ភ្នំពេញ៖ ថ្លែងក្នុងសិក្ខាសាលាមួយស្តីពី «ការវាយតម្លៃយេនឌ័រក្នុងវិស័យកសិកម្មនៅព្រឹកថ្ងៃទី ១៧ មករា លោក ជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានមានប្រសាសន៍ថា ស្ត្រីកម្ពុជាចំនួន ៥៧%កំពុងតែបម្រើការងារក្នុងវិស័យកសិកម្ម ខណៈដែរវិស័យកម្មនៅប្រទេសកម្ពុជាត្រូវបានរាជរដ្ឋាភិបាល ចាត់ទុកថា ជាគ្រឹះអាទិភាពមួយជួយទ្រទ្រង់កំណើនសេដ្ឋកិច្ចជាតិ។
លោកជំទាវបន្តទៀតថា តួនាទីរបស់ស្ត្រីនៅក្នុងវិស័យកសិកម្ម និងឧស្សាហកម្ម មានចំនួន៥៧ភាគរយហើយវិស័យផ្សេងទៀតនោះស្ត្រីបានរួមចំណែកដល់សំខាន់ ជួយដល់កំណើនសេដ្ឋកិច្ចជាតិនោះ គឺស្ត្រីក្នុងវិស័យបម្រើការងារផ្នែកសេវាកម្មទេសចរណ៍មានចំនួនតែត្រឹមតែ៣០% ទៅ ៣៥%ប៉ុណ្ណោះ។
សព្វថ្ងៃនេះដែរ កម្ពុជា គឺជាប្រទេសមួយ ដែលមានខឿនសេដ្ឋកិច្ចជាតិពឹងផ្អែក មួយភាគធំទៅលើវិស័យកសិកម្មនៅឡើយ ហើយក្នុងនោះប្រជាពលរដ្ឋប្រមាណ ជា៨០ភាគរយ ដែលរស់នៅជនបទភាគច្រើនលើសលុបប្រកបមុខរបរកសិកម្មសម្រាប់ចិញ្ចឹមជីវិត។ក្នុងលក្ខខណ្ឌ នៃដំណើរការវិវឌ្ឍន៍សេដ្ឋកិច្ច និងសង្គមបែបនេះរាជរដ្ឋាភិបាលកម្ពុជា បានចាត់ទុកវិស័យកសិកម្ម គឺជាវិស័យស្នូលមួយដែលមានអាទិភាពខ្ពស់នៅក្នុងរបៀបវារៈនៃការអភិវឌ្ឍន៍ប្រទេសជាតិ។
បើតាមការសង្កត់ធ្ងន់របស់លោកជំទាវរដ្ឋមន្រ្តីក្រសួងកិច្ចការនារី បានឱ្យដឹងថា «ស្ត្រីមានចំនួន៥២% ក្នុងចំណោមប្រជាជនសរុបតួលេខនេះ ជាតួលេខធំ ក្នុងការយកចិត្កទុកដាក់ពីរាជរដ្ឋាភិបាយចូលក្នុងគោលនយោបាយអភិវឌ្ឍន៍ប្រទេសជាតិ។ ក្នុងន័យនេះដែរ ក្រសួងកិច្ចការនារី យោងទៅលើយុទ្ធសាស្ត្រចតុកោណរបស់រាជរដ្ឋាភិបាលដែលប្រៀបធៀបស្រ្តីជាឆ្អឹងខ្នងប្រទេសជាតិ ត្រូវធ្វើយ៉ាងណាឲ្យតួនាទីស្ត្រីក្នុងវិស័យផ្សេងៗរបស់ជាតិមានសមភាព យ៉េនឌ័រ ដោយផ្អែកទៅលើការងារមួយចំនួនរួមមាន៖ សុខភាព សេដ្ឋកិច្ច អប់រំផ្លូវចិត្ត អភិបាលកិច្ចសង្គម ផ្អែកទៅលើសេដ្ឋកិច្ចទាំងស្រុង»។
លោកជំទាវ អ៊ឹង កន្ថាផាវី ក៏បានបញ្ជាក់ដែរថា បច្នុប្បន្ននេះ ក្រសួងកិច្ចការនារីបានសហការជាមួយក្រសួងកសិកម្ម ដើម្បីអនុវត្តគម្រោងដែលគាំទ្រដោយមូលនិធិអន្តរជាតិសម្រាប់ការអភិវឌ្ឍន៍កសិកម្ម (IFAD) នៅក្នុងខេត្តចំនួន៩រួមមាន៖ ខេត្តកំពត កំពង់ធំ ស្វាយរៀង និងខេត្ត៦ផ្សេងទៀត។ គម្រោងនោះ បានលើកទឹកចិត្តដល់ស្រ្តីជាច្រើនឱ្យក្លាយជាអ្នកផ្សព្វផ្សាយកសិកម្ម និងដឹកនាំក្រុមកសិកម្មជាដើម។
លោក Alassane Sow នាយកគ្រប់គ្រងធនាគារពិភពលោកប្រចាំកម្ពុជាបានលើកឡើងដោយកត់សម្គាល់ថា វិស័យកសិកម្មនៅក្នុងប្រទេសកម្ពុជា នៅមិនទាន់អនុវត្តបានល្អទេ ដោយសារតែរវាងបុរសស្ត្រី គឺគាត់មិនទាន់ទទួលបានឱកាសស្មើៗគ្នា ទៅលើអ្វីដែលគាត់ត្រូវការក្នុងការផលិតនៅវិស័យកសិកម្ម។
លោកបានបញ្ជាក់ថា ស្រ្តីគួរតែទទួលបានការលើកទឹកចិត្តឱ្យចាប់ផ្តើម និងពង្រីកអាជីវកម្មរបស់ខ្លួនដែលមានការកើនឡើងជាបន្ទាន់ និងចាំបាច់លើសមត្ថភាពផលិតគំនិតច្នៃប្រឌិតថ្មីៗ និងការងារ ដែលពួកគេអាចបង្កើត ឬត្រូវបានបង្កើតសម្រាប់ពួកគេ។ ហើយសិក្ខាសាលានេះ មានគោលបំណងត្រួតពិនិត្យទៅលើបញ្ហាប្រឈមផ្សេងៗរបស់ស្ត្រីក្នុងវិស័យកសិកម្ម ហើយការត្រួតពិនិត្យចំនួនស្ត្រី ក្នុងវិស័យកសិកម្មនេះ គឺទិន្នន័យបានមកពីឯកសារនានា ដោយបានមកពីការស្ទាបស្ទង់ទៅលើគ្រួសារ។
គួរបញ្ជាក់ថាកាលពីឆ្នាំ២០១២ កម្ពជាមានផលទុកសរុបក្នុងស្រុកចំនួន ១៤.០៦លានដុល្លារសហរដ្ឋអាមេរិកដែលភាគច្រើនទទួលបានពីសកម្មភាពសេដ្ឋកិច្ចក្នុងវិស័យឯកជនដូចជា៖ វិស័យកសិកម្ម ទេសចរណ៍ សំណង់ ឧស្សាហកម្មផលិតធុនស្រាល និងវិស័យឧស្សាហកម្មកាត់ដេរ៕ ដោយ៖ ភីន រ៉ា