ភ្នំពេញ៖  អាជ្ញាធររាជធានីភ្នំពេញអាចអនុញ្ញាតឲ្យគណបក្សសង្គ្រោះជាតិធ្វើមហាបាតុកម្មនៅ​ពេលថ្ងៃ ប៉ុន្តែ​បដិសេធចំពោះការបន្តធ្វើមហាបាតុកម្មនៅពេលយប់ ដើម្បីធានាការរក្សាសន្តិ​សុខ សុវត្ថិភាពជូនក្រុម​បាតុ​ករ និងប្រជាពលរដ្ឋរស់នៅក្នុងរាជធានីភ្នំពេញ។

       ក្នុងកិច្ចប្រជុំរវាងអាជ្ញាធររាជធានីភ្នំពេញ និងតំណាងគណៈបក្សសង្គ្រោះជាតិនៅព្រឹកថ្ងៃ​ទី ១១ខែកញ្ញា​នេះ លោកឃួង ស្រេង អភិបាលរងរាជធានីភ្នំពេញបានបញ្ជាក់ថា ការស្នើសុំរបស់គណៈបក្ស​សង្គ្រោះជាតិ​ក្នុង​ការធ្វើមហាបាតុកម្មនៅពេលយប់នោះ គឺហួស​ពីដែនសមត្ថកិច្ចរបស់សាលារាជធានីភ្នំពេញ ដោយរង់ចាំការ​សម្រេច​ពី​ក្រសួងមហាផ្ទៃជាមុន​សិនទើបសាលារាជធានីភ្នំពេញអនុវត្តតាម។ ការលើកឡើងដូច្នេះគឺឆ្លើយតប​ទៅ​នឹង​សំណើរ​របស់គណបក្ស​សង្គ្រោះជាតិដែលគ្រោងធ្វើមហាបាតុកម្មអហិង្សារយៈពេលបីថ្ងៃ គឺ ចាប់ថ្ងៃ​ទី​១៥​រហូតដល់ថ្ងៃទី១៧ខែកញ្ញា ដើម្បីទាមទារឲ្យមានការបង្កើតគណៈកម្មការឯករាជ្យ​ពិសេស​ក្នុងការដោះ​ស្រាយ​​​​​​លទ្ធ​ផល​បោះឆ្នោតជ្រើសរើសតំណាងរាស្រ្តអណត្តិទី៥ កាលពីថ្ងៃទី២៨ខែកក្កដាកន្លងទៅនេះ។

លោកឃួង ស្រេងអភិបាលរងសាលារាជធានីភ្នំពេញបញ្ជាក់ថា តាមច្បាប់ធ្វើបាតុកម្មឬ​កូដ្ឋកម្ម​នៅកម្ពុជា គឺ​អនុញ្ញាត​​ឲ្យធ្វើតែពេលថ្ងៃប៉ុណ្ណោះគឺចាប់ពីម៉ោង៦ព្រឹក រហូតដល់ម៉ោង៦​ល្ងាចដូច្នេះការសុំបន្តធ្វើមហា​បាតុកម្ម​នៅពេលយប់ គឺជាការខុសនឹងច្បាប់ដែលបាន​កំណត់និងលើពីដែនសមត្ថកិច្ចរបស់​សាលារាជធានី​​ភ្នំពេញ។

ទោះជាយ៉ាង​​​​​​​​​​​​នេះក្តីលោកអភិបាលរងបានស្នើឲ្យតំណាងគណៈបក្សសង្គ្រោះជាតិកំណត់ផែន​ការ​ឲ្យបានជាក់​លាក់​​ទាំងចំនួនបាតុករចូលរួមនៅពេលយប់និងពេលថ្ងៃព្រមទាំងផែនការ​ការពារសន្តិសុខសុវត្ថិភាពនិងការ​ស្នាក់​នៅរបស់ក្រុមបាតុករពិសេស សុខភាព និងអនាម័យដើម្បីធ្វើជាកំណត់ហេតុបញ្ជូនទៅ​ក្រសួងមហាផ្ទៃ​ធ្វើការ​សម្រេច។

លោកបញ្ជាក់ថាការអនុវត្តដូច្នេះដើម្បីឈានទៅការដោះស្រាយជាមួយគ្នាដោយសន្តិវិធីស្របតាមលទ្ធិប្រជា​ធិប​​​​តេយ្យ។ម្យ៉ាងវិញទៀតគឺបានបង្កលក្ខណៈងាយស្រួលដល់​អាជ្ញាធរ​ក្នុងការរៀបចំកងកម្លាំងដើម្បីការពារ​សន្តិ​សុខ​សណ្តាប់ធ្នាប់និងសុវត្ថិភាពជូនប្រជាពល​រដ្ឋប្រកបដោយប្រសិទ្ធិភាពនិងគ្មានអំពើហិង្សាកើតឡើង។

ដោយ ៖ សស្អាត