ភ្នំពេញ៖ តាមការពិនិត្យការអនុវត្តកិច្ចលទ្ធកម្ម បានបង្ហាញថា ក្រសួងស្ថាប័នរដ្ឋ ក្នុងរាជធានីខេត្ត ទាំងអស់មានលក្ខណៈកាន់តែល្អប្រសើរ។ជាក់ស្តែង ដប់ខែដើមឆ្នាំ២០១៣នេះ ការអនុវត្តកិច្ចលទ្ធកម្ម ជាពិសេសការរៀបចំផែនការលទ្ធកម្ម ការអនុវត្តផែនការលទ្ធកម្ម និងការផ្ញើរបាយការណ៍លទ្ធកម្មបានបង្ហាញពីចំណុចវិជ្ជមាន និងអវិជ្ជមានជាងមុន ។
ថ្លែងក្នុងកិច្ចប្រជុំស្តីពីការត្រួតពិនិត្យការអនុវត្តលទ្ធកម្មឆ្នាំ២០១៣ លោក វង់ សណ្តាប់ អនុរដ្ឋលេខាធិការក្រសួងសេដ្ឋកិច្ចបានមានប្រសាសន៍ថា ប្រព័ន្ធលទ្ធកម្ម ជាផ្នែកសំខាន់មួយនៃកម្មវិធីកំណែទម្រង់ហិរញ្ញវត្ថុរបស់រាជរដ្ឋាភិបាល និងជាឧបករណ៍មួយក្នុងចំណោមឧបករណ៍ និងយន្តការទាំងឡាយសម្រាប់គ្រប់គ្រងការចំណាយថវិការដ្ឋ ។
គោលបំណងរបស់ប្រព័ន្ធលទ្ធកម្មសាធារណៈគឺធានាអោយដំណើរការលទ្ធកម្មសាធារណៈសម្រាប់ការទិញ ការសាងសង់ ការជួសជុល ការជួលសេវាកម្ម និងការជួលសេវាទីប្រឹក្សា ប្រព្រឹត្តិទៅប្រកបដោយតម្លាភាព គណនេយ្យភាព ភាពយុត្តិធម៌ ប្រសិទ្ធភាព គុណភាព សមភាព ការសន្សំសំចៃ និងទាន់ពេលវេលា ព្រមទាំងធានាអោយបាននូវប្រព័ន្ធលទ្ធកម្មសាធារណៈឯកភាពមួយនៅទូទាំងប្រទេស។ដូច្នេះដើម្បីសម្រេចគោលបំណងនេះ ស្ថាប័នអនុវត្តលទ្ធកម្មត្រូវអនុវត្តអោយបានខ្ជាប់ខ្លួនតាមវិធីសាស្ត្រ នីតិវិធីលទ្ធកម្មសាធារណៈ។និងដើម្បីអោយកិច្ចលទ្ធកម្មបានដំណើរការដោយរលូននិងមានប្រសិទ្ធភាព គ្រប់ស្ថាប័នអនុវត្តលទ្ធកម្ម ត្រូវរៀបចំផែនការលទ្ធកម្មប្រចាំឆ្នាំ។ឆ្នាំ២០១៣ នេះជាឆ្នាំទីប្រាំពីរហើយដែលផែនការលទ្ធកម្មត្រូវបានអនុវត្តន៍ដោយគ្រប់ស្ថានអនុវត្តលទ្ធកម្ម។គួរបញ្ជាក់ថា ក្នុងប្រទេសកម្ពុជាមានស្ថានប័នអនុវត្តលទ្ធកម្មសរុបមានចំនួន ៩៨ស្ថាប័នក្នុងនោះក្រសួង ស្ថាប័នថ្នាក់កណ្តាលមានចំនួន៤៣ស្ថាប័ន រាជធានី ខេត្តមានចំនួន២៤ស្ថាប័ន សហគ្រាសសាធារណៈនិងគ្រឹះស្ថានសាធារណៈលក្ខណៈរដ្ឋបាលមានចំនួន៣១ស្ថាប័ន៕ ដោយ៖ រតនា