ភ្នំពេញ៖ ទំនាក់ទំនងពាណិជ្ជកម្មរវាងប្រទេសកម្ពុជា និងប្រទេសម៉ាឡេស៊ី ក្នុង ឆ្នាំ២០១៣ បានកើនដល់ចំនួន ៤២៨.៨៣ លានដុល្លារអាម៉េរិក កើនលើសឆ្នាំ ២០០៩ ចំនួនដល់ ១៥៤ ភាគរយ ដែលកាលពីឆ្នាំ ២០០៩ ពាណិជ្ជកម្មរវាងប្រទេសទាំងពីរមានចំនួនត្រឹមតែ ១៦៨.៧២ លានដុល្លារ អាម៉េរិកប៉ុណ្ណោះ។
ឧស្សាហកម្មនៃម៉ាឡេស៊ីមកពីវិស័យជាច្រើនដូចជា ទូរគមនានគមន៍ ធនាគារ សំណង់ កសិកម្ម រ៉ែ ថាមពល និង បច្ចេកវិទ្យានានា និងមេតួអង្គកំពូលខាងឧស្សាហកម្មកម្ពុជា ដោយមានកិច្ច សហការរបស់ សភាពាណិជ្ជកម្មកម្ពុជាចំនួនជាង ១០០នាក់ បានចូលរួមក្នុងកិច្ចពិភាក្សាតុមូលនៃបណ្តាមេតួអង្គឧស្សាហកម្ម កម្ពុជា និងម៉ាឡេស៊ីដែលបានធ្វើឡើងនៅព្រឹកថ្ងៃទី២១ ខែកុម្ភៈ ឆ្នាំ២០១៤ នៅសណ្ឋាគារស៊ូភីតែលភូកេតត្រានៅទីក្រុងភ្នំពេញ។ លោកគាត ឈន់ ឧបនាយក រដ្ឋមន្ត្រីប្រចាំការ និងលោកឧបនាយករដ្ឋ មន្ត្រី TAN SRI Muhyiddin Mohd Yassin រដ្ឋមន្ត្រីក្រសួងអប់រំម៉ាឡេស៊ីធ្វើជាសហប្រធាន នៃកិច្ចប្រជុំនេះ។
ពីឆ្នាំ២០០៩ ដល់ឆ្នាំ២០១៣ ពាណិជ្ជកម្មសរុបរវាងប្រទេសម៉ាឡេស៊ី និងប្រទេសកម្ពុជាបានកើនឡើង១៥៤ ភាគរយ ពោលគឺកើនពី ១៦៨,៧២ លានដុល្លារអាម៉េរិកនៅក្នុងឆ្នាំ២០០៩ បានកើនឡើងដល់ ៤២៨,៨៣ លានដុល្លារអាម៉េរិកនៅឆ្នាំ ២០១៣។ ប្រទេសម៉ាឡេស៊ីមានចំណាត់ថ្នាក់ជាប្រទេសគោលដៅទី៨ សម្រាប់ផលិតផលកម្ពុជាដោយមានទឹកប្រាក់ចំនួន ១៧៤,៤៨ លានដុល្លារអាម៉េរិក (២០១២) ក្នុងនាមជាសមាជិកអាស៊ានប្រទេសម៉ាឡេស៊ីមានចំណាត់ថ្នាក់ទី៥ ជាប្រភពនាំចូល និងគោលដៅនាំចូល និងគោលដៅនាំចេញ សម្រាប់ប្រទេស កម្ពុជា។
កាលពីឆ្នាំ២០១៣ កានាំចេញរបស់ប្រទេសម៉ាឡេស៊ីមកប្រទេសកម្ពុជាមានតម្លៃសរុបស្មើនឹង ២៣៥,១៣ លានដុល្លារអាម៉េរិក និង ដោយក្នុងនោះមានសម្ភារនាំចេញធំជាងគេរួមមានវាយនភ័ណ្ឌ និងសម្លៀក បំពាក់ មានតម្លៃស្មើ៦៥,៤៧លានដុល្លារអាម៉េរិក។ ភេសជ្ជៈនិងថ្នាំជក់មានតម្លៃសើ្ម២៤,៥២លានដុល្លារអាម៉េរិក។គ្រឿង