ភ្នំពេញ៖ លោក ប៉ា សុជាតិវង្ស នឹងបេ្តជ្ញាចិត្តប្រែក្លាយរាជធានីភ្នំពេញឲ្យកាន់តែស្រស់ស្អាតថែមទៀត ពិសេសគ្មាន សំរាមនៅរាយប៉ាយតាមទីសាធារណៈ ដើម្បីបង្អួតភ្ញៀវទេសចរណ៍ជាតិអន្តរជាតិ និងធានាដល់សុខភាពរស់នៅរស់ប្រជាពលរដ្ឋ។ អ្នកពាក់ពន្ធ័ជុំវិញរាជធានី ភ្នំពេញប្រមាណជាង៥០០នាក់ ក្នុងនោះមានទាំង ប្រជាពលរដ្ឋ អាជ្ញាធរមូលដ្ឋាន អង្គការ សង្គមស៊ីវិល និងក្រុមហ៊ុនប្រមូលសំរាម បានរួមគ្នាកំណត់ យុទ្ធសាស្រ្តកែលម្អបញ្ហាសំរាមនៅក្នុងរាជធានីភ្នំពេញឲ្យកាន់តែប្រសើរឡើងសំដៅលើកកម្ពស់សុខភាពប្រជាពលរដ្ឋ និងសោភណ្ឌភាពទីក្រុង។
.jpg)
ការរួមគ្នាកំណត់យុទ្ធសាស្រ្តទាំងនោះឡើង ខណៈ ដែលសព្វថ្ងៃនេះ ការផ្តល់សេវាសំអាត ប្រមូល និងការដឹកជញ្ជូនសម្រាម
នៅក្នុងក្រុងមិនទាន់មាន ការរីកចំរើន ធ្វើឲ្យសំរាមនៅ តែមានរាប៉ាយតាមទីសាធារណៈ ពិសេសការមិនចិត្តទុកដាក់របស់ប្រជាពលរដ្ឋផងដែរ បើទោះបីជាមានយន្តការផាកពិន័យក៏ដោយ។ថ្លែងក្នុងសិក្ខាសាលានៅព្រឹកថ្ងៃទី២៥ ខែធ្នូនេះ លោក ប៉ាសុជាតិវង្ស អភិបាលរាជធានីភ្នំពេញមានប្រសាសន៍ថា នេះជាការរៀបចំ ផែនការថ្មីមួយសំដៅកែប្រែសោភណ្ឌភាព និងបរិសា្ថនរាជធានីភ្នំពេញកាន់តែល្អប្រសើរឡើងចាប់ពីឆ្នាំ២០១៤ទៅ ក្នុងនោះកំណត់ ពេលវេលាឲ្យ បានច្បាស់លាស់រវាងការប្រមូលសំរាម និងការបញ្ចេញសំរាម ការទុកដាក់សំរាម ពិសេសផ្លាស់ប្តូរ ឥរិយាបថប្រជាពលរដ្ឋឲ្យបញ្ឈប់ការចោលសំរាមគ្មានសណ្តាប់ធ្នាប់តាមទីសាធារណងាកមកទុកដាក់សំរាមឲ្យបានត្រឹមត្រូវតាមទីកន្លែងកំណត់។
ជាមួយនោះ លោកបានទទួលស្គាល់ថា ការផ្លាស់ប្តូរឥរិយាបថ និងទំលាប់របស់ប្រជា ពលរដ្ឋកន្លងមកនេះពុំមែនជាការងាយស្រួលនោះទេ គឺត្រូវការពេលវេលាថែមទៀត ប៉ុន្តែទោះជា យ៉ាងនេះក្តី នឹងធ្វើឲ្យមានការផ្លាស់ប្តូរដើម្បីធានាថា ទីក្រុងភ្នំពេញពុំមែនជាគ្រាប់ បែក មេរោគដោយ សារសំរាមនោះទេ។លោកអភិបាលរាជធានីបានបញ្ជាក់ថា យើងនឹងពង្រឹងការអប់រំដល់ប្រជាពលរដ្ឋឲ្យបានកាន់តែច្រើនដែលនេះជាបញ្ហាគន្លឹះដ៏សំខាន់ព្រោះពួកគេជាអ្នកបង្កើតសំរាម ដូច្នេះនឹងធ្វើឲ្យផ្លាស់ឥរិយាបថថ្មីនៅក្នុងការងារចូលរួមសំអាតបរិស្ថាន និងអនាម័យទីក្រុង។ ហើយសំរាម គឺជាឃាតករលាក់មុខដ៏សាហាវដែលអាចសម្លាប់ប្រជាពលរដ្ឋនៅពេលដែលស្រូបនូវក្លិនអាក្រក់ទាំងនោះតាមរយៈការសាយភាយនូវក្លិន កខ្វក់ នៃសំរាមដែលគទុកចោល ដោយមិនបានទុកដាក់ឲ្យបានត្រឹមត្រូវ។ មិនត្រឹមតែប៉ះពាល់ដល់សុខភាពប៉ុណ្ណោះទេថែមទាំងធ្វើឲ្យប៉ះពាល់ដល់វិស័យទេសចរណ៍ និងបរិស្ថានផងដែរ។
ដោយឡែក លោក ឆៅ គុនឆុន ប្រធានការិយាល័យបច្ចេកទេសត្រួតពិនិត្យផលប៉ៈពាល់បរិស្ថាននៃសាលារាជធានីភ្នំពេញបានឲ្យដឹងថា បញ្ហាសំរាម នៅរាយប៉ាយ តាមទីសាធារណៈដោយសារប្រជាពលរដ្ឋពុំបានអនុវត្តតាមពេលវេលានៃការប្រមូលសំរាមរបស់ក្រុមហ៊ុនស៊ីនទ្រី។លោកបញ្ជាក់ថា សំរាមទាំង នេះភាគច្រើនដាក់នៅតាមមាត់លូ ឬប្រលាយដែលជាហេតុផលដ៏អាក្រក់មួយមិនត្រឹមនាំឲ្យប៉ៈពាល់ ដល់សុខភាពប៉ុណ្ណោះទេ ថែមទៀតធ្វើឲ្យស្ទះលូនិងប្រឡាយទៀតផង។
សូមបញ្ជាក់ថា ក្នុងមួយថ្ងៃសំរាមនៅក្នុងរាជធានីភ្នំពេញ ដែលបានយកទៅចាក់នៅទីលានជាមធ្យមមានចំនួន១.៥៥០តោន ក្នុងនោះក្រុមហ៊ុនស៊ីនទ្រី ដឹកជញ្ជូនបាន១.៤៦០តោនក្នុងមួយថ្ងៃលើតំបន់សេវាកម្ម៧៦សង្កាត់មានការ កើនឡើង៥០ភាគរយ បើធៀបនឹងឆ្នាំ២០០៨មាន តែ១.០៣០តោនប៉ុណ្ណោះក្នុង១ថ្ងៃ៕ ដោយ ៖ ភីនរ៉ា