ភ្នំពេញ៖ គណបក្សរាជានិយមដែលនៅសេសសល់សមាជិកបន្តិចបន្តួចពីការបែកបាក់ប្រេះស្រាំអស់កាល​ជា​ច្រើន​​ហើយនោះ នៅតែបន្តវប្បធម៌ឈ្លោះទាស់ទែងខ្វែងគំនិតគ្នា​មិនចេះចប់មិនចេះហើយហើយវប្បធម៌​លាបមុខ លាប​​មាត់ដាក់គ្នានេះតើដល់ថ្ងៃណា​ទើបបញ្ចប់ បើសព្ចថ្ងៃរកតែមួយ​សំលេងមិនទាំងបានផងនោះ​បន្ទាប់ពីច្របា​ច់ចូល​គ្នា​​បានមួយដង្ហើមចង្រិតរួចមក គណបក្សរាជានិយមទាំងពីរ គឺ គណបក្សរាជានិយមហ៊វុនស៊ិនប៉ិច និង គណបក្ស​ជាតិ​​និយម ដែលបានប្រកាសរំលាយ​ខ្លួនកាលពីមុនបោះឆ្នោតសកល២០១៣កន្លងទៅនេះហើយនោះ បានងើប​ឡើង​​ទាំង​ត្រដាប​ត្រដួស មកឈ្លួស​ទាស់​​ទែងខ្វែងគំនិតគ្នាតទៅទៀតហើយ។

នៅថ្ងៃទី២១មករា ឆ្នាំ២០១៤នេះ ការិយា​ល័យ​អ្នកនាំពាក្សគណបក្ស ហ៊្វុនស៊ិនប៉ិច បាន​ចេញនូវ​សេចក្តី​ប្រកាស​ព័ត៌​​មាន​ ពីការ​ទាត់ចោលនូវ​ការចោទ​ប្រកាន់​របស់គណបក្សជាតិនិ​យមថា គណបក្ស ហ៊្វុនស៊ិនប៉ិចកំពុងធ្វើសកម្មភាព​​គម្រាមកំហែង បំភិតបំភ័យ និងប៉ុនប៉ង​ទិញ​ទឹកចិត្តអតីតៈសមាជិករបស់ខ្លួននៅតាមមូលដ្ឋាន។

នៅក្នុងសេចក្តី​ប្រកាស​​​​​​ព័ត៌មាននោះបានថ្កោល​ទោសចំពោះ​ទង្វើ​របស់គណបក្សជាតិនិយមដែលបានបរិហាកេរ្តិ៍​​ថ្នាក់​​​​​​​ដឹកនាំគណបក្ស ហ៊្វុនស៊ិនប៉ិចដោយគ្មានមួលដ្ឋាន និងបំភ័ន្តការ​ពិត​ទាំងស្រុងក្នុងបំណ​ង​ឲ្យគេស្គា​ល់​មេដឹកនាំ​​​​ថ្មី​​​របស់​ខ្លួន ដែលទើបបានបំបែកខ្លួនចេញពី​គណបក្សហ៊្វុនស៊ិនប៉ិច និងប៉ុនប៉ងអូសទាញសមាជិកគណបក្ស ហ៊្វុនស៊ិន​​​ប៉ិច (អតីតៈសមាជិកគណបក្សជាតិនិយម) ឲ្យទៅតាមខ្លួនតែប៉ុណ្ណោះ។​

សេចក្តីប្រកាសបានបញ្ជាក់ថាកន្លងមក​គណ​ប​ក្ស​ជាតិនិយមដែលមានលោក សៅ រ៉ានី លោក យូ ហុកគ្រី ជា
ព្រឹទ្ធ​បុរស ព្រមទាំងថ្នាក់ដឹកនាំជាន់​ខ្ពស់​ជាច្រើន​រូប​និងថ្នាក់ដឹកនាំ​តាម​មូលដ្ឋានផងនោះបានចូលមករួបរួម​ជាមួយ​គណបក្ស​ ហ៊្វុនស៊ិនប៉ិចអស់ហើយតាមរយៈ​សមាជ​វិសាមញ្ញគណបក្ស ហ៊្វុនស៊ិនប៉ិច កាលពីថ្ងៃទី០២ខែមេសាឆ្នាំ​២០១៣​​ហើយនៅ​តែបន្តជាសមាជិកគណបក្ស ​ហ៊្វុនស៊ិនប៉ិច រៀងរហូត។ បន្ទាប់ពីគណបក្ស ហ៊្វុនស៊ិនប៉ិច មិនមាន​លទ្ធភាពផ្តល់មុខតំណែងជូនភរិយា​របស់​លោក​បាន ទើប លោក ផែង ហេង បានចាក​ចេញពីគណបក្ស ហ៊្វុនស៊ិន​ប៉ិចត្រលប់ទៅពង្រឹងគណបក្សជាតិនិយមវិញ។

ការិយាល័យអ្នកនាំ​ពាក្ស​គណបក្ស ហ៊្វុនស៊ិនប៉ិច បានបង្ហាញថា អតីតអ្នកដឹកនាំជាន់ខ្ពស់​គណបក្សជាតិ​និយម​ដទៃ​​ទៀត រួមទាំងព្រឹទ្ធបុរស និងឥស្សរជនជាច្រើនរូបទៀត បានប្តេជ្ញាបន្តនៅជាមួយគណបក្ស ហ៊្វុនស៊ិនប៉ិចក្រោម​ការ​​ដឹក​នាំរបស់​សម្តេច​រាជបុត្រី ​ព្រះអនុជ នរោត្តម អរុណរស្មី ជាប្រធាន ដើម្បីរក្សានិងលើកកម្ពស់កេរ្តិ៍ដំណែលដ៏ពិ​សិដ្ឋ​របស់​​​ព្រះបរមរតនកោដ្ឋ ដែលជាព្រះរាជបិតាស្ថាបនិកគណបក្ស ហ៊្វុនស៊ិនប៉ិច។ជាមួយគ្នានេះដែរកាលពីថ្ងៃទី៣០ ​​ខែធ្នូ ឆ្នាំ២០១៣កន្លងទៅថ្មីនេះ គណបក្ស ហ៊្វុនស៊ិនប៉ិច បានសម្រេចបណ្តេញសមាជិកម្នាក់ឈ្មោះ សុខ សុវណ្ណ ​ចេញពីសមាជិក​របស់​ខ្លួន ដោយ​មិនបានបញ្ជាក់ពីមូលហេតុឲ្យដឹងនៅឡើយទេ ៕ ដោយ៖ ភីន​​រ៉ា​