ភ្នំពេញ៖ សាលា Global Vision Christian School (GVCS) របស់ប្រទេសកូរ៉េខាងត្បូងបានធ្វើការ សម្តែងនូវក្បាច់​គុន​តេក្វាន់ដូ និង ច្រៀង រាំ របាំវប្បធម៌ ជាក្រុម លើកដំបូងក្នុងប្រទេសកម្ពុជា ក្នុង​គោល​បំណងដើម្បី​ពង្រឹងចំណង​មិត្តភាព​រវាងកម្ពុជា-កូរ៉េខាងត្បូង ឲ្យកាន់តែប្រសើរឡើង​ថែម​ទៀត។

មានប្រសាសន៍ប្រាប់ក្រុមអ្នកសារព័ត៌មាននៅល្ងាចថ្ងៃទី៦ កុម្ភៈ ម្សិលមិញនេះ លោក ញឹក ប៊ុនឆៃ ទីប្រឹក្សារាជ​រដ្ឋា​ភិបាល​កម្ពុជា បានឲ្យដឹងថា នេះជាលើកដំបូងហើយសម្រាប់​សាលា GVCSរបស់ប្រទេសកូរ៉េខាងត្បូង មកធ្វើការ​សម្តែងក្បាច់គុនតេក្វាន់ដូនិងរាំច្រៀងចំរៀង​ជាក្រុម​នៅប្រទេសកម្ពុជា ដើម្បីធ្វើការពង្រឹងនូវចំណងមិត្តភាព សាមគ្គី​ភាព នៃប្រទេសទាំងពីរ​ឲ្យកាន់តែខ្លាំង ។

លោកបានបន្តថា សម័យមុនពលរដ្ឋកម្ពុជាចូលចិត្តនាំគ្នាហាត់ក្បាច់គុនតេក្វាន់ដូខ្លាំងណាស់ ដូច្នេះការ​សម្តែងក្បាច់​គុន​​តេក្វាន់ដូនាពេលនេះ គឺជាចំនុចចាប់ផ្តើម ដែលយើងនឹងយកទៅធ្វើ​ការ​ផ្សព្វផ្សាយឲ្យកាន់តែទូលំទូលាយដល់​ស្រទាប់​យុវជន-យុវនារីកម្ពុជា ឲ្យនាំគ្នាចូលរួម​ក្នុង​ការហាត់ក្បាច់គុណដើម្បីឲ្យមានសុខភាពល្អ និងសម្រាប់ការពារ​ខ្លួនឯងផង។

លោក ណាំ ឈីនសុង អគ្គនាយកសាលា GVCS បានឲ្យដឹងដែរថា លោកមានការ​សប្បាយ​រីករាយជាខ្លាំង​ដែលបាន​ដឹកនាំក្រុមសិស្សសាលា GVCS មកបង្ហាញនូវក្បាច់​គុន​តេក្វាន់ដូ និងច្រៀងចំរៀងជាក្រុមជាលើកដំបូង​ក្នុង​ប្រទេស​កម្ពុជា ។ ហើយលោកនឹងខិតខំប្រឹង​ប្រែង​ដើម្បីប្រារពពិធីបែបបនេះនៅក្នុងឱកាសក្រោយៗទៀត ដោយប្រកាសឲ្យ​បាន​​ទូលំ​​​ទាយ​ដើម្បី​ឲ្យបងប្អូនប្រជាពលរដ្ឋកម្ពុជាបានដឹងនិងអញ្ជើញមកទស្សនាឲ្យបានច្រើនកុះករ​ជាងនេះថែម​ទៀត​ ។​

គួរបញ្ជាក់ថា ក្រៅពីនាំមកនូវក្បាច់គុនតៃក្វាន់ដូរ​មកកម្ពុជាក្នុងពេលកន្លងមក​ កូរ៉េគឺជាប្រទេស​មួយ​ដែលមាន​ប្រជាជន​​​យ៉ាងច្រើនសន្ធឹកសន្ធាប់បានមកលំហែរកាយនិងកំសាន្ត នៅប្រទេស​កម្ពុជា​ បើតាមតួរលេខ ក្នុងចំណោម​ភ្ញៀវទេសចរណ៍អន្តរជាតិដែលបានមកទស្សនា ប្រទេស​កម្ពុជា​មានចំនួន១០ប្រទេសដែលលេចធ្លោជាងគេ ក្នុងនោះ​កូរ៉េឈរលំដាប់ថ្នាក់​លេខ៣ ដែល​មានប្រជាជនប្រមាណជា៣៨២,៤៣៦នាក់មកទស្សនាកម្ពុជាបន្ទាប់ពីវៀតណាម និងចិន៕

ដោយ៖ ស.ស្អាត