ភ្នំពេញ៖ អ្នកការទូត នៃប្រទេសកាណាដា ប្រចាំនៅកម្ពុជា បានសន្យាថា នឹងជំរុញឲ្យអ្នក វិនិយោគទុនក៏ដូចជាអ្នក បញ្ជាទិញជនជាតិកាណាដាឱ្យបន្តការបញ្ជាទិញទំនិញពីវិស័យកាត់ដេរកម្ពុជាបន្ថែមទៀតបន្ទាប់ពីលោកបានស្វែងយល់ពី សភាពការណ៍ពិត នៅកម្ពុជា ក្រោយពីមានហេតុការណ៍កើតអំពើហិង្សា នៃការប៉ះទង្គិចគ្នា រវាងកម្មកររោងចក្រកម្ពុជា ជាមួយកងកម្លាំងប្រដាប់អាវុធ កាលពីដើមខែមករា កន្លងមកនេះ។លោក Philip Calvert ឯកអគ្គរដ្ឋទូតកាណាដាប្រចាំប្រទេសកម្ពុជា បានសន្យាបែបនេះ ខណៈពេលលោកបានចូលជួបសម្តែងការគួរសម និងពិភាក្សាការងារជាមួយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅទីស្តីការក្រសួងការងារ កាលពីពេលថ្មីៗនេះ។
ក្នុងជំនួបនេះ លោកឯកអគ្គរដ្ឋទូតប្រទេសកាណាដា បានកត់សម្គាល់ថា ក្នុងរយៈ ពេលថ្មីៗនេះ ការនាំចេញទំនិញពីកម្ពុជាទៅកាណាដា មានការកើនឡើង គួរឱ្យ កត់សម្គាល់ ហើយភាគច្រើននៃទំនិញទាំងនោះគឺជាសំលៀកបំពាក់។ ការទទួលបានលទ្ធផល ល្អប្រសើរ នៃវិស័យវាយនភណ្ឌនេះ ក៏កើតឡើង ដោយសារកិច្ចសហប្រតិ បត្តិការ រវាងកម្ពុជា-កាណាដា នៅលើគ្រប់វិស័យ ក្នុងនោះរួមទាំងវិស័យការងារ និងបណ្តុះបណ្តាលវិជ្ជាជីវៈ ផងដែរ។
បន្ទាប់ពី ការស្វែងយល់ ក៏ដូចជាមានការពន្យល់ពីសភាពការណ៍ពិតនាកន្លងមកនៃការកើតអំពើហិង្សារវាងកងកម្លាំងប្រដាប់អាវុធ និងកម្មកររោងចក្រមួយចំនួនតូច ពីសំណាក់លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈរួចមក លោកឯកអគ្គរដ្ឋទូតប្រទេសកាណា ក៏បានធ្វើការសន្យាថា នឹងជំរុញឱ្យអ្នកបញ្ជាទិញទំនិញកាត់ដេរ នៅប្រទេសកាណាដា បង្កើនការបញ្ជាទិញបន្ថែមទៀត ពីកម្ពុជា ដើម្បីជាការពង្រឹងពង្រីកនូវសហប្រតិបត្តិការសេដ្ឋកិច្ច ក៏ដូចជា ជួយស្វែងរកការងារធ្វើ ដល់ពលរដ្ឋកម្ពុជា។
នាឱកាសនោះដែរ លោករដ្ឋមន្ត្រី អ៊ិត សំហេង បានបញ្ជាក់ថា រាជរដ្ឋាភិបាលកម្ពុជា ជានិច្ចកាល តែងយកចិត្តទុកដាក់ ចំពោះការតម្លើងប្រាក់ឈ្នួល ដល់កម្មករ និយោជិតដោយក្នុងនេះ បានតម្លើងប្រាក់ឈ្នួល ជាអប្បបរិមា ១០០ ដុល្លារ ក្នុងមួយខែ ប៉ុន្តែបែរ ជាសហជីពមួយចំនួនតូច មិនបានគោរពតាមស្មារតី កិច្ចប្រជុំគណៈកម្មការប្រឹក្សាការងារ ក៏ដូចជា ការសម្រេចរបស់រាជរដ្ឋាភិបាល ហើយបែរជាញុះញង់កម្មករ និយោជិត ឱ្យធ្វើបាតុកម្មប្រឆាំងនឹងការសម្រេចនេះ ដោយទាមទារឱ្យដំឡើង ប្រាក់ឈ្នួលអប្បបរមា ដល់ ១៦០ ដុល្លាទៅវិញ។
