ភ្នំពេញ៖ បញ្ហាទាក់ទងនឹងការលើកកម្ពស់ស្ថានភាពសុខភាពមាតាទារក និងផែនការគ្រួសារជា អទិភាពចំបងនៅក្នុងវិស័យសុខាភិបាល ដោយក្រសួងមានក្តីកង្វល់ច្រើនដោយសារតម្រូវាការធនធាន សម្រាប់អនុវត្តផែនការយុទ្ធសាស្រ្តសុខាភិបាលមានទំហំធំ។ ជាក់ស្តែង ក្រសួងបានធ្វើការអំពាវនាវឱ្យ ដៃគូអភិវឌ្ឍន៍ទាំងអស់ចូលរួមចំណែកជួយគ្នា ដើម្បីសម្រេចបាននូវជោគជ័យទៅតាមគោលដៅរំពឹង ទុក។នេះជាអះអាងរបស់លោក អេង ហួត រដ្ឋលេខាធិការក្រសួងសុខាភិបាលថ្លែងថ្ងៃទី ២០ ធ្នូ នេះ ក្នុងឱកាសបិទគម្រោងគាំពារមាតា និងទារក និងផែនការគ្រួសាររបស់ទីភ្នាក់ងារសហរដ្ឋអាមេរិកដើម្បីអភិវឌ្ឍអន្តរជាតិប្រចាំកម្ពុជា នៅសណ្ឋាគារ កាំបូឌីយ៉ាណា រាជធានីភ្នំពេញ។
លោករដ្ឋលេខាធិការបានបន្តថា ឆ្លើយតបតាមអំពាវនាវនោះ មានដៃគូជាច្រើនទាំងអង្គការពហុ ភាគី ទ្វេភាគី និងអង្គការមិនមែនរដ្ឋាភិបាលបានចូលរួមអនុវត្តជាមួយនឹងក្រសួងសុខាភិបាល ក្នុងនោះ មាន PSI, RACHA, RHAC, URC, MSI ដែលទទួលជំនួយពី USAID អនុវត្តគម្រោងគាំពារមាតា និងទារក ក៏ដូចជាផែនការគ្រួសារផងដែរ។ មកទល់នឹងពេលបច្ចុប្បន្ននេះ គម្រោងខាងលើបានសម្រេច ជោគជ័យគួរជាទីពេញចិត្តទៅតាមទិសដៅ និងគោលបំណងដែលបានកំណត់ទុក។
លោកបានបញ្ជាក់ថា ទោះបីជាមានការបិទគម្រោងគាំពារមាតាទារក និងផែនការគ្រួសារក៏ពិតមែន ប៉ុន្តែលោកជាក់ជឿជាក់ថា អង្គការ USAID នឹងដាក់ឱ្យដំណើរការនូវគម្រោងថ្មីជាបន្តទៀតក្នុង រយៈពេល៥ឆ្នាំខាងមុខ។ ហើយគម្រោងរបស់USAID ថ្មីនោះ នឹងចាប់ផ្តើមក្នុងពេលឆាប់ៗនេះដែរ ស្របជាមួយនឹងយុទ្ធសាស្រ្តសុខាភិបាលនៅកម្ពុជាប្រកបដោយប្រសិទ្ធិភាព និងថាមពល ដើម្បីជួយ ជាមូលនិធិសមធម៌ អាហារូបត្ថម្ភ ការកែលម្អនិងប្រើបា្រស់ប្រព័ន្ធព័ត៌មានសុខាភិបាល លើការគាងគរធនធានផ្សេងៗ លើការអភិវឌ្ឍសេវាសុខភាពសាធារណៈបញ្ហានានាឱ្យសម្រេចបានជោគជ័យនៅឆ្នាំ២០១៥ និងឆ្នាំបន្តបន្ទាប់ទៀត។
តំណាងប្រធានគម្រោងមកពី (USAID) លោកស្រី Rebecca Black បានមានប្រសាសន៍ថា សហរដ្ឋអាមេរិកមានទស្សនៈវិស័យរយៈពេលវែង ដើម្បីឆ្លើយតបទៅការអភិវឌ្ឍនៅក្នុងប្រទេសកម្ពុជា ចំពោះគោលដៅសំខាន់ គឺជួយកម្ពុជាដើម្បីកសាងនូវវិស័យសុខាភិបាលដែលក្នុងនោះស្មើនឹងពាក់កណ្តាលនៃជំនួយរបស់អាមេរិកដែលសុទ្ធសឹងជាវិស័យសំខាន់។
លោស្រី Rebecca Black បន្ថែមថា អស់រយៈពេល២០ឆ្នាំកន្លងទៅនេះ ដែលអង្គការ USAID និងក្រសួងសុខាភិបាលបានធ្វើការសហប្រតិបត្តិការ ដើម្បីពង្រឹងបណ្តុះបណ្តាលឡើងវិញនូវវិស័យសេវាសាធារណៈសុខុមាលភាពប្រជាពលរដ្ឋកម្ពុជានៅតាមទីជនបទ និងទីក្រុង។ ម៉្យាងមិញនោះដែរ មានដៃគួអភិវឌ្ឍន៍ដ៏ទៃទៀត ក៏បានចូលរួមចំណែកជួយពង្រឹងសមត្ថភាពផ្នែកមូលដ្ឋានសុខាភិបាលនៅតាមមណ្ឌលសុខភាពនានាទូទាំងប្រទេស និងបើកវគ្គបណ្តុះបណ្តាលមន្រ្តីពេទ្យលើការអភិវឌ្ឍកែ លម្អជីវិតមាតាទារក និងកុមារជាប្រចាំថ្ងៃ។
លោកស្រីបញ្ជាក់ថា ការបិទគម្រោងគាំពារមាតា និងទារក និងផែនការគ្រួសារ ទទួលសម្រេចនូវ លទ្ធផលនៅកម្ពុជានោះរួមមាន៖ កាត់បន្ថយរូមគ្នានូវការរីករាលដាលជំងឺអេដស៍, ជំងឺរបេង, ជំងឺឆ្លងនានា, ផ្តាសាយបក្សី,គ្រុនចាញ់, គ្រុនឈាម ព្រមទាំងសមិទ្ធផលធំៗជាច្រើនទៀត។ តែទោះបីជាយ៉ាងណាក៏ដោយ ក៏នៅតែមានការសង្កេតឃើញថាអត្រាមរណភាពរបស់មាតា និងទារកមានការស្លាប់ច្រើននៅឡើយនៅកម្ពុជា៕ ដោយ ៖ ភីនរ៉ា