ភ្នំពេញ៖ កម្ពុជាគ្រោងនឹងបង្កើតឲ្យមាន បុណ្យជាតិសំខាន់២ទៀត គឺបុណ្យដំរី និង បុណ្យទន្លេ នៅក្នុងឆ្នាំ២០១៤ នេះតទៅ ដើម្បីទាកទាញអ្នកទេសចរណ៍អន្តរជាតិ និងដើម្បីកាត់បន្ថយភាពក្រីក្រជូនប្រជាពលរដ្ឋ។អគ្គនាយករង ទេសចរណ៍ លោក ភួង វណ្ណៈ បានថ្លែងបែបនេះក្នុងបទអន្តរាគមន៍មួយស្តីពីការផ្សព្វផ្សាយផលិតផលនិងសក្តានុ ពលទេសចរណ៍ ក្នុងសន្និបាទបូកសរុបការងាររបស់ក្រសួងវប្បធម៌ និង វិចិត្រសិល្បៈ កាលពីរសៀលថ្ងៃទី៤កុម្ភៈ ។
លោកថារាជរដ្ឋាភិបាលគ្រោងបង្កើតឲ្យមានបុណ្យជាតិដ៏សំខាន់២គឺបុណ្យដំរី និងបុណ្យទន្លេ ដើម្បីស្រូបយកភ្ញៀវ ទេសចរណ៍មកទស្សនាកម្ពុជាបន្ថែមទៀត ។លោកលើកឡើងទៀតថា ក្នុងឆ្នាំ២០១៣កន្លងទៅនេះប្រទេសកម្ពុជា បានទទួលភ្ញៀវទេសចរណ៍អន្តរជាតិ បានចំនួនប្រមាណជា៤,២លាននាក់ ដែលមានកំណើនប្រមាណជាង១៨ ។
ដោយមានចក្ខុវិស័យវែងឆ្ងាយរាជរដ្ឋាភិបាល បានដាក់ចេញនូវផែនការយុទ្ធសាស្រ្តឆ្នាំ២០១៥ឲ្យបាន៤,៥លាននាក់ នឹងមានផលរំពឹងទុកនៅឆ្នាំ២០២០កម្ពុជានឹងទទួលបានភ្ញៀវទេសចរណ៍អន្តរជាតិប្រមាណជា៧លាននាក់។លោក បញ្ជាក់ថាភ្ញៀវទេសចរណ៍អន្តរជាតិដែលបានមកទស្សនា ប្រទេសកម្ពុជា ច្រើនជាងគេ ភ្ញៀវទេសចរណ៍វៀតណាម ឈរលំដាប់ថ្នាក់លេខ១ នៅក្នុងឆ្នាំ២០១៣ មានចំនួន៧៨១,៨៤៩នាក់ ខណៈប្រទេសចិនឈរលេខរៀងទី២មាន ចំនួន៤១៧,២៦១នាក់ កូរ៉េលេខ៣ មានចំនួន ៣៨២,៤៣៦ឡាវមានចំនួន ៣៧៦,២២៦ នាក់ថៃមានចំនួន ២០១, ៣ ៨៣ ជប៉ុន ១៨៤,៨៣៣ សហរដ្ឋអាមេរិក មានចំនួន ១៦៤,៥៨២នាក់ បារាំង ១១៦,៩០២ ម៉ាឡេស៊ី ១១៦,២៨៧ និង អូស្រ្តាលីមានចំនួន១១៥,៨៦៦នាក់ ៕ ដោយៈ ស. ស្អាត