ភ្នំពេញ ៖ រដ្ឋមន្ត្រីក្រសួងយុត្តិធម៌បានថ្លែងថា ពេលនេះយើងគួរគិតក្នុងការដំណើរការការងាររដ្ឋបាលនៅតាមតុលាការ ឱ្យបានល្អ ខណៈកង្វះខាតធនធានមនុស្សក្នុងការអនុវត្តការងារក្នុងវិស័យនេះកំពុងធ្វើឱ្យដំណើរស្វែងរកយុត្តិធម៌មានការយឺតយាវ លើរឿងក្តីជាច្រើន។ ដើម្បីឆ្លើយបញ្ហាប្រឈមទាំងនេះឱ្យមានភាពវិជ្ជមាន ក្នុងប្រព័ន្ធយុត្តិធម៌កម្ពុជា និងអាចទទួលយកបានទាំងភាគីឈ្នះក្តី និងទាំងភាគីចាញ់ក្តីនោះ រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា បានលើកយកប្រធានបទចំនួនបី មកផ្សព្វផ្សាយនិងធ្វើការពិភាក្សា ដើម្បីរកបញ្ហាប្រឈមនិងគន្លឹះដោះស្រាយជាមូលដ្ឋាន ដាក់ក្នុងសន្និបាតបូកសរុបការងារយុត្តិធម៌ឆ្នាំ២០១៣ និងលើកទិសដៅការងារឆ្នាំ២០១៤ នៅព្រឹកថ្ងៃទី២៧ខែមិនានេះ សម្រាប់អនុវត្តបន្តទៅមុខទៀត។តាមរយៈប្រធានបទទាំងបី ដែលរួមមាន ការដាក់ឱ្យដំណើរការ ការងាររដ្ឋបាលនៅតាមតុលាការ បញ្ហាប្រឈមក្នុងការអនុវត្តច្បាប់ និងការងារបំរើសេវាយុត្តិធម៌ លោក សង្ឃឹមថា អង្គសន្និបាតនឹងខិតខំប្រឹងប្រែងដាក់ចេញនូវវិធានការ ដែលនឹងអាចដោះស្រាយបាតុភាពអសកម្ម ដែលកើតឡើងកន្លងមក ដើម្បីបង្កើនប្រសិទ្ធភាពការងារទៅថ្ងៃអនាគតឱ្យបានកាន់តែប្រសើរ សំដៅបង្កើននូវទំនុកចិត្ត និងជំនឿជឿជាក់របស់ប្រជាពលរដ្ឋ លើស្ថាប័នយុត្តធម៌ និងរាជរដ្ឋាភិបាលកម្ពុជា ក៏ដូចជាធ្វើឱ្យនីតិរដ្ឋនៅកម្ពុជាកាន់តែមានភាពរឹងមាំឡើងថែមទៀត។
លោកស្រី ជា លាង អគ្គព្រះរាជអាជ្ញានៃមហាអយ្យការអមតុលាការកំពូល បានថ្លែងថា ក្រៅពីកត្តាធនធានមនុស្សស្ថាប័នយុត្តិធម៌គួរគិតគូរដល់សម្ភារៈប្រើប្រាស់និងការរៀបចំគម្រោងចំណាយជាច្រើនទៀត និងព្រះរាជអាជ្ញាត្រូវឈរលើគោលការណ៍ច្បាប់ជាតិ និងច្បាប់អន្តរជាតិជៀសវាង ការធ្វើការងាររដ្ឋបាលបន្ថែមខុសនឹងជំនាញរបស់ខ្លួន។ គួរបញ្ជាក់ថា កាលពីថ្ងៃទី២៤ខែតុលាឆ្នាំ២០១៣ រាជរដ្ឋាភិបាលបានចេញអនុក្រឹត្យ ស្តីពីការបង្កើតគណៈកម្មាធិការដឹកនាំការកែទម្រង់ច្បាប់ និងប្រយុត្តិធម៌ ដោយរដ្ឋមន្ត្រីក្រសួងយុត្តិធម៌ជាប្រធានគណៈកម្មាធិការនេះ ហើយមានសមាសភាពចូលរួមជារដ្ឋលេខាធិការ នៃក្រសួងយុត្តិធម៌ និងក្រសួងស្ថាប័នពាក់ព័ន្ធ និងថ្នាក់ដឹកនាំជាន់ខ្ពស់នៃស្ថាប័នតុលាការនិងស្ថាប័នអយ្យការ។ព្រមជាមួយគ្នានេះដែរ នៅខែតុលា ឆ្នាំ២០១៣ ក្រសួងយុត្តិធម៌បានចេញសេចក្តីសម្រេច បង្កើតក្រុមការងារទទួលបន្ទុករៀបចំសេចក្តីព្រាងច្បាប់ចំនួនបីគឺៈ សេចក្តីព្រាងច្បាប់ស្តីពីការរៀបចំអង្គតុលាការ សេចក្តីព្រាងច្បាប់ស្តីពីលក្ខន្តិកៈនៃចៅក្រម និងព្រះរាជអាជ្ញា និងសេចក្តីព្រាងច្បាប់ស្តីពីការរៀបចំ និងការប្រព្រឹត្តិទៅនៃឧត្តមក្រុមប្រឹក្សានៃអង្គចៅក្រម។
ដោយ៖ រតនា