ភ្នំពេញ៖ សហព័ន្ធអ្នកនាំអង្ករចេញកម្ពុជាស្នើឲ្យអង្គភាពគយ និងរដ្ឋាករ លើកលែងសម្រាប់​ការយកកម្រៃ​ថ្លៃ​សេវា​បំពេញសំណុំបែបបទនាំចេញអង្ករចេញ ក្នុងគោលបំណងជួយកាត់​បន្ថយថ្លៃ​ចំណាយឲ្យនៅទាបនិង​លើកកម្ពស់​​​ការ​​នាំចេញអង្ករ ខណៈដែលថ្លៃសោហ៊ុយ​នាំ​ចេញ​អង្ករ​នៅកម្ពុជាខ្ពស់ជាងប្រទេសជិតខាង។

ការស្នើសុំឲ្យបានការលើកលែងថ្លៃបំពេញបែបបទនេះ ត្រូវបានធ្វើឡើងកាលពីថ្ងៃសុក្រ​សប្តាហ៍​មុននៅក្នុងកិច្ច​​​ជំនួប​​​​ពិភាក្សា​មួយរវាង​មន្ត្រី​អង្គភាពគយនិងរដ្ឋាករ ជាមួយនិងសហព័ន្ធ​អ្នកនាំអង្ករចេញកម្ពុជា នៅទីចាត់ការគយ និង​រដ្ឋាក​​រក្នុងរាជធានីភ្នំពេញ។ប្រធានសហព័ន្ធអ្នកនាំអង្ករចេញកម្ពុជា លោកឧកញ៉ា គឹម សាវុធ បានឲ្យដឹងថា បន្ទាប់ពី រដ្ឋាភិបាលបានដាក់ចេញគោលនយោបាយជំរុញផលិតកម្មស្រូវ និងបង្កើនការនាំ​ចេញអង្ករ មក​ឧស្សាហកម្មនេះ​​មាន​​​ការរីកចម្រើនយ៉ាងឆាប់រហ័ស ប៉ុន្តែវិស័យនេះនៅតែត្រូវ​ការលើកទឹក ចិត្តបន្ថែមទៀត ស្របពេលដែលថ្លៃ​សោហុយ​​នាំចេញអង្ករនៅកម្ពុជា មាន​តម្លៃ​ខ្ពស់​ជាង ប្រទេសជិតខាង។លោកថា ឧស្សាហកម្មស្រូវ-អង្ករបាននឹង​កំពុង​​​តែ​​​មានការលើកទឹកចិត្ត និង​ជំ​រុញយ៉ាងខ្លាំង​ពីរាជរដ្ឋាភិបាល ពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ដូច្នេះ​គួរ​តែមានការអនុគ្រោះ ដូចការវិនិយោគនៅក្នុង​តំបន់​សេដ្ឋ​កិច្ច​​ពិសេស​សម្រាប់ការមិន​បង់​​ថ្លៃ​កម្រៃសេវាកម្មបំពេញបែបបទគយនិងរដ្ឋាករផ្សេងៗ ដើម្បីកាត់បន្ថយការចំណាយលើ​សោ​ហ៊ុយ​​នៃការនាំ​ចេញអង្ករ។

