ភ្នំពេញ៖ កម្ពុជាទទួលបានមេដាយ២៣គ្រឿងហើយ ក្នុងការប្រកួតកីឡាស៊ីហ្គេម រហូតមកដល់ព្រឹកថ្ងៃទី១៦ ធ្នូ ២០១៣។ មេដាយមាសដែលកម្ពុជាទទួលបានរហូតមកដល់ពេលនេះ មាន៤លើវិញ្ញាសាចំបាប់ ដែលបានទៅលើកីឡាករ កៅ ឆេងហុង ប្រកួតចំបាប់ក្នុងទម្ងន់៨៤គីឡូក្រាម និងកីឡាការិនី នី សំណាង ប្រកួតចំបាប់ក្នុងទម្ងន់៦៣គីឡូក្រាម និងអ្នកទទួលមេដាយម្នាក់ទៀតឈ្មោះ ឌន សៅ ដែលឈ្នះបានមេដាយមាសក្នុងកីឡាចំបាប់ប្រភេទទម្ងន់១២០គីឡូក្រាម បន្ទាប់ពីយកឈ្នះកីឡាករម្ចាស់មីយ៉ាន់ម៉ា កីឡាការិនីចំបាប់ ចូវ សុធារ៉ា បានយកឈ្នះកីឡាការិនីថៃ នៅវគ្គផ្ដាច់ព្រ័ត្រ លើវិញ្ញាសាចំបាប់៤៤គីឡូក្រាម ដែលជួយឲ្យកម្ពុជាទទួលបាន មេដាយមាសទី៤របស់ខ្លួនបើគិតរហូតមកដល់ម៉ោង១០ព្រឹកថ្ងៃ១៦ ធ្នូ នេះ កម្ពុជាទទួលបានមេដាយចំនួន២៣គ្រឿងហើយ ក្នុងនោះមេដាយមាស៤ ប្រាក់៧ និងសំរិទ្ធ១២។
ទន្ទឹមនឹងនោះដែរ គេបានកត់សម្គាល់ឃើញថា ប្រទេសដែលទទួលបានមេដាយមាសច្រើនជាងគេ គឺ ថៃ ទទួលបានមេដាយមាស៤៧ ប្រាក់៤១ សំរិទ្ធ៤០, លំដាប់ទី២ ប្រទេសមីយ៉ាន់ម៉ា ទទួលបានមេដាយមាស៣៨ ប្រាក់៣៥ សំរិទ្ធ៣៦, លំដាប់ទី៣ ប្រទេសវៀតណាម មេដាយមាស៣៧ ប្រាក់៣២ សំរិទ្ធ៤១,។បន្ទាប់មកទៀត គឺប្រទេសឥណ្ឌូនេស៊ី មេដាយមាស៣២ ប្រាក់៤៧ សំរិទ្ធ៤៥, ម៉ាឡេស៊ី មេដាយមាស២៤ ប្រាក់១៦ សំរិទ្ធ៤១, ប្រទេសសឹង្ហបុរី មេដាយមាស១៧ ប្រាក់១៤ សំរិទ្ធ១៤, ហ្វីលីពីនមេដាយមាស១១ ប្រាក់១៤ សំរិទ្ធិ២២, ប្រទេសកម្ពុជា មេដាយមាស៤ ប្រាក់៧ សំរិទ្ធ១២, ឡាវ មេដាយមាស២ ប្រាក់៦ សំរិទ្ធ១៩, ប្រ៊ុយនេ មេដាយមាស១ ប្រាក់១ និងសំរិទ្ធិ៤, ចំណែក ប្រទេសទីម័រខាងកើត ទទួលបានមេដាយសំរិទ្ធ១៕ ដោយ៖ ភីនរ៉ា