរណ៍ផ្លូវគោករបស់យើងពិន័យតិចណាស់សម្រាប់អ្នកមិនពាក់មួយសុវត្ថិភាព ហើយប្រជាជនយើង ជាពិសេសយុវជនគាត់អាងថា ពិន័យត្រឹមតែបីពាន់រៀល មានលក្ខណៈតិចតួចសម្រាប់គាត់ អញ្ជឹងគាត់នៅតែអត់ពាក់មួកសុវត្ថិភាព ដូច្នេះយើងមិនអាចបណ្ដោយឲ្យគាត់ធ្វើបែបនេះបានទៀតទេគឺច្បាប់ថ្មីរបស់យើងនឹងពិន័យ១.៥០០រៀល សម្រាប់អ្នកមិនពាក់មួកសុវត្ថិភាព។
លោក ឈួន វ៉ន តំណាងគណៈកម្មាធិការសុវត្ថិភាពចរាចរណ៍ផ្លូវគោក បានបញ្ជាក់ថា ការបង្តើតច្បាប់ថ្មីដែលសភា មិនទាន់អនុម័ត នឹងពិន័យលើអ្នកធ្វើដំណើរមិនពាក់សុវត្ថិភាពចំនួន១៥.០០០រៀល ដើម្បីចូលរួមកាត់បន្ថយគ្រោះថ្នាក់ចរាចរណ៍ ដែលប៉ះពាល់ខ្លាំងត្រង់ក្បាល និងអាចឈានដល់ការស្លាប់ បាត់បងជីវិតដោយសារការមិនពាក់មួកសុវត្ថិភាពដែលមានភាគរយច្រើន។
បើយោងតាមរបាយការណ៍របស់គណៈកម្មាធិការ សុវត្ថិភាពចរាចរណ៍ផ្លូវគោក បានបង្ហាញឲ្យដឹងថា គ្រោះថ្នាក់ចរាចរណ៍ កាលពីឆ្នាំ២០១២ បានសម្លាប់មនុស្សជិត ២.០០០នាក់ និងមានជនរងគ្រោះប្រមាណជា ១៥.៦១៥នាក់ ហើយថវិកាជាតិខាតបង់មានចំនួន ៣២០ លានដុល្លារ ក្នុងនោះ យុវជនជាអ្នកប្រឈមខ្លាំងជាងគេពីអាយុ៣០ឆ្នាំចុះក្រោម៕ ដោយ៖ មករា