ឧបភោគបរិភោគមានតម្លៃស្មើ ២១,៨១ លាន ដុល្លារអាម៉េរិក។ ការផ្គត់ផ្គង់បរិក្ខារដឹក ជញ្ជូនមានតម្លៃស្មើ ២៤,១ លានដុល្លារ អាម៉េរិក។ ផលិតផលគីមីនិងផលិតផល ឱសថមានតម្លៃស្មើ ២៤,១ លានដុល្លារ អាម៉េរិក។ នៅឆ្នាំ២០១៣ ការនាំចេញរបស់ប្រទេសកម្ពុជាទៅកាន់ប្រទេសម៉ាឡេស៊ី មានចំនួនស្មើ១៩៣,៧លានដុល្លារ អាម៉េរិក។ ក្នុងនោះសម្ភារនាំចេញចម្បងទៅកាន់ប្រទេសម៉ាឡេស៊ីឆ្នាំ២០១៣ រួម មាន៖ កៅស៊ូក្រែបមាន ៦១,៦៣លាន ដុល្លារអាម៉េរិក។ វាយនភ័ណ្ឌនិងសម្លៀក បំពាក់ ៥៤,៨៨ លានដុល្លារអាម៉េរិក។ ធញ្ញជាតិ ៤៧,៨៨លានដុល្លារអាម៉េរិក។ ផលិតផលឱសថនិងគីមី ៤៧,៨៥ លាន ដុល្លារអាម៉េរិក។ ប្រេងដូង ៧,៦៩ លាន ដុល្លារអាម៉េរិក។លោកឧបនាយករដ្ឋមន្ត្រី គាត ឈន់ រដ្ឋមន្ត្រីប្រចាំការ បានថ្លែងបញ្ជាក់ថាទោះជាកម្ពុជាជាប្រទេសចុង ក្រោយដែលក្លាយជាសមាជិកអាស៊ានក្នុងឆ្នាំ ១៩៩៩ ក៏ដោយក៏ការចូលជាសមាជិករបស់អង្គការពាណិជ្ជកម្ម ពិភពលោកកាលពីឆ្នាំ ២០០៤ របស់ប្រទេសកម្ពុជាបានបើកនូវទីផ្សារដ៏ធំមួយដែលជាកាតាលីករជំរុញ កំណើន ប្រកបដោយនិរន្តរភាពនិងឈានមុខក្នុងតំបន់អាស៊ីបូព៌ាក្នុងទសវត្សរ៍ ចុងក្រោយនេះ។
លោកបានបញ្ជាក់បន្ថែមថាម្យ៉ាងទៀតទោះជាកម្ពុជារងផលប៉ះពាល់ពី កលិយុគហិរញ្ញវត្ថុនិងសេដ្ឋកិច្ចអន្តរជាតិក្នុងឆ្នាំ២០០៩ក៏ដោយតែ កម្ពុជានៅតែសម្រេចបានកំណើនសេដ្ឋកិច្ចជាមធ្យមប្រចាំឆ្នាំប្រមាណ៨ ភាគរយក្នុងរយៈពេល១៥ឆ្នាំចុងក្រោយនេះហើយអាចគ្រប់គ្រងអតិផរណាដោយ ជោគជ័យ។ទន្ទឹមនេះកម្ពុជាត្រូវបានវាយតម្លៃខ្ពស់និងការសរសើរពី អង្គការសហប្រជាជាតិដែលជាប្រទេសមួយក្នុងចំណោមប្រទេសតិចតួចប៉ុណ្ណោះ ដែលអាចសម្រេចបានគោលដៅអភិវឌ្ឍន៍សហស្សវត្សរ៍មុនកាលកំណត់ឆ្នាំ២០១៥។
