ភ្នំពេញ៖ ក្រសួងសេដ្ឋកិច្ចបានសម្រេចឱ្យនាយកដ្ឋានជំនាញតាក់តែងច្បាប់ដែលចាំបាច់និងបន្ទាន់ទុកជាមុន ដែលអាចឆ្លើយតបតាមជំហានជាយុទ្ធសាស្ត្រនៃកម្មវិធីកំណែទម្រង់នៃការគ្រប់គ្រងហិរញ្ញវត្ថុសាធារណៈ។ដើម្បីធានានូវនីត្យានុកូលភាព សង្គតិភាព សុខដុមភាព និងតម្លាភាព នៃការតាក់តែងសេចក្តីព្រាងលិខិតបទដ្ឋានគតិយុត្ត ដែលពាក់ព័ន្ធសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សានីតិកម្ម បាននិងកំពុងធ្វើការប្រមូលចងក្រងច្បាប់និងលិខិតបទដ្ឋានគតិយុត្ត ជាធរមានពាក់ព័ន្ធសមត្ថកិច្ចរបស់ក្រសួងសំដៅបង្កើតកម្រងសម្រង់បទប្បញ្ញតិគតិយុត្តសម្រាប់ធ្វើជាឧបការណ៍បំពេញការងាររបស់ថ្នាក់ដឹកនាំក្រសួង និងមន្ត្រីរាជការ ព្រមទាំងសម្រាប់បម្រើសេចក្តីត្រូវការរបស់សាធារណជនជាអ្នកអនុវត្តច្បាប់ ក៏ដូចជាអ្នកសិក្សាស្រាវជ្រាវអំពីច្បាប់ក្នុងវិស័យសេដ្ឋកិច្ចនិងហិរញ្ញវត្ថុផងដែរ។ដើម្បីធានាសង្គតិភាព និងប្រសិទ្ធភាពនៃការតាក់តែងបទដ្ឋានគតិយុត្តិ ក្រុមប្រឹក្សានីតិកម្មបាន រៀបចំឱ្យមានសមាសភាពពិនិត្យសេចក្តីព្រាងដោយផ្តោតលើទិដ្ឋភាព៤ យ៉ាងគឺ៖ ទិដ្ឋភាពនយោបាយ ទិដ្ឋភាពសេដ្ឋកិច្ច ទិដ្ឋភាពបច្ចេកទេស និងទិដ្ឋភាពច្បាប់។លោក អូន ព័ន្ធមុនីរ័ត្ន រដ្ឋមន្ត្រី និងជាប្រធានក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ បានដាក់វិធានការណ៍ណែនាំ អនុវត្តបន្តនូវច្បាប់ ដើម្បីទ្រទ្រង់ និងអភិវឌ្ឍវិស័យនីតិកម្ម នៅក្នុងក្របខណ្ឌនៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ។គួរបញ្ជាក់ថា ក្រុមប្រឹក្សានីតិកម្មនៃក្រសួងសេដ្ឋកិច្ច កាលពីម្សិលមិញនេះ បានពិនិត្យនិងពិភាក្សាលើចំណុចធំៗចំនួន៣គឺ៖ ទី១.របាយការណ៍វឌ្ឍនភាពនៃការងាររៀបចំចងក្រងលិខិតបទដ្ឋានគតិយុត្ត របស់លេខាធិការដ្ឋានក្រុមប្រឹក្សានីតិកម្ម ទី២. កម្រងសម្រង់បទប្បញ្ញត្តិក្នុងវិស័យពន្ធដារ ដែលរៀបចំដោយលេខាធិការដ្ឋានក្រុមប្រឹក្សានីតិកម្ម និងទី៣.គឺការរៀបចំផែនការអាទិភាព៣ ឆ្នាំរំកិលនៃការរៀបចំតាក់តែងលិខិតបទដ្ឋានគតិយុត្តរបស់ក្រសួង៕
ដោយ៖ រតនា