ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម បានថ្លែងក្នុងពិធី​សម្ពោធ ពិព័រណ៍​ពាណិជ្ជកម្ម​​​ថៃ ឆ្នាំ២០១៤ កាលពីល្ងាចថ្ងៃទី៦ ខែកុម្ភៈ ឆ្នាំ២០១៤ថា នៅឆ្នាំ ២០១៣ តួលេខពាណិជ្ជកម្មសរុប រវាង​កម្ពុជា​​​និង ថៃ មានទឹកប្រាក់ប្រហែល ៤.៥០៤,៥១លាន​ដុលា្លរអាមេរិក ដែលក្នុងនោះទំនិញថៃនំាចូលមកកម្ពុជា មាន​ទឹកប្រាក់សរុបប្រហែល ៤.១៥៣លានដុលា្លរអាមេរិក ហើយទំនិញពីរកម្ពុជាទៅប្រទេសថៃ មានទឹកប្រាក់សរុប ៣៥១,៥១លានដុលា្លរអាមេរិក។

លោក ស៊ុន ចាន់ថុល បន្តថា តួលេខពាណិជ្ជកម្ម ដែលមានការកើនឡើងជារៀងរាល់ឆ្នាំនេះ គឺដោយសារតែមាន​ការ​ទំនាក់ទំនង សេដ្ឋកិច្ចពាណិជ្ជកម្មដ៏ល្អ ប្រសើររវវាងប្រទេសទាំងពីរ ព្រមទាំងការចូលរួមយ៉ាងសកម្មពីរ​ផ្នែកឯក​​ជន ជាពិសេសបណ្តាពាណិជ្ជករ នៃប្រទេសទាំង​ពីរ។ លោកជឿរជាក់ ទំនាក់ទំនង ពាណិជ្ជកម្ម កម្ពុជានិងថៃ ត្រូវ​បាន​​​ថែរក្សាគ្នាយ៉ាងល្អប្រសើរ ដោយមានការចូលរួមយ៉ាងពេញលេញ និងសកម្មផ្នែកឯកជន និង រដ្ឋាភិបាលនៃ​ប្រទេស​ទាំងពីរ។គួរបញ្ជាក់ថា ផលិតផលសំខាន់ៗ ដែលកម្ពុជានាំចូលពីថៃ ភាគច្រើនជាផលិតផល សម្រេច ដូច​ជា​ប្រេងឥន្ធនៈ ជីកសិកម្ម ស៊ីម៉ងត៍ គ្រឿងឧបភោគបរិភោគ ភេសជ្ជៈ បន្លែផ្លែឈើ និងគ្រឿងសម្អាង រីឯផលិត​ផល​នាំ​ចេញរបស់កម្ពុជាទៅថៃវិញ ភាគច្រើនជាផលិតផល​កសិកម្មរួមមាន អង្ករ ពោត ដំឡូងមី សណ្តែក និងផលិតផល​នេសាទជាដើម៕ ដោយ៖ ស.ស្អាត