ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានបង្ហាញឲ្យដឹងថា នៅដើមឆ្នាំ២០១៤នេះការនាំចេញផលនេសាទមានការកើនឡើងប្រមាណជា២០០តោន បើប្រៀបធៀបនឹងរយៈពេលដូចគ្នាកាលពីឆ្នាំ២០១៣។ នេះបើយោងទៅតាមរបាយការណ៍ផងនេសាទរបស់ក្រសួងកសិកម្ម។
របាយការណ៍ដដែលបន្តថា រយៈពេល២ខែឆ្នាំ២០១៤នេះការនាំចេញផលនេសាទមានចំនួន២.២០០តោន ស្មើនឹង១១%នៃផែនការ២០.០០០តោន។ ចំនួននេះបើប្រៀបធៀបនឹងរយៈពេលដូចគ្នាឃើញថាមានការកើនឡើង២០០តោន។ រីឯផលនេសាទក្នុងរដូវនេសាទសរុបចំនួន១៥.០០០តោនស្មើនឹង១០ភាគរយនៃ ផែនការ១៥០.០០០តោនបើធៀបរយៈពេលដូចគ្នាកើនឡើង៣.០០០តោន។ ផលនេសាទសមុទ្រសរុបចំនួន១.៧០០តោនស្មើនឹង២១,២៥ភាគរយនៃផែនការ៨.០០០ តោនបើធៀបរយៈពេលដូចគ្នាកើនឡើង១០០តោន។ ដោយឡែក ផលនេសាទកែច្នៃវិញ ក្នុងរយៈពេល២ខែដើមឆ្នាំ២០១៤នេះដែរកែច្នៃ បាន១.៥០០តោនស្មើនឹង១៥ភាគរយនៃផែនការ១០.០០០តោនកើនឡើង៥០០តោន។
បើយោងតាមរបាយការណ៍ខាងលើបានបញ្ជាក់ផងដែរថា ក្នុងរយៈពេល២ខែនេះការបង្ក្រាបបទល្មើសនេសាទបានចំនួន២២៣ករណី ដោយកើតនៅតំបន់ទឹកសាប២១៤ករណី និងតំបន់សមុទ្រ៩ករណីបើប្រៀបធៀបនឹងរយៈពេលដូចគ្នាកើនឡើង១៥៦ករណី ក្នុងនោះនៅតំបន់ទឹកសាប១៥៤ករណី និងតំបន់សមុទ្រ២ករណី។
ផលនេសាទមានការកើនឡើងបានធ្វើឲ្យប្រាក់ចំណូលក៏មានការកើនឡើងផងដែរ។ ចាប់ពីខែមករា រហូតដល់ខែកុម្ភៈ ឆ្នាំ២០១៤ កន្លងមកនេះប្រាក់ចំណូលបានមកពីវិស័យជលផលសរុបចំនួន៥៦៤.២៧២.២៥០រៀល ស្មើនឹង១៨,៥៥ភាគរយនៃផែនការ៣.០៤២.៥០០.០០០រៀល។ ចំនួននេះបើធៀបទៅនឹងរយៈពេល២ខែដូចគ្នាកាលពីឆ្នាំ២០១៣ កន្លងទៅឃើញថាមានការកើនឡើងចំនួន២៥៥.៤០៣.២៥០រៀល។
គួរបញ្ជាក់ថា ប្រទេសកម្ពុជានាំផលត្រីរបស់ខ្លួនទៅកាន់ប្រទេសចំនួន១០ដែលភាគច្រើន ទៅកាន់បណ្តាប្រទេសអាស៊ីដូចជា៖ ប្រទេសថៃ, វៀតណាម, សិង្ហបុរី, ហុងកុង, ចិន, ជប៉ុន, កូរ៉េខាងត្បូង, រុស្ស៊ី, សហរដ្ឋអាមេរិក, និងប្រទេសអូស្រា្តលី៕
ដោយៈ ភីនរ៉ា