លោកបានសម្តែងនូវ ការសោកស្តាយ ដែលនៅក្នុងកំឡុងពេលមានបាតុកម្ម មានការចូលរួមពីសហជីពចំនួន៥និងសមាគម ១ ព្រមទាំងមានការលូកដៃ ពីគណបក្សសង្គ្រោះជាតិ ដែលបានយកប្រាក់ឈ្នួល របស់កម្មករនិយោជិត ធ្វើជាឈ្នាន់បម្រើ នយោបាយរបស់ខ្លួន ដោយបានប្រែក្លាយពីបាតុកម្ម អហឹង្សា ទៅជា ហឹង្សា ពោលគឺពីបាតុកម្ម ទៅជាកុបកម្ម ជាពិសេសស្ថានការដែលកាន់តែធ្ងន់ធ្ងរ បានកើតឡើង នៅយប់ថ្ងៃទី២ និងព្រឹកថ្ងៃទី៣ ខែមករាឆ្នាំ២០១៤កន្លងទៅនោះ។
លោករដ្ឋមន្ត្រី បានបញ្ជាក់ថា ក្រុមកុបករ បានអុកឡុក បិទផ្លូវសាធារណៈ បង្កការភ័យខ្លាចដល់កម្មករ និយោជិត ភាគច្រើន ដែលពេញចិត្តទៅនឹងការដំឡើងប្រាក់ឈ្នូលនេះ ហើយបានចូលបំរើការងារវិញជាប្រក្រតី។
ពួកគេបង្កការភ័យខ្លាច ដល់អ្នកវិយោគទុនបានបំផ្លិចបំផ្លាញ ទ្រព្យសម្បត្តិសាធារណៈ និងឯកជន មន្ទីរពេទ្យ ហើយនៅពេលដែលអាជ្ញាធរមានសមត្ថកិច្ច សម្រេចស្តារនូវសន្តិសុខ និងសណ្តាប់ ធ្នាប់សាធារណៈ បែរជាត្រូវក្រុមកុបករ តបត ប្រឆាំងជាមួយអាជ្ញាធរវិញដោយអំពើហិង្សា ដោយប្រើប្រាស់ការគប់ដុំថ្មចម្ពាមកៅស៊ូ ដំបងដែក គ្រាប់បែកភ្លើងច្នៃ ធ្វើជាអាវុធជាដើម។
លោករដ្ឋមន្ត្រី បន្តទៀតថា ការសម្រេចដំឡើងប្រាក់ឈ្នួលអប្បបរមានេះមិនបានបិទច្រក ក្នុងការបន្តការដំឡើងបន្ថែមទៀតនោះទេ។ បច្ចុប្បន្ន ក្រសួងបានខិតខំក្នុងការសហការជាមួយអង្គការ ILO ដើម្បីទទួលជំនួយបច្ចេកទេស ក្នុងការសិក្សាប្រាក់ឈ្នួលអប្បបរមារឱ្យបានសមរម្យ ព្រោះថាអង្គការ ILO មានបទពិសោធន៍ និងជំនាញបច្ចេកទេស ដែលមិនត្រឹមតែអាចជួយ ដល់ការងាររបស់គណៈកម្មការ ប្រឹក្សាការងារ ប៉ុណ្ណោះទេ តែថែមទាំងផ្តល់នូវសារៈប្រយោជន៍ ដល់គណៈកម្មការសិក្សាស្រាវជ្រាវ ប្រាក់ឈ្នួលអប្បបរមា សម្រាប់កម្មករ និយោជិត ផែ្នកវានយភណ្ឌ កាត់ដេរសម្លៀកបំពាក់ និង ផលិតស្បែកជើងជាដើម៕ ដោយ៖ សស្អាត