លោកបានសង្កត់ធ្ងន់ថា ពេលនេះសំខាន់ជាង ពេលណាៗទាំង អស់ ដែលប្រទេសជា សមាជិកអាស៊ាន ទាំងអស់ត្រូវធ្វើការជាមួយគ្នាដើម្បីច្បាមយកកាលានុវត្តភាពនានា កើតឡើង ពីការបង្កើតសហគមន៍សេដ្ឋកិច្ចអាស៊ានក្នុងពេលឆាប់ៗខាងមុខដែលមាន គោលដៅបង្កើតទីផ្សារតែមួយ និងធានាលំហូរ ដោយសេរីនៃទំនិញនិងសេវាកម្មវិនិយោគ និងកម្លាំងពលកម្មជំនាញដើម្បីការអភិវឌ្ឍ និងវិបុលភាពរួមគ្នាជាពិសេសប្រទេសទាំង ពីរកម្ពុជា-ម៉ាឡេស៊ី ។
កិច្ចប្រជុំតុមូលនេះនោះលោកឧបនាយករដ្ឋមន្ត្រីក៏បានប្រាប់ដល់ អ្នកចូលរួមផងដែរ អំពីបរិស្ថានអនុគ្រោះ ដល់ធុរកិច្ចនិងវិនិយោគថាបរិស្ថានដែលគាំទ្រធុរកិច្ចរបស់ កម្ពុជាជាកត្តា ចាំបាច់ដែលបានធ្វើឲ្យ កម្ពុជាសម្រេចបាន កំណើនខ្ពស់ក្នុង ទសវត្សរ៍ចុងក្រោយនេះ។ យើងបានបង្កើត វេទិការាជរដ្ឋាភិបាលវិស័យឯកជន និង កិច្ចប្រជុំគណៈរដ្ឋមន្ត្រីបើកទូលាយដែលមានការចូលរួមពីគណៈរដ្ឋមន្ត្រី ទាំងមូល និងវិនិយោគ ព្រមទាំងធុរជនជាច្រើន។
កម្ពុជា និងប្រទេសម៉ាឡេស៊ី គឺជាសេដ្ឋកិច្ចទីផ្សារដ៏រឹងមាំដែលអាស្រ័យលើពាណិជ្ជកម្មអន្តរជាតិ សម្រាប់ការជំរុញឲ្យមានកំណើនសេដ្ឋកិច្ច។ ការតភ្ជាប់ទៅកាន់ពិភពលោកដ៏រឹងមាំនិងច្រកចូលទៅកាន់ទីផ្សារល្អ ប្រសើរគឺជាគោលការណ៍ ចំពោះយុទ្ធសាស្ត្រសេដ្ឋកិច្ចសម្រាប់ប្រទេសទាំងពីរ ។ ជាមួយស្មារតីនេះ រដ្ឋាភិបាលរបស់ប្រទេសកម្ពុជានិងម៉ាឡេស៊ីនឹងបន្តពុះពារស្វែងរកឲ្យមានពាណិជ្ជកម្មសកម្មដោយប្រើប្រាស់កិច្ចព្រមព្រៀងពាណិជ្ជកម្មសេរី អាស៊ាន ជាឧបករណ៍សម្រាប់ការអភិវឌ្ឍន៍ពាណិជ្ជកម្ម និងរបៀបវារៈនយោបាយ រួមទាំងការចូលរួមសេរី ក្នុងពាណិជ្ជកម្មថ្នាក់តំបន់ និងសកល និងកំណែទម្រង់់សេដ្ឋកិច្ច ។
គួរបញ្ជាក់ផងដែរថា ប្រទេសម៉ាឡេស៊ី និងប្រទេសកម្ពុជាបាននាំមកនូវទំនាក់ទំនងល្អ ផ្នែកពាណិជ្ជកម្ម និង ការវិនិយោគទុន ជាពិសេសនៅពេលសមិទ្ធផលសហគមន៍សេដ្ឋកិច្ចអាស៊ាន ត្រឹមចុងឆ្នាំ២០១៥ នឹងផ្តល់ឱកាសបន្ថែមទៀតសម្រាប់ផ្នែកឯកជនដើម្បីសហការនិងធ្វើល្អ ប្រសើរឡើងនូវកិច្ចសហប្រតិបត្តិការពាណិជ្ជកម្ម និងការវិនិយោគរបស់ប្រទេសទាំងពីរ៕
ដោយ៖ ភីន រ៉ា