ភ្នំពេញ៖ រដ្ឋាភិបាលអូស្ត្រាលី តាមរយៈ  ធនាគារអភិវឌ្ឍន៍អាស៊ី (ADB) បានផ្តល់ជំនួយឥតសំណង ចំនួន៦,១១ លានដុល្លារអាមេរិក ដើម្បីអោយប្រជាពលរដ្ឋ នៅតាមទីជន​បទទទួលបាន អគ្គិសនីប្រើប្រាស់ដែលមាន​តម្លៃ​សមរម្យ​​។កិច្ចព្រមព្រៀង ហិរញ្ញប្បទានឥតសំណង  គ​ម្រោ​ង​ថាមពលជនបទគ្រោងនឹងចំណាយថវិកាសរុប ចំនួនប្រមាណ ១០,៩២ លានដុល្លារអាមេរិក ក្នុងនោះមាន ហិរញ្ញប្បទានឥតសំណង របស់ រដ្ឋាភិបាលអូស្រាលី​តាម​រយៈ ADB ចំនួន៦,១១លានដុល្លារ អាមេរិក  ការរួមចំណែកបដិភាគរបស់ រដ្ឋាភិបាលកម្ពុជាចំនួន ២លាន​ដុល្លារអាមេរិក និងការចូលរួមពីអគ្គិសនីកម្ពុជា ចំនួន២,៨លានដុល្លារអាមេរិក ត្រូវបានចុះ ហត្ថលេខានៅថ្ងៃនេះ ដោ​យ​​លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច​ និង និងលោក Peter J.Brim​b​le​ នាយករងរបស់ ADB ប្រចាំ​កម្ពុជា ។

លោក Peter J.Brimble នាយករងរបស់ ADB ប្រចាំកម្ពុជា បានមានប្រសាសន៍ថា គ​ម្រោ​ង​នេះគាំទ្រដល់គោល​បំណង​សំខាន់មួយរបស់ ADB នោះគឺការ បង្កើនលទ្ធភាពទទួលបានថាមពល ដែលមានតម្លៃសមរម្យ ដល់​ប្រជាពល​​រដ្ឋ ក្រីក្រ នៅក្នុងប្រទេសកម្ពុជា ។ហើយ គម្រោងនេះ ត្រូវបានរៀបចំឡើង ស្របទៅតាម តម្រូវការរបស់​វិស័យ ថាមពល ហើយវានឹងឆ្លើយតប ចំពោះតម្រូវការបន្ទាន់ ផ្នែកអគ្គិសនីភាវូបនីយកម្មជនបទ ដែលមានសារៈ​សំខាន់ យ៉ាងខ្លាំង ការកាត់បន្ថយភាពក្រីក្រ ក៏ដូចជាលើកកម្ពស់ជីវភាព និងភាពសុខមាលភាព​របស់ប្រជាពលរដ្ឋ​ជនបទ។

សេចក្តីប្រកាសព័ត៌មានរបស់ ADB បានអោយដឹងថា ជំនួយឥតសំណង៦,១១លានដុល្លារ របស់អូស្រ្តាលីនេះ នឹង​ត្រូវយកទៅ សាងសង់បណ្តាយអគ្គិសនីវ៉ុលតា មធ្យមប្រវែង ២២០ គីឡូម៉ែត្រ និងបណ្តាយវ៉ុលតា ទាបប្រវែង ៤០០​គីឡូម៉ែត្រ នៅខេត្តស្វាយរៀង។ គម្រោងនេះ នឹងភា្ជប់ប្រជាពលរដ្ឋ៨០០០គ្រួសារទៀត ទៅនឹងបណ្តាញអគ្គិសនី​ក្នុងខេត្តនេះផងដែរ។តាមផែនការ  គម្រោង នេះនឹងលើកទឹកចិត្ត អោយមានការប្រើប្រាស់ចង្រ្កាន​ពិសេសរហូត​ដល់ ៩ម៉ឺន ចង្រ្កាន នៅតាមជនបទក្នុងខេត្តកំពង់ចាមផងដែរ៕ ដោយ ៖ រតនា