ភ្នំពេញ ៖ វេទិកាថ្នាក់ជាតិលើកទី៣ ស្តីពីការប្រែប្រួលអាកាសធាតុ ក្រោមប្រធានបទ«ធ្វើសកម្មភាពឆ្ពោះទៅការអភិវឌ្ឍដោយចីរភាពក្នុងបរិបទប្រែប្រួលអាកាសធាតុ»គ្រោងនឹងរៀបចំធ្វើនៅថ្ងៃទី០៥ វិច្ឆិកា សប្តាហ៍ក្រោយនេះហើយ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា។បើតាម លោក ទិន ពន្លក អគ្គនាយករង នៃក្រសួងបរិស្ថាន ថ្លែងក្នុងសន្និសីទសារព័ត៌មានកាលពីព្រឹកថ្ងៃទី៣១ តុលា នេះថា វេទិកាថ្នាក់ជាតិលើកទី៣ស្តីពីការប្រែប្រួលអាកាសធាតុ ដែលចាប់ផ្តើមពីថ្ងៃទី០៥ ដល់ថ្ងៃទី០៧ ខែវិច្ឆិកា ខាងមុខនេះ នឹងផ្តោតជាសំខាន់លើការបញ្រ្ជាបការប្រែប្រួលអាកាសធាតុទៅក្នុងវិស័យពាក់ព័ន្ធ ការងាររៀបចំផែនការឆ្លើយតបនឹងការប្រែប្រួលអាកាសធាតុ និងការជម្រុញការអនុវត្តផែនការទាំងនេះ សំដៅគាំទ្រការអភិវឌ្ឍដោយចីរភាពក្នុងបរិបទប្រែប្រួលអាកាសធាតុ។
វេទិការយៈពេល៣ថ្ងៃនោះនឹងធ្វើឡើងនៅអគាសន្តិភាព នៃទីស្តីការគណៈរដ្ឋមន្រ្តី និង សណ្ឋាគារសូហ្វីតែលភ្នំពេញភូគីត្រាដោយមានការចូលរួមពីអង្គការជាតិ អន្តរជាតិ ដែលធ្វើការងារពាក់ព័ន្ធនឹងបរិស្ថាន ព្រមទាំងប្រទេសធំៗនៅលើពិភពលោកប្រមាណជាង១ម៉ឺននាក់។សូមបញ្ជាក់ថា នាពេលបច្ចុប្បន្ននេះ ការប្រែប្រួលអាកាសធាតុ គឺជាបញ្ហាប្រឈមថ្មីមួយរបស់ពិភពលោក ដែលអាចគំរាមកំហែង ធ្វើឲ្យខូចខាតដល់ការអភិវឌ្ឍន៍សេដ្ឋកិច្ច-សង្គម ដែលវាតម្រូវឲ្យមានការគិតគូរយកចិត្តទុកដាក់នៅក្នុងគ្រប់ទិដ្ឋភាព នៃការអភិវឌ្ឍរបស់ប្រទេសជាតិនីមួយៗ។សម្រាប់ប្រទេសកម្ពុជាវេទិកាថ្នាក់ជាតិស្តីពីការប្រែប្រួលអាកាសធាតុនេះ ធ្លាប់បានធ្វើឡើងចំនួនពីរលើករួចមកហើយ ដែលលើកទី១ ធ្វើឡើងកាលពីខែតុលា ឆ្នាំ២០០៩ និងលើកទី២ ធ្វើឡើងនៅខែតុលា ឆ្នាំ២០១១៕ ដោយ ៖ សស្អាត