ភ្នំពេញ៖ ថ្នាក់ដឹកនាំ មន្ត្រីពាក់ព័ន្ធ អង្គការUN-WoMEN និងការិយាល័យឧត្តមស្នងការសិទ្ធិមនុស្សនៅកម្ពុជា OHCHRបានជួបជុំគ្នាពិគ្រោះយោបល់លើអនុសញ្ញាអន្តរជាតិ ស្តីពីការការពារសិទ្ធិពលករទេសន្តរប្រវេសន៍គ្រប់រូប និងសមាជិកគ្រួសាររបស់ពួកគេ ព្រឹកថ្ងៃទី ០១ ខែតុលា ឆ្នាំ២០១៣នេះ នៅសណ្ឋាគារភ្នំពេញ ក្រោមវត្តមាន លោក ចាប ឬទ្ធី អនុរដ្ឋ លេខាធិ ការក្រសួងការងារ និងបណ្តុះបណ្តាលវិជ្ជាជីវៈ ក្នុងនាមលោកបណ្ឌិត អ៊ិត សំហេង រដ្ឋមន្ត្រីក្រសួង ការងារ និងបណ្តុះបណ្តាលវិជា្ជជីវៈ។សិក្ខាសាលាពិគ្រោះយោបល់នេះធ្វើឡើងក្រោមការរៀបចំរបស់ក្រសួងការងារ និងបណ្តុះបណ្តាលវិជ្ជាវៈ និងមានការចូលរួម ជួយឧបត្ថមថវិកា និងបច្ចេកពីអង្គការUN-WoMEN និងការិយាល័យឧត្តមស្នងការសិទ្ធិមនុស្សនៅកម្ពុជា(OHCHR) ក្នុងគោលបំណងលើកកំពស់ការយល់ដឹងធ្វើឲ្យកាន់តែប្រសើរឡើងនូវយន្តការគ្រប់គ្រងពលករទេសន្តរប្រវេសន៍ លើកកម្ពស់សុខភាព សុវត្ថិភាពការងារនៅកន្លែងធ្វើការងារ លើកកម្ពស់លក្ខណ្ឌការងារ ក្នុងបំណងអភិវឌ្ឍន៍មុខរបរក្នុងប្រទេស និងអភិវឌ្ឍន៍ការងារនៅក្រៅប្រទេស។
លោក ចាប ឬទ្ធី អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈថ្លែងថា រាជរដ្ឋាភិបាលកម្ពុជាអាណត្តិទី៥ នៃនីតិកាលរដ្ឋសភា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំប្រកបដោយគតិបណ្ឌិត និងឈ្លាសវៃ បានដាក់ចេញនូវយុទ្ធសាស្ត្រចតុកោណ ដើម្បីកណើនការងារ សមធម៌ និងប្រសិទ្ធភាពនៅកម្ពុជាដំណាក់កាលទី៣ ក្នុងមុំទី៣ ស្តីពី«ការអភិវឌ្ឍន៍ទីផ្សារការងារ»ដោយអទិភាពទៅលើចំណុចជាច្រើន ដែលក្នុងនោះ លោកសូមជំរាបជូនចំណុចទី១ និងចំណុចទី១០នៃលេខរៀង១០៨គឺការរៀបចំ និងអនុវត្តគោលនយោបាយជាតិ ស្តីពីមុខរបរ និងការងារ ដើម្បីអភិវឌ្ឍន៍វិស័យការងារឲ្យស្របតាមការវិវត្តន៍នៃស្ថានភាពសង្គម-សេដ្ឋកិច្ច ដោយយកចិត្តទុកដាក់ជាពិសេស លើការអភិវឌ្ឍការងារសម្រាប់យុវជន ការរៀបចំកម្លាំងពលកម្ម ឲ្យឆ្លើយតបទៅនឹងសេចក្តីត្រូវការនៃការអនុវត្តគោលនយោបាយអភិវឌ្ឍន៍របស់រាជរដ្ឋាភិបាល ព្រមទាំងការត្រៀមលក្ខណៈក្នុងការគ្រប់គ្រង និងការទាញយកផលប្រយោជន៍ឲ្យបានជាអតិបរិមាពីការចូលរួមក្នុងសហគមន៍សេដ្ឋកិច្ចអាស៊ាន។លោករដ្ឋលេខាធិការបញ្ជាក់ថា សិក្ខាសាលាថ្ងៃនេះ ពិតជាបានចែករំលែកបទពិសោធន៍ និងទទួលបានមេរៀនចំណេះដឹងផ្សេងទៀតតាមរយៈការពិភាក្សា ការផ្តល់បទឧទ្ទេសនាមពីអ្នកឯកទេសជាតិ និងអន្តរជាតិ។សូមបញ្ចាក់ថា អនុសញ្ញានេះបានចូលជាធរមាននៅថ្ងៃទី ៤ ខែកក្កដា ឆ្នាំ២០០៣ ហើយកន្លងមកអនុសញ្ញានេះមានរដ្ឋភាគីចំនួន៤៦ ក្នុងនោះរួមមាន ហ្វីលីពីន(១៩៩៥) ស្រីលង្កា(១៩៩៦) បង់ក្លាដេស(២០១១) ឥណ្ឌូនេស៊ី(២០១២) និងកម្ពុជាបានចុះហត្ថលេខានៅក្នុងឆ្នាំ២០០៤។អនុសញ្ញាអន្តរជាតិស្តីពីសិទ្ធិរបស់ពលករទេសន្តរប្រវេសន៍គ្រប់រូប និងសមាជិកគ្រួសាររបស់ពួកគេ ផ្តោតលើលិខិតតុបករណ៍សិទ្ធិមនុស្សអន្តរជាតិ ដែលមានលក្ខណៈគ្រប់ជ្រុងជ្រោយជាងគេ ស្តីពីពលករទេសន្តរប្រវេសន៍។ ឆ្លុះបញ្ចាំងពីគោលការណ៍ដែលមានស្រាប់ ដូចដែលដាក់ចេញនៅក្នុងលិខិតតុបករណ៍សិទ្ធិមនុស្សកន្លងមក។ កំណត់ពីសិទ្ធិពលករទេសន្តរប្រវេសន្តរប្រវេសន៍ មុនពេលចេញដំណើរ ក្នុងប្រទេសឆ្លងកាត់ និងប្រទេសដែលពួកគេទៅបម្រើការងារ។ កំណត់ពីកាតព្វកិច្ចរបស់ប្រទេសដើមកំណើត ប្រទេសឆ្លងកាត់ និងប្រទេសដែលពួកគេទៅបម្រើការងារ។ ជាពិសេសអនុសញ្ញានេះ គឺគ្របដណ្តប់លើគ្រប់ដំណាក់កាលទាំងអស់នៃប្រទេសទេសន្តរប្រវេសន៍៕ ដោយ៖ ស.ស្អាត