ភ្នំពេញៈ ក្រុម​មេដឹក​នាំ​ហិរញ្ញ​វត្ថុ ពី​បណ្តា​ប្រទេស​សេដ្ឋកិច្ច២០​ធំ​បំផុតលើ​លោក បាន​កំណត់​គោល​ដៅ​បន្ថែម​កំណើន​សេដ្ឋកិច្ច ២​ពាន់កោដិដុល្លារ​ទៀត ក្នុងរ​យៈ​ពេល​៥ឆ្នាំ ខាង​មុខនេះ ។អំឡុងពេលនោះ ពួកគេមាន​គោលដៅ បង្កើនផលិតផល​ក្នុង​ស្រុក រហូតដល់ទៅ២% បន្ថែម​ពី​លើកំណើនសេដ្ឋកិច្ច​បច្ចុប្បន្ន ។ ហើយពួកគេរំពឹងថា នឹងអាចបង្កើត​ការងារថ្មី ១លាន បន្ថែមទៀត ។ គោលដៅនេះ ត្រូវបានប្រកាស​ឱ្យដឹង ក្នុងកិច្ចប្រជុំ កាលពីចុង​សប្តាហ៍​កន្លងទៅនេះ នៅទីក្រុង​ស៊ីដនីយ៍ ប្រទេសអូស្ត្រាលី ។

រដ្ឋមន្ត្រីក្រសួងហិរញ្ញវត្ថុអាមេរិក លោកចាកុប លីវ (Jacob Lew) បាននិយាយថា កិច្ចព្រមព្រៀង​នេះ មានសារសំខាន់ណាស់ ដើម្បីបង្កើតទំព័រប្រវត្តិសាស្ត្រថ្មី សម្រាប់​សេដ្ឋកិច្ចពិភពលោក ។ លោក​បាន​និយាយក្នុងសេចក្តីថ្លែងការណ៍មួយថា”សមាជិក G20 បាននិយាយយ៉ាងច្បាស់ថា នឹងជំរុញ​របៀប​វារៈ​កំណើន​សេដ្ឋកិច្ច​ពិភពលោក​នេះ” ។ដោយឡែក រដ្ឋមន្ត្រីក្រសួងការ បរទេស អូស្ត្រាលី បានមានប្រសាសន៍ថា “យើងបានកំណត់តួលេខ​នេះ ជាលើកដំបូង ព្រោះការកំណត់តួលេខពិតប្រាកដនេះ វាធ្វើឱ្យ​យើង​ប្រឹងប្រែងឱ្យសម្រេចលទ្ធផល “​។

​គួរបញ្ជាក់ថាក្រុមប្រទេសG20 រួមមានសះភាពអឺរ៉ុប និងប្រទេស១៩ដូចជា អាហ្វ្រិកខាងត្បូង, អាមេរិក, កាណាដា,ម៉ិកស៊ិក, ប្រេស៊ីល, អាហ្សង់ទីន, ចិន, ជប៉ុន, កូរ៉េខាងត្បូង, ឥណ្ឌា, ឥណ្ឌូនេស៊ី, រូស្ស៊ី, ទួរគី, អាល្លឺម៉ង់, បារាំង, សហរាជាណាចក្រ អង់គ្លេស , អ៊ីតាលី, អារ៉ាប៊ី សាអ៊ូឌីត, អូស្ត្រាលី។នៅ​ឆ្នាំ ២០១៣ រូស្ស៊ី ជាប្រធាន ខណៈដែលនៅឆ្នាំ ២០១៤ លោកថូនី អាប បត(Tony Abbott) នាយក​រដ្ឋ​មន្ត្រីអូស្ត្រាលី ជាប្រធាន ។ ប្រទេសនីមួយៗ នឹងបញ្ជូនយុទ្ធសាស្ត្រសេដ្ឋកិច្ចលម្អិត ក្នុងកិច្ចប្រជុំ​កំពូល​របស់G20  នៅខែវិច្ឆិកា ឆ្នាំ២០១៤ ខាងមុខនេះ ៕ ដោយ៖ ភីន រ៉ា