ភ្នំពេញ៖ បាតុកម្ម រយៈពេល ១៥ថ្ងៃ របស់កម្មករ-កម្មការិនីរោងចក្រដែលបានធ្វើការទៀមទារ ដំឡើងប្រាក់ ឈ្នួលអប្បរិមាណ១៦០ដុល្លារនោះបានធ្វើឲ្យរោងចក្រនៅកម្ពុជាខាតបង់ថវិកាប្រមាណ ជា ២០០លានដុល្លារ ខាតបង់សម្រាប់ការនាំ ចេញទៅកាន់ប្រទេសក្រៅលើកការបញ្ជាទិញទំនិញ របស់ក្រៅប្រទេស និងធ្វើឲ្យខូត ខាតរោងចក្រចំនួន ជាង 75ដុល្លារ ។ នេះបើយោងតាមប្រធានសមាគមន៏រោងចក្រកាត់ដេរកម្ពុជា (GMAC) លោក វ៉ាន់ ស៊ូអៀងនៅក្នុងសន្និសីទកាសែត ស្តីពីទំំនាក់ទំនងឧស្សាហ៍កម្មនិងប្រាក់ឈ្នួល នៅរសៀលថ្ងៃទី ៦ ខែមករា ឆ្នាំ២០១៤ នេះ ។
លោក វ៉ាន់ ស៊ូអៀងបានបន្ថែមថា ព្រមជាមួយគ្នានេះ មានរោងចក្រ៥ទៅ៧ ដែលបានដំណើរនៅក្នុងប្រទេសកម្ពុជាអស់រយៈពេលជាច្រើនឆ្នាំនោះ កំពុងពិចារណាបង្វែរទិសដៅរបស់ខ្លួនទៅវិនិយោគនៅប្រទេសក្បែរខាង ហើយ មានរោងចក្រប្រមាណជាង ១០ដែលមានបំណងមកវិនិយោគរោងចក្រនៅកម្ពុជា បានពន្យាពេលមកវិនិយោគនៅទីនេះផងដែរ ។ លោក វ៉ាន់ ស៊ូអៀង បានបញ្ជាក់ថា និយោជកមើលឃើញថា អ្នកបង្កការអុកឡុក រោងចក្ររបស់ពួកអ្នកវិនិយោគបរទេស គឺវាមិនល្អទាល់តែសោះ ព្រោះធ្វើឲ្យគេភ័យ ហើយបើមានបំភិតបំភ័យ បន្តទៀតនោះ ធ្វើឲ្យអ្នកវិនិយោគទាំងនោះគេលែងហ៊ាននៅស្រុកខ្មែរ ទៀតហើយ។ការចរចាររឿងប្រាក់ខែ គឺជាការត្រឹមត្រូវហើយ ប៉ុន្តែការចរចារនោះ គឺត្រូវតែគោរពច្បាប់នៃការចរចារ មិនមែនវាយគ្នា មិនមែនទៅគប់គេ មិនមែនទៅរំលោភសិទ្ធិគេ មិនមែនបង្ខំឲ្យគេចរចារនោះទេ។
លោកបានបន្ថែមថា រហូតមកដល់ថ្ងៃទី៦ ខែមករា នេះ មានកម្មករ៨០ភាគរយ ហើយនៅតាមបណ្តាលខេត្តបានចូលបំរើការងារជាធម្មតាវិញ ដោយឡែកនៅរាជធានីភ្នំពេញ មានកម្មករប្រហែលជា ៣០ភាគរយប៉ុណ្ណោះបានចូលធ្វើការ ប៉ុន្តែរោងចក្រនៅសួនកាណាឌីយ៉ានិងផ្លូវលេខ ២១ នៅមិនប្រាកដថា តើមានកម្មករចូលធ្វើប៉ុន្មាននាក់នោះទេ ដោយកម្មករនៅ មានភាពភ័យខ្លាច ។ លោក វ៉ាន់ ស៊ូអៀង បានបន្ថែមថា ៖ កាលពីការចរចារលើកមុន ខាងនិយោជក យល់ព្រមតំឡើងដល់៩៥ដុល្លារ ប៉ុន្តែដោយសារ ខាងរដ្ឋចង់ជួយខាងកម្មករ ក៏បានបង្ខំយើងបន្ថែមដល់១០០ដុល្លារ ដោយមិនទាន់គិតពីប្រាក់បន្ថែមផ្សេងៗ។ លោក បានបញ្ជាក់ទៀតថា រោងចក្រជាច្រើន មិនព្រមតំឡើងប្រាក់ខែដល់ ១៦០ដុល្លារ តាមសំណើររបស់កម្មករនោះ ទេ ព្រោះជាចំនួនមួយដ៏ច្រើន ដែលមិនអាចទទួលយកបាន ហើយ កម្មករនៅតែបន្តធ្វើបាតុកម្មទាមទារ នោះនិយោជកនិងធ្វើការផ្លាស់ប្តូរទៅ ប្រទេសជិតខាង ដែលមានប្រាក់ឈ្នួលអប្បរិមាណទាបជាងនៅកម្ពុជា៕ ដោយ៖ អភិរក្ស