លោកឧកញ៉ាបានបញ្ជាក់ថា សព្វថ្ងៃការបង់ថ្លៃលើកម្រៃសេវាបំពេញសំណុំបែបបទគយ និង​រដ្ឋាករ​​សម្រាប់​នាំចេញ​អង្ករក្នុងទូរកុងតឺន័រមួយថ្លៃ៦ម៉ឺនរៀលស្មើនឹង១៥ដុល្លារអាមេរិក ប៉ុន្តែ​ប្រ​សិន​បើ​មាន​ការលើកលែងសម្រាប់​ការបង់​ថ្លៃ​សេវានេះ នឹងអាចជួយកាត់បន្ថយការ​ចំណាយ​​បានមួយ​កម្រិតបន្ថែមទៀត។ បច្ចុប្បន្នថ្លៃចំណាយសរុប​សម្រាប់​​​​នាំ​ចេញ​​អង្ករនៅកម្ពុជាក្នុង​១​តោន​ថ្លៃ២២​ដុល្លារអាមេរិក សម្រាប់កំពង់ផែភ្នំពេញ២៥ដុល្លារអាមេរិក សម្រាប់កំពង់ផែ​ព្រះ​សីហនុ​​ដែល​ក្នុងនោះរួមបញ្ចូលទាំងថ្លៃដឹកជញ្ជូនថ្លៃបំពេញសំណុំបែបបទគយ កាំកុងត្រូល​និង​ថ្លៃលើក​ដាក់​នៅ​កំពង់​ផែខណៈដែលនៅប្រទេសវៀតណាម ថ្លៃចំណាយសរុបត្រឹមតែ១៥​ដុល្លារ​អាមេរិក​ប៉ុណ្ណោះ។ជាមួយគ្នានោះ លោកឧកញ៉ា លឹម ប៊ុនហេង អគ្គនាយកក្រុមហ៊ុននាំចេញអង្ករឡូរ៉ង់ បានថ្លែង​ការគាំទ្រ​ទៅ​នឹងការស្នើឲ្យមានការ លើកលែងសម្រាប់បង់ថ្លៃកម្រៃសេវាបំពេញបែបបទ​គយ​នេះ។ ​លោក​ឧកញ៉ាថ្លែងថា វានឹងចំណេញពេលវេលា និង​កាត់បន្ថយការចំណាយក្រៅផ្លូវការ ព្រមទាំង​ជួយលើកកម្ពស់ តម្លៃស្រូវរបស់កសិករ ក៏ដូច​ជាជំរុញការនាំចេញ​អង្ករ​ឲ្យ​​​បានកាន់​តែច្រើន​ជាងនេះក្នុងឆ្នាំ២០១៤នឹងឆ្នាំបន្ត។ទន្ទឹមគ្នានេះដែរលោកឧកញ៉ាលើកឡើងថា អ្វីដែលជាបញ្ហា​​​​​ចម្បង​​​​របស់ម្ចាស់រោងម៉ាស៊ីនកិន​ស្រូវនិងអ្នកនាំចេញអង្ករនាពេលនេះ គឺកង្វះទុន ដើម្បីប្រមូលទិញស្រូវពីប្រជា​​​​កសិករ ដែលធ្វើ​ឲ្យ​ស្រូវបន្តហូរចេញទៅប្រទេសជិតខាងយ៉ាងច្រើន ។​ រដ្ឋាភិបាលកម្ពុជាបានដាក់ចេញ​គោល​នយោ​បាយជំរុញផលិតកម្មស្រូវ និងបង្កើនការនាំចេញអង្ករនៅឆ្នាំ ២០១០ ដែលក្នុងនោះបាន​ដាក់​ផែនការជំរុញ​នាំចេញ​​​​អង្ករ​​ឲ្យសម្រេចបាន ១លានតោននៅឆ្នាំ ២០១៥។

មន្ត្រីជាន់ខ្ពស់គយ និងរដ្ឋាករមួយរូបដែលសុំមិនបញ្ចេញឈ្មោះបានឲ្យដឹងថា អង្គភាពគយ​ស្វាគមន៍ចំពោះ​សំណើរ​នេះ ប៉ុន្តែស្ថាប័ននេះត្រូវការពិចារណានិងការអនុញ្ញាត្តពីរាជ​រដ្ឋាភិ​បាល។គួរំលឹកថា តាមរបាយការណ៍ពីលេខាធិការ​ដ្ឋានច្រកចេញចូលតែមួយ សម្រាប់បំពេញ​បែប​បទ​នាំ​ចេញ​​អង្ករបានឲ្យដឹងថា ការនាំចេញអង្កររបស់កម្ពុជានៅរយៈ​ពេល១១ខែដំបូងឆ្នាំ​២០១៣​​កន្លង​មកនេះ ​សម្រេចបានចំនួន៣៣២០០៩តោន កើនឡើង ៩៤ ភាគរយ បើប្រៀប​ធៀប​​នឹង​រយៈ​ពេលដូច​គ្នាកាលពីឆ្នាំមុន៕

ដោយ៖ ស.​ស្អាត