ភ្នំពេញៈ រដ្ឋាភិបាលជប៉ុនសន្យានឹងបន្តជួយដល់កម្ពុជាក្នុងការកាត់បន្ថយអត្រាគ្មានការងារធ្វើរបស់ក្រុមយុវជននិងអ្នកអត់ការងារ តាមរយៈផ្តល់ការណែនាំពីអាជីពការងារដែលសមស្របតាមតម្រូវការទីផ្សារការងារក្នុងសង្គម
។ថ្លែងនៅក្នុងសិក្ខាសាលាជាតិលើកទី២ នៅព្រឹកថ្ងៃទី២៣ ខែមករា ២០១៤ លោក ស៊ីនីជី តាមាមិសុ (Shinichi Tama mitsu) ជាលេខាទី១នៃស្ថានទូតជប៉ុនប្រចាំកម្ពុជាបានមានប្រសាសន៍ថា រដ្ឋាភិបាលជប៉ុននៅតែមានការបេ្តជ្ញាចិត្ត ខ្ពស់ជួយ ដល់ប្រទេសកម្ពុជានៅក្នុងវិស័យអភិវឌ្ឍជំនាញដែលចំនុចអាទិភាពដ៏សំខាន់ការលើកកម្ពស់ កិច្ចអភិវឌ្ឍ ប្រទេសជាតិឲ្យកាន់តែរីកចំរើន។
.JPG)
លោកបានបញ្ជាក់ថា តាមរយៈការផ្តល់គម្រោងនៃការអភិវឌ្ឍន៍ជំនាញនៅកម្ពុជាដែលអនុវត្តដោយក្រសួងការងារនេះ នឹងបានតម្រងទិសដល់យុវជនកម្ពុជា ក្នុងការសិក្សាជំនាញវិជ្ជាជីវៈចំគោលដៅ ដែលអាចអភិវឌ្ឍសមត្ថភាពការងារល្អឆ្ពោះទៅមុខ។លោកបានបន្តទៀតថា គម្រោងនេះក៏ជាផ្នែកមួយក្នុងការកាត់បន្ថយគម្លាតអភិវឌ្ឍធនធានមនុស្សនៅក្នុងតំបន់ ខណៈដែលអាស៊ាននឹងធ្វើសមាហរណកម្មជាសហគមន៍តែមួយនៅឆ្នាំ២០១៥ខាងមុខ ដូច្នេះទីផ្សារការងារល្អៗកាន់តែចង្អៀតចំពោះអ្នកដែលគ្មានសមត្ថភាពនិងជំនាញច្បាស់លាស់។
.jpg)
អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ប៉ុក ប៉ាន់ បានទទួលស្គាល់ថា កម្ពុជានៅតែត្រូវការគាំទ្រទាំងជំនួយបច្ចេកទេស និងថវិកា ដើម្បីបន្តអភិវឌ្ឍធនធានមនុស្សឆ្លើយ តបទៅនឹងតម្រូវការទីផ្សារការងារនុងស្រុកនិងតំបន់។ លោកអនុរដ្ឋលេខាធិការបញ្ជាក់ថា បច្ចុប្បន្ន ក្រសួងកំពុងពង្រឹងវិស័យអប់រំបណ្តុះបណ្តាលបច្ចេកទេសវិជ្ជាជីវៈហៅកាត់ថា TVET តាមរយៈការផ្សារភ្ជាប់រវាងការបណ្តុះបណ្តាលទៅការងារ ដើម្បីឲ្យស៊ីគ្នារវាងតម្រូវការនិងការផ្គត់ផ្គង់ជំនាញនៅក្នុងទីផ្សារការងារបច្ចុប្បន្ន។
លោកបន្តទៀតថា ក្រៅពីនេះការបង្កើតទីភ្នាក់ងារជាតិមុខរបរ និងការងារ និង មជ្ឈមណ្ឌលការងារនៅតាមបណ្តារាជធានីខេត្តមួយចំនួន បាននឹងកំពុងរួមចំណែកយ៉ាងសកម្មក្នុងការផ្តល់នូវព័ត៌មានទីផ្សារការងារ ហើយបានផ្តល់ឱកាសដល់អ្នកស្វែងរកការងារធ្វើ និងអ្នកស្វែងរកការបណ្តុះបណ្តាលជំនាញដែលច្បាស់លាស់ និងត្រឹមត្រូវស្របតាមតំរូវការទីផ្សារការងារដែលគេចង់បាន។
សូមបញ្ជាក់ថា គម្រោងលើកកម្ពស់សមត្ថភាពវិជ្ជាជីវៈរបស់ភាគីជប៉ុននេះ កំពុងជួយដល់ប្រទេស ចំនួន៤ ក្នុងតំបន់អាស៊ីអាគ្នេយ៍ក្នុងនោះមានប្រទេសកម្ពុជា ឡាវ មីយ៉ានម៉ា និងប្រទេសវៀតណាម ដើម្បីជំរុញការអភិវឌ្ឍធនធានមនុស្សនៅក្នុងប្រទេសទាំងនេះ ឲ្យមានស្ថានភាពប្រហាក់ប្រហែលដូចទៅនឹងបណ្តាប្រទេសផ្សេងទៀតក្នុងតំបន់៕ ដោយ៖ ភីនរ៉ា