ភ្នំពេញ៖ ក្រសួងពាណិជ្ជកម្មកម្ពុជា សហការជាមួយនាយកដ្ឋានពាណិជ្ជកម្ម និងវិនិយោគនៃមជ្ឈមណ្ឌលអាស៊ាន-ជប៉ុន ផ្តល់ការយល់ដឹងពីនិតិវិធីនៃការនាំចេញផលិតផលកម្ពុជា ដល់វិស័យឯកជន ជាប្រយោជន៍បង្កើន ការនាំចេញផលិតផលរបស់ខ្លួន ទៅកាន់ទីផ្សារប្រទេសជប៉ុន។នៅក្នុងសិក្ខាសាលាស្តីពីនិតីវិធីនៃការនាំចេញផលិតផលកម្ពុជា ទៅកាន់ទីផ្សារប្រទេសជប៉ុន ថ្ងៃទី២១ ខែ មិនា លោក អ៊ូ ព្រំ វីរៈ អនុប្រធាននាយកដ្ឋានជំរុញពាណិជ្ជកម្មនៃក្រសួងពាណិជ្ជកម្ម មានប្រសាសន៍ថា ដោយការខ្វះបច្ចេកទេសក្នុងការផលិត គុណភាពផលិតផល នៅមិនទាន់គោរពនូវស្តង់ដារ ការវេចខ្ចប់ ការផលិតមិនទាន់ឆ្លើយតបទៅនឹងទីផ្សាររបស់ប្រទេសជប៉ុន ។កម្ពុជា ចាំបាច់ពង្រឹងបន្ថែមទៀត នូវនិយាមស្តង់ដាររបស់ប្រទេសជប៉ុន។លោកបន្តថា ផលិតចំបងដែលកម្ពុជានាំចេញទៅជប៉ុនមាន៣ផលិតផល សំខាន់ៗ ដូចជា ស្បែកជើង ផលិតផលកសិកម្មស្ករត្នោត ម្រេចកំពត ហើយជប៉ុនក៍កំពុងពិចារណាក្នុងពង្រីកនូវការទិញ ផលិតផលសំលៀកបំពាក់បន្ថែមទៀត។
លោកបានបញ្ជាក់ថា បើទោះបីបច្ចុប្បន្ន សហគ្រិនកម្ពុជា មានការយល់ដឹងច្រើនពីការ វេចខ្ចប់ទៅតាមតម្រូវការនៅក្នុងទីផ្សារជប៉ុន យ៉ាងណាក្តី ប៉ុន្តែកម្ពុជាបាននឹងកំពុងខិតខំធ្វើយ៉ាងណា ដើម្បគោរពតាមនិយាមស្តង់ដារ របស់ប្រទេសជប៉ុនបន្ថែមទៀត ដើម្បីពង្រីកការនាំចេញផលិតផលកម្ពុជា ទៅកាន់ទីផ្សារ ជប៉ុនឲ្យកាន់តែច្រើន។
លោក Trieu Thanh Nam ជំនួយការប្រធាននាយកដ្ឋានពាណិជ្ជកម្ម និងវិនិយោគនៃ មជ្ឍមណ្ឌលអាស៊ាន-ជប៉ុន មានប្រសាសន៍ថា ប្រទេសជប៉ុនតែងតែគាំទ្រក៍ដូចជាជំរុញដល់ ការខិតខំរបស់កម្ពុជា ពិសេសលើការនាំចេញផលិតផលរបស់កម្ពុជាទៅកាន់ទីផ្សារជប៉ុន។
សូមបញ្ជាក់ថា ទំនិញដែលបានចេញទៅកាន់ទីផ្សារប្រទេសជប៉ុន ហើយមានការនិយមចូល ចិត្តបំផុតមានដូចជាអាហារនិងភេសជ្ជៈ និងគ្រឿងសិប្បកម្មដែលផលិតដោយដៃជាដើមប្រជាកសិករ។ ដោយ ស.ស្អាត