ភ្នំពេញៈ ខណៈពេលដែលវិស័យសំណង់មានសកម្មភាពសាងសង់ច្រើនកម្ពុជា តម្លៃទុននាំចូលសម្ភារៈសំណង់កាលពីឆ្នាំ២០១៣កន្លងទៅ ការវិនិយោគសំណង់អគារ ផ្លូវថ្នល់ រោងចក្រ សណ្ឋាគារ ជាដើមនោះ បានកើនឡើង១៤ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១២។
បរិមាណនៃការនាំចូលសម្ភារៈសំណង់ពីបរទេសនៅឆ្នាំ២០១៣មានចំនួនសរុបប្រមាណជា ១១៣ម៉ឺនតោនគឺកើនឡើង៥៥ភាគរយបើធៀបនឹងឆ្នាំមុនមាន៧៣ម៉ឺនតោនតែប៉ុណ្ណោះ។ ចំណែកឯតម្លៃទុននាំចូលសម្ភារៈសំណង់នៅឆ្នាំ២០១៣វិញមានទឹកប្រាក់សរុប ៤០៨លានដុល្លារ បើធៀបនឹងឆ្នាំ២០១២ មានត្រឹមតែ៣៥៧លានដុល្លារ គឺកើនឡើង ១៤ភាគរយ។ នេះបើតាមការពីលោក កែន រដ្ឋា មន្ត្រីអ្នកនាំពាក្យនៃក្រសួងពាណិជ្ជកម្មបានឲ្យដឹងថា ការនាំចូលផលិតផលសម្ពារៈសំណង់ពីបរទេសមកកម្ពុជាមានតម្រូវការកើន ឡើងដោយសារមានកំណើនវិនិយោគនៅក្នុងវិស័យសាងសង់ពីសំណាក់អ្នក វិនិយោគបរទេស និងក្នុងស្រុក។
.jpg)
លោកបន្តថា ប្រជាពលរដ្ឋមានប្រាក់ចំណូលខ្ពស់ វិស័យសេដ្ឋកិច្ចមាននិរន្តភាពល្អ ធ្វើឲ្យគម្រោងអភិវឌ្ឍន៍លំនៅដ្ឋានមានការអភិវឌ្ឍន៍ច្រើន ដូច្នេះបានជម្រុញឲ្យបរិមាណ និងតម្លៃនៃការនាំចូលកើនច្រើនបែបនេះ។លោកបញ្ជាក់ថាគម្រោងអភិវឌ្ឍន៍សាងសង់សំណង់ដែលត្រូវការសម្ភារៈសំណង់មាន ដូចជា៖គម្រោងសាងសង់ស្ពានថ្នាល់សណ្ឋាគារ រោងចក្រ គម្រោងអភិវឌ្ឍន៍លំនៅដ្ឋានតាមបុរី អគារធ្វើពាណិជ្ជកម្ម អគារអាផាតមិន ខុនដូ និងសំណង់អគារផ្សេងៗជាច្រើនទៀត។
គួរបញ្ជាក់ថា ការនាំចូលសម្ភារៈសំណង់នៅតែមានការកើនឡើងបន្តទៀត បើសិនណាសេដ្ឋកិច្ចប្រទេសកម្ពុជានូវរក្សាបានកំណើនល្អជំវិញ ៧,២ភាគរយ។ ហើយប្រទេសដែលកំពុងធ្វើការនាំចូលសម្ភារៈសំណង់មកកាន់ កម្ពុជាច្រើនគេមានប្រទេសចិន ថៃ វៀតណាម និងម៉ាឡេស៊ី៕ ដោយ៖ ភីន រ